Read Masana ŊAƁTA 34 Bible Online

ŊAƁTA 34 - Masana bible

ŊAƁTA 34

¹Ma-Vatɗina di tam Musus:

²Naŋ ma di tam gurona vi Israyel ala: Hay li ma nigi coowa hay nagata Kanaan, na' ma muɗ ti vocota vigiya. Nan min ɗekgi kay vun nagata vigiya:

³Gal ma kayamna ma tun caw hay fulda vi Sin, goboy hiɗi Edom. Vun nagata vigi ma kayamna ma tun caway hay sin Niy-lum ma slawna, hay gal ma kuɗuwna,

⁴na' ma cap gal kayami hay liy ma jiŋiliŋŋa vi Akrabim, ma jik hay Sin, ma co ta-ta hay gal ma kayamna vi Kades-Barneya; na' ma tuɗ ta-ta hay Hatsar-Addar, ma jik hay gal Asmon;

⁵Tun caway hay Asmon pa, na' ma jik ta-ta hay niy ma riŋŋa vi Egipte, kay co ta-ta goy vun niy-lum ma ŋolla.

⁶Vun nagata vigi ma hay gal vulatina ma li ɗawn mi niy-lum ma ŋolla.

⁷Kayni mi vun nagata vigiya hay gal ma gaana tun caw tam niy-lum ma ŋolla pa, nigi ma sli jaara ta-ta tam hiɗiyta vi Hor;

⁸tun cawis tam hiɗiyta vi Hor pa, nigi ma jik jaara hay Hamat, ta-ta co Sedad;

⁹jaara ma tuɗ ta-ta hay Zifron, kay co ta-ta hay Hatsar-Enan, kayni mi jaara vigi ma hay gal gaana.

¹⁰Jaara vigi ma hay gal kuɗuwna nigi ma slum vunami hay Hatsar-Enan ta-ta Sefam,

¹¹nam ma jik hay Sefam ta-ta hay Ribla, hay gal ma kuɗuwna vi Ayin, nam ma tuɗ ta-ta, ma bur kuɗ fiyokŋa vi niy-lumna Kinneret, hay gal ma kuɗuwna;

¹²jaara ma jik hay Yordan lo, kay co ta-ta tam niy-lum ma slawna. Kayni ti nagata vigiya, hiɗi vuna' ma ŋuyi ta'na.

¹³Musus vul dit na'ta tam gurona vi Israyel, nam di'e: Kayni ti nagata ta nigi ma ɓurawa' jargiya hiɗi ŋaɓta kuɗ ɦayta, ti nagata ta Ma-Vatɗina miniya kay vula' mi jaf ma zleeŋena hiɗi gal-jafna ma kepna.

¹⁴Kay jafna vi gurona vi Ruben hiɗi jafna vi gurona vi Gad vocota visi fiya, kuɗ ziyna vi sumaysiya; gal-jafna vi Manase kaw vocota visi fiya.

¹⁵Jaf ma ma'n lakŋi hiɗi gal-jaf ma kepna fi vocota visiyawa goy hay gal hena vi Yordan, ɗiger vok Yeriko, hay gal ma kuɗuwna.

¹⁶Ma-Vatɗina di tam Musus ala:

¹⁷Kayni mi semda vi sum sa ɓuraw nagat jargin ɗawni: Mul-ma-ɗifinna Eliyazar, hiɗi Yosuwa goora vi Nun.

¹⁸Nigi ma vi sa ma ŋol kuɗ jafn kep kep kay li ɓurawta vi nagata.

¹⁹Kayni mi semda vi sum nisina: Kuɗ jafna vi Yuda: Kaleb, goora vi Yefune;

²⁰kuɗ jafna vi Simeyon: Samuel goora vi Amihud;

²¹kuɗ jafna vi Benyamin: Elidad goora vi Kisilon;

²²kuɗ jafna vi gurona vi Dan: Sa ma ŋolla Bukki, goora vi Yogli;

²³kay gurona vi Yosef, kay jafna vi gurona vi Manase: Sa ma ŋolla Hanniyel, goora vi Efod.

²⁴Kuɗ jafna vi gurona vi Efrayim: Sa ma ŋolla Kemuwel, goora vi Siftan;

²⁵kuɗ jafna vi gurona vi Zabulon: Sa ma ŋolla Elisafan, goora vi Parnak;

²⁶kuɗ jafna vi gurona vi Isakar: Sa ma ŋolla Paltiyel, goora vi Azan;

²⁷kuɗ jafna vi gurona vi Aser, sa ma ŋolla Ahihud, goora vi Selomi;

²⁸kuɗ jafna vi gurona vi Neftali: Sa ma ŋolla Pedahel, goora vi Amihud.

²⁹Kayni si nisi sa Ma-Vatɗin vulsi hagata kay ɓuraw nagata Kanaan jar gurona vi Israyel.