Read Masana NAHUM 2 Bible Online

NAHUM 2 - Masana bible

NAHUM 2

¹Humgiya nigi sumuna vi Yuda, sa ma min margi labara vi toyta selem ka ci gaa kay hiɗiyn rim-rim'. Nigi gurona vi Yuda, liwgi yuldeta vigiya, vulgi mi Lawna sle ma nigi di kay vulumta. Kay sum sa joona as jik kulo jargi loɗi, nisi kaf vatay goyo.

²Sa ma gawta ka co'o kay durgiya, ŋomgi gulmunna ŋaa'a ŋolo. Lakgi hay hagat jigere, ŋiliɓgiɗi, yawgi ŋiraygi goyo.

³Kay Ma-Vatɗina min hot gajijita vi Yakub, hiɗi gaŋeraŋa vi Israyel kulo'o, gulda-guldana visi ma sa gawt param goyna, nam min hotom kulo hay liyamu.

⁴Sumuna sa wi duur ŋolla marayta visi cori slaw keŋ', sa wi duura cuki hiɗi sligar purpella, keke-ma-duura co hiɗi kaway ma wileɗna, kayni hay buur ma nisi colom kay li duura, kawayna visi nisi wileɗem kulo pilik-pilik'.

⁵Keke-ma-duura jaŋ hay fulda, li koloyo kay gar liy ma duura, nisi ɗuw ŋray ca ki kuta ta wileɗ nala, nisi jaŋ koloyo ki wileta vi niyna nala.

⁶Nam yi sumuna valam sa wi duura, may hay tu'da tuwsi visi bat-bat', nisi jaŋ koloyo tam gulmunna, koti tuwsi kay tel sa gawt goyo.

⁷Dolay kayni vun niy-lumna ay mali goy mal', ziyn ma mulda ɦo gaa'a.

⁸Kayni liyawa, dira' patawa goyo, nisi kalawa hiɗi na'a. Sa sunda sa haya'na tun caw tiy ki gukka nala, nisi slet ɓisi digsiya.

⁹Jewe Ninive ay mi liyn ma niyn ma hayna vat noŋɗi. Duwgiya wulini nisi muni jaŋi yo. Lakgiya, lakgiya, may sa ma hot bugolom may loɗi.

¹⁰Vurumgi gurjuta, vurumgi ora, farayn ka hobay ta'! Farayn kuɗ jafam kaf ka hay nagat na'ta.

¹¹Vurumgi slena, togi slen goyo, ŋalgi slen goy kaw. Diksi muɗi visi bat-bat', sesi visi bat-bat'; zoksi muɗi ɓassiya, Irsi zoɓi gaa'a kaw.

¹²Juru namna ma zlon ŋay kuɗumna muɗ wulin kayn muɗtige? Liyn namna ma jewe guro-zlon ti haya, zlon ŋay haya, gurona vi zlon kaw ŋay haya, sa ma co kay geɗem may noŋɗi!

¹³Liyn ma jewe zlon vi muuriyan haya, jetem goyo, vul mi slo tan-cata hiɗi guro-zlona, nam hob zulla valam goy cep-cep' hiɗi sliw muuriyan ma nam vumna.

¹⁴Ma-Vatɗina vi vok-ma-duura di'e: Nan coowa kigiya, keke-ma-duura vigiya nan min ŋalam goyo. Kew-gaferaŋa ma cal guro-zlona vigi goyo, muur ma nigi vumna nan ma yawam goyo hay nagata, Sumuna vigi sa di sunda, ma muɗ ɗawn sa humsi delsi loɗi.