Read Masana MIKKA 2 Bible Online

MIKKA 2 - Masana bible

MIKKA 2

¹Joot kay sum sa niŋa law ma joon hay diksiya hay li ma nisi ka buri gaa tuwa, hay li ma liyn foowa goyo, nisi li law namna, la donot ka hay ɓisiya.

²Nisi niŋa sinena vi segena, nisi yawamu, la mi ziyn kaw nisi yawamu, nisi li ɦawlat tam sumuna, yaw ziyn kisiya, nisi lassi kuɗsi vo'o, ta-ta nisi yaw vocota vi sumuna.

³Kuɗ kayni Ma-Vatɗina di'e: Ɗuwgiya, nan ma li va ma joo'o tam jaf-sumuna; nigi as a hulot yigi goy loɗi, nigi as a tuɗ hiɗi yigi tuni kulo ja tiriŋ loɗi, kay buurta vi yorta coowa kigiya.

⁴Hay buur namna ɗawni, sumun ma lawam tigi mi law ma panna, nisi ma gum mi nul ma yorta, nigi ma di ala: Nay vurumi kafe, Ma-Vatɗina cuk irawa mi nagata vaya, nam vula'awa goyo, sinena vaya nam ɓurawamawa goy mi sum sa ŋel-gatta.

⁵Kuɗ kayni, hay li ma sumun ma fi tuwsi hay tokŋa vi Ma-Vatɗina ɗawni, sa vigi kep ma yaw zigewn hay ɓalamu kay ŋaɓ liyna ma li jarsi noŋɗi.

⁶Nigi di tan ala: Mak tuwaŋ a winekɗi, kus yoboy ma ki kayn nalaɗi, may na' ŋulda as vatɗi.

⁷Nigi gurona vi Yakub, nigi law kayn ki kayn nala su? Ma-Vatɗina as a muɗ ɦiy gosoy su? Nam kaw as li ki kayn nala lay su? Yoboy ma nam dumna, nam as gut sum sa tuɗ hay hagat ɗigerta ɗisu?

⁸Jew ɓa-ɓa nigi ka las sumuna vanu, ki sa gawt kigin nala; sum sa li law ma jooɗi kaw, nigi fok sligar ma tisin goyo, sum sa jik hay hagat hiɗi sle'ta nigi dursiya kaw.

⁹Sumuna vanu nigi digiɗ boyna visi goy hay ziyna ma kirsi ŋaana, gurona sa nan vulsitna, nigi yaw gajijita van goy kisi kay dok-doko.

¹⁰Yawgi kulo'o, tuɗgiya, kay tani may mi liyn ma tun suk loɗi, kuɗ liwista ta hayamta, tuw-tita ma li'e, Tuw-tita ta ŋolta.

¹¹Sa co jarsiya, law jar simeɗna, ka sinda ala: Nan min di tigiya, nigi ma fi dolay vinna hiɗi dolay arkena, sumun minim mi law ma ɦay-ɦayna ki kayn nala.

¹²Nigi gurona vi Yakub, nan digi gasita: nan ma tapgi yigi kafe, nigi dir gurona vi Israyel ma hinina, nan ma tokgi yigiya, nan ma toksiya ki tap fok-dimina hay gulina valam nala, ki farayn tap tuwam hay liyn ma ti hatna nala, winekŋa vigi ma li ŋolo hay buur namna.

¹³Sa ma mun hagata tun voksiya, nisi co baŋana, nisi cuk hay vun-ziyna, nisi cap goyo, mulla visiya tun voksiya, Ma-Vatɗina ma tun kisiya may.