Read Masana MIKKA 1 Bible Online

MIKKA 1 - Masana bible

MIKKA 1

¹Kayni mi yoboyna vi Ma-Vatɗina ma nam di'e tam Mikka, sa ma hay nagat Moreset, kayni hay liyna vi Yotam, hiɗi Ahaz, hiɗi Ezekiyas, muliyana vi Yuda, nam wi ɗekka kay Samariya hiɗi Yerusalem.

²Humgiya nigi sumun kaf, tun ŋalda vagu, nak nagata hiɗi sum sa hayag kafna. Hin Bum-Sumuna Ma-Vatɗina wi va ma nigi lumna, Bum-Sumuna may goy hay Tempella valam ma peldetna pa,

³kay ɗuwgiya, Ma-Vatɗina min kali goy hay liyna valam ma musta pa, nam ka jik gaa'a, nam ka poy kulo kay liyn ma jiŋiliŋŋa vi nagata.

⁴hiɗiyn ma gaa kuɗ selemna ka mun goyo, hor-ɦuɗukŋa ka mal goy kay tuwamu, ki diyakŋa vok kuta nala, ki niyn jaŋ hay liy ma beɗna nala.

⁵Slen zawni kaf li'e kuɗ jiw-zlata vi Yakub, kuɗ sulukŋa vi sum sa hay ziyna vi Israyel. Jiw-zlata vi Yakub mi mige? May mi Samariya ɗisu? Liyn ma ɗiŋiriŋŋa Yuda mi mige? May ti Yerusalem ɗisu?

⁶Samariya nan muɗa ɗawni, ki sine ma goorhoyon dakay hayamna nala, ki sine ma pi gulda-guldan haya nala, hiɗiyn ma hayamna, nan ma zutum gaa hay liyn ma wiŋŋa, baga' ma viy gaana nan ma patam kulo'o.

⁷Lawayna visi kaf nan ma tom goyo, faray ma nisi fum hiɗi hagat ta liwista kut ma tumu, Lawayna ma waana visi kaf nan ma vatam goyo, wurakŋa ma nisi fum kuɗ jiw-zlata visi kaf, nam ma hot ɗawn hay liyam ma wurakŋa vi viyuwta.

⁸Kuɗ kayni nan ma tiya, nan ma yor tuwanu, nan ma poy nala'a bay cuk tuguru senu, nan ma buw ki turlon nala, nan ma ciriya ki rigetna nala.

⁹Kay mil ma ta'na nam may citɗi, vunam co ta-ta hay Yuda. Bum-Sumuna coowa hay vun-ziyna vanu ta-ta hay Yerusalem.

¹⁰Nigi ma vi labar namna hay nagat Gat noŋɗi, nigi ma tiy hay Akko noŋɗi kaw. Rugusgi tuwgi gaa hay nagata hay Bet-Lefra.

¹¹Kalgiya, nigi sa li ziy hay Safir, kalgi hay nalata hiɗi zulota, boy sa ziyna visi hay Sanaan as cuk goy loɗi, do'olla ma nigi ti'e hay Bet-Atsel as hingi tun suk noŋɗi.

¹²Na'a ta musi ziy hay Marot ka jiriya kay gar su'da, kay yorta jikiyawa gaa'a, na' may goy vi Ma-Vatɗina pa. Na' coowa ta-ta kulo vun Yerusalem goŋ'.

¹³Nigi boy sa hay Lakisna, gangi kekena vigiya hiɗi kulumayna, nigi si sa zut gurona vi Siyon hay sulukŋa sem ma jewna. Kay ci-matta vi Israyel may goy hay nigi pa.

¹⁴Kuɗ kayni jargi ma ja goyo hiɗi Moreset-Gat, ziyna vi Akzib ma hin muliyana vi Israyel hay zulota.

¹⁵Nan min marag sa ma kolda mara'a lo, nak ta musi ziy hay Maresa, gajijita vi Israyel ma kal ta-ta hay Adullam.

¹⁶Welag yag goyo, kaag ŋusag goyo, kayni kay gurona vag sa dikag minsi ŋolla, kulotag yag goy vaniya ki bakŋa nala, kay gurona vag kal ɗawn goy gorvo'o, gine hiɗi naku.