Read Masana ŊAƁTA 36 Bible Online

ŊAƁTA 36 - Masana bible

ŊAƁTA 36

¹Sum sa ŋulona kuɗ jafna vi Galaad, gurona vi Makir, gurona vi Manase, jar jafna vi gurona vi Yosef, nisi co'o law vok Musus hiɗi sa ŋulona kuɗ jafna vi gurona vi Israyel kafe.

²Nisi di'e: Ma-Vatɗin di taŋ ala naŋ ma ɓuraw nagat kuɗ ɦayta, vula' voco'o mi gurona vi Israyel. Ma-Vatɗin vulaŋ hagat kaw ala naŋ ma vul vocota vi ɓasuma'na Selofkad, mi guro-boyna valamu.

³Wulin kayni la nisi sli sa mara'a ma kuɗ jaf hena vi gurona vi Israyelawa, vocota visi ta hay jafna vi busit tay loɗi, na' ma tap ɗawn jar vocota vi jaf ma nisi muɗi goy hayamna; ki kayn nala vocota vuma'a ta ŋaɓta kuɗ ɦayta vula' muma'ta muɗ ɗawn kiɗaya.

⁴Hay li ma busata vi firita vi gurona vi Israyel coowa, ir vocota visi tap ɗawn jar jaf ma nisi yawi goy hayamna nala vocota vi buma' muɗ ɗawn kiɗaya.

⁵Ki kayn nala, Musus vul dita vi Ma-Vatɗin tam gurona vi Israyel, nam disiya: Dita vi jafna vi gurona vi Yosef hay liya'a.

⁶Kayni mi va ma Ma-Vatɗin di'e kay guro-boyna vi Selofkad: Nisi as sli sa ki nisi min nala, may ma li mi sa ma hay jafna vi busiya.

⁷Vocota vi sum sa Israyella as fokis hay jaf hena kay jok hay jaf maraɗi, may gigekaw ma wa' ti vocota valam hay jafna vi sumiyamu.

⁸Goot-cat tarige kaw, la voco ka hay ba'a jar jafna vi gurona vi Israyel, na' ma slum mi sa ma hay jafna vi bu'a, kay gurona vi Israyel gigekaw ma mus hiɗi vocota vi sumiyamu.

⁹Voco tarige kaw as fokis hay jaf hena kay jok hay jaf maraɗi. May gigekaw ma wa' ti vocota valam hay jafna vi sumiyamu.

¹⁰Guro-boyna vi Selofkad li kuɗ va ma Ma-Vatɗin dum mi Mususna.

¹¹Mahla, Tirsa, Hogla, Milka hiɗi Nowa, guro-boyna vi Selofkad, yawsi si gurona vi ɓosiyom busina;

¹²yawsi si sum sa hay jafna vi gurona vi Manase goora vi Yosef, ki kayn nala vocota visi hin hay jafna vi busiya.

¹³Lakŋi mi vun-ma-gatna hiɗi gatta mara'a mara'a ma Ma-Vatɗina vulum mi Musus kay nam ɗekem tam sa Israyella, hay fulda vi Mowab, goboy hiɗi Yordan, ɗiger vok Yeriko.