Read Masana ŊAƁTA 35 Bible Online

ŊAƁTA 35 - Masana bible

ŊAƁTA 35

¹Ma-Vatɗina di tam Musus hay fulda vi Mowab, goboy hiɗi Yordan, ɗiger vok Yeriko. Nam dum ala:

²Naŋ ma vul hagata tam sum sa Israyella ala, hoyok-ziy ma vuli ir misina nisi ma vul kuɗum mi sa Levitna kay nisi ma lak ziy hayamu. Voora vi hoyok-ziy namna lakŋi nigi ma vulum mi sa Levitna.

³Vulsi hoyok-ziya kay nisi lak hayamu, voora valamu nam vi farayna visiya, hiɗi slena visi noŋ kaf.

⁴Voora vi hoyok-ziyna ma nigi vulum mi sa Levitn ɗawni, jaram ma li jay goy hiɗi hoyok-ziyn ir goldoŋ birim kep, hay gal hoyok-ziyn kaf.

⁵Goy bugol hoyok-ziyna, nigi ma ŋaɓ goldoŋ birim ma' kay gal ma kuɗuwna, goldoŋ birim ma' kay gal ma kayamna, goldoŋ birim ma' kay gal ma vulatina, goldoŋ birim ma' kay gal ma gaana. Hoyok-ziyn ma hin goy waya. Kayni mi voora vi hoyok-ziyna visiya.

⁶Jar hoyok-ziy ma nigi vulum mi sa Levitna, hoyok-ziy ma ŋay hayamna ma li karkiya kay sum sa ci matna ma pir goy hayamu, hoyok-ziy hena dok-fiɗi yam ma'.

⁷Hoyok-ziy ma nigi ma vulum mi sa Levitna noŋ pet, dok-fiɗi yam glafandi, hiɗi voora valam kafe.

⁸Nisi sa hoyok-ziyna ŋolla ma vul mi sa Levitna ŋolo, sa hoyok-ziyna visi kiɗaya ma vul mi sa Levitn kiɗay lay; jaf marige kaw ma vul hoyok-ziyn mi sa Levitn ɗawni ŋray dig vocota valamu valamu.

⁹Ma-Vatɗina di tam Musus:

¹⁰Naŋ ma di tam gurona vi Israyel ala: Hay li ma nigi haw Yordanawa kulo'o, la nigi coowa hay nagata Kanaan,

¹¹nigi ma hin hoyok-ziy mara goyo, kay sa ma ci mati kuɗ minda valamɗina ma pir kay ŋay hayamu.

¹²Nam ma lin mi hoyok-ziy ma ŋayna, kay san ma ŋay tuwam kay sa ma job yam matna, jew a nam col vok tokŋa, a nisi ka kitata valamu.

¹³Hoyok-ziy ma nigi vulsitn ɗawni, ma ŋayn jaram karkiya.

¹⁴Nigi ma vulsi hoyok-ziyn ɦidi goy bugol Yordan, nigi ma vulsi hoyok-ziyn ɦidi kalaf hay Kanaan, kayni mi hoyok-ziy ma ŋayna.

¹⁵Hoyok-ziy namna ma karkiyan lakŋi gurona vi Israyel ma ŋay hayamu, sa ma pulla ma ka li ziy jarsin kaw, san gigekaw ma ɓalam vi sa'a ma pir kay ŋay hay hoyok-ziy namna.

¹⁶La san ci sugolom hiɗi va ma kawaya, la sugolomna cap mita, sa namna mi sa ma ci mati, nigi cum mat lay.

¹⁷La nam sli goorhoyo hay ɓalamu, cum hiɗi namu, nam capawa mita ni, nam mi sa ma ci mati, sa namna nigi cum mat lay.

¹⁸La nam sli zugul hay ɓalamu, cum hiɗi namu, nam capawa mita ni, nam mi sa ma ci mati, sa namna nigi cum mat lay.

¹⁹Sa ma job yam sa ma mitina ma cum goy mati; la nam ŋafawa hiɗi namu, nam cum goy mati.

²⁰La san tupa tam sugolomna hiɗi dikam talam gawi, lebo la nam gum kalam hiɗi va'a, hiɗi dikam talam gaw jewe, la san kayni cap mita,

²¹lebo la nam cum hiɗi ɓalamu, hiɗi dikam talam gawi, la san kayni cap mita, sa ma cumna kitata valam ti mitta, kay nam mi sa ma ci mati; la sa ma job yam busuwn fumawa, nam cum goy mati.

²²May la san tupa tam sugolomna hiɗi dikam talam gaw jewɗi, lebo nam gum kalam hiɗi va'a, hiɗi varta kay lum joo hay dikam jewɗi,

²³lebo nam gum kalam hiɗi goorhoyona bay wum jewe, nam cap mita, la dikam may gaw talam jewe kay gar a lum jooɗi,

²⁴tokŋa ma ka kitat jar sa ma ci matna hiɗi sa ma job yam busuwn ɗawni, ɗuwum kuɗ gat na'ta lakŋi.

²⁵Tokŋa ma but sa ma ci matna goy hay ɓam sa ma job yam busuwna, hotom hay hoyok-ziyna ma nam pir kay ŋay hayna. Nam ma mus ɗawni ta-ta cub mitta vi mul ŋol ma-ɗifinna ma mul ma peldetna ka hoki kalamna.

²⁶La sa ma ci matna piray goy hay hoyok-ziy ma nam ŋay hayamna pa,

²⁷la sa ma job yam busuwna ŋafawa hiɗi namu goy gine hiɗi hoyok-ziy ma ŋayna, la sa ma job yam busuwna cumawa goy mati, busuw san kayni may kalamɗi.

²⁸Kay sa ma ci matna as mus hay ziyna ma ŋayna ta-ta mul ŋol ma-ɗifinna mit goy tuwa; hay li ma mul ŋol ma-ɗifinna mitawa, nam ma hot hay nagata valamu may.

²⁹Gatta lakŋi nigi ma li kuɗa'a, gurona vigi ma li kuɗa kaw, hay liyn kaf ma nigi ma lak hayamna.

³⁰La ci mati, cum nam mat lay. Kayn di ala hay li ma sum sara wum hiɗi irsiya. La wum mi sa kep ɦawa'a ni, nigi as cum mat deɗi.

³¹Sa ma nagay kay ti mitta nigi as muɗum hiɗi gurjuɗi, kay kitata valam kayn ti mitta.

³²Nigi ma muɗ sa hiɗi gurjuɗi, a nam ma pir goy hay liy ma ŋayna, hotay hay nagata valamu bugol mitta vi mul ŋol ma ɗifinna kayni may hay liyamɗi.

³³Nagata ta nigi lakay haya'ta nigi ma muɗa' liwisɗi, kay busuwna muɗ nagat liwisi; a por nagat kayni, nigi ma hok busuw goyo, ma li ɗawni mi busuwna vi sa ma ci matna.

³⁴Nagata ta nigi tuɗ lak haya'ta ɗawni, nigi ma muɗa' liwisɗi, kay nan ka jargiya; kay nanu mi Ma-Vatɗina ma mus jar gurona vi Israyel.