Read Masana MIKKA 5 Bible Online

MIKKA 5 - Masana bible

MIKKA 5

¹Nak Betlehem Efrata, nak ti ta goota hay nagat Yuda kafe, may hay naku sana van ma vuɗa, nam ma ti mul kay sa Israyella, namu mi sa ma jafam ay gaa jew ba-ɓa, ay hay buur ma din-dinna pa.[2]

²Kuɗ kayni nam ma hinsi goyo, ta-ta hay li ma na'a ta min vuɗ goora ma vuɗum goy tuwa, ta-ta hay li ma dir ɓosiyomna sa hinina ma hoti tam gurona vi Israyel.

³Nam ma vul tuwam goy haraŋi, nam ma ti mulda hiɗi donota vi Ma-Vatɗina, hiɗi gajijita vi sem Ma-Vatɗina, Lawna valamu: Nisi ma lak hay liyn ma va as josi loɗina, kay semda valam ma tiya wulin pa, ta-ta hay vun dabaŋ-gu'ta vi nagata.

⁴Sle'ta mara' ɗawn mi namu. La sa ma Asiriya coowa hay nagata vaya, tun selemawa kulo hay ziyna vaya ni, nay ma zlar sum sa ŋomda kulo kiram siɗiya, nay ma zlar sa yeriman kulo kiram glafandi may.

⁵Nisi ma ti mulda kay sum sa Asiriyan hiɗi kew-gaferaŋa, sum sa hay nagata vi Nimrod nisi ma ti mulda kuɗsi vo'o kaw, hay li ma sa ma Asiriyan coowa, tun selemawa kulo nagata vayana, nam ma butay goy hay ɓalamu.

⁶Dir sumuna vi Yakub ma tap jar sum sa kisna, ki maɗayna ma may goy vi Ma-Vatɗina pa nala, ki niy ma tol gaa hum-usna nala, nam may zam ɓam saɗi, kay san asay kay lumɗi.

⁷Dir sumuna vi Yakub ma tap jar jaf-sumun ŋolo, jar jaf-sumun ŋolo, ki zlona jar muuriyana ma kuɗ juruta nala, ki goor-zlona jar farana vi fok-dimin nala; hay li ma nam ka capa, nam tay farayn gaa kuɗ selemu, nam jet hegen goyo kaw, sa ma as hulotom goy ɓalam mayɗi.

⁸Donota vigi ti kay sa gawt kigin tige, sa gaw kigina vatis goy vatge.

⁹Ma-Vatɗina di'e, hay buur namna ɗawni, kulumay ma ka jargina nan ma vatam goyo, keke-ma-duura vigiya nan ma tom goy kafe.

¹⁰Hoyok-ziy ma ŋulona, ma kay hay nagata vigiya nan ma ɦom gaa kafe, gulmun ma ŋuyi tigina nan ma ɦom gaa kafe.

¹¹Sum sa li nooyna hiɗi sa li gul-yalda nan ma vatsi goyo.

¹²Lawayn ma waana ma ka jargiya, hiɗi slen ma nigi kotom hiɗi ɓigina nan ma tom goyo, Nigi ma girif gaa vok va ma nigi lum hiɗi ɓigin loɗi.

¹³lawayn waana vi Astarte* ma ka jargina nan ma ɦom gaa'a, nan ma to hoyok-ziyna vigi ma ŋulon gaa'a.

¹⁴Nan ma job yan ɗawn hiɗi ɦiyda ŋolda, hiɗi dikan giy ku ŋolo tam jaf-sumun kaf sa may human vunanɗina.