Read Masana HABAKUK 1 Bible Online

HABAKUK 1 - Masana bible

HABAKUK 1

¹Humgi labar kayni, ma Ma-Vatɗina ɗekem kir sa ma jobta-Lawna Habakuk.

²Ma-Vatɗina, nan min yaŋu kay naŋ ma gutanu, may naŋ human ɗawn citige? Nan ka siwel taŋ ala ɦawlat ɓa' suwiya, may naŋ min gutanɗi su?

³Naŋ min ala nan wi jiw-zlata vi sumun hiɗi iranu kay mige? Naŋ min sar bay-ɗigerta hiɗi iraŋu kay mige? ɦawlat hiɗi curo'da ka tuma dok-doko kay mige? Nefta ka'a, ci-wayt ka fok kulo dok-doko kaw.

⁴Vun-ma-gatna nisi muɗumawa dirlaya, ɗigerta donota va' may loɗi; kay sa ma bay-ɗigera kitata valam hot vi sa ma ɗigera, law ma ɗigera ŋolom muɗi goy kisi sin kaf.

⁵Duwgiya, cukgi irgi jar jaf-sumuna, sargi tige, lakgi kiliŋ, muɗgi ɦuyum', kay hay buur ma nigi hayamna lakŋi, nan ka li lop mara'a, law namna la vigit selem kaw, nigi as a vumɗi.

⁶Humgiya, nan min hin sum sa Kaldeen kali jargiya, sum sa donosi suwiya, kir-hawt may haysi noŋɗi. Naga ma ginena nisi ŋuyi hayam kaf, liyna vi sum segen nisi yawam bay lopo kaw,

⁷Nisi as li sa ɦuyum', kay sa col digsiɗi, nisi col dita visi kayn kuɗ donota visi kay tuwsiya.

⁸Kulumayna visi koloy ŋolo suw zinilla, hefteŋ ŋolo suw keŋŋa ma gar hay vulatita, sa ɓe kay kulumayna zlar goyo, nisi may goy gine pa, nam pir kulo gif-gif', ki bakŋa ma min ti sliwn vokom waŋ' nala.

⁹Sum nisin kaf co kayn hiɗi donota visiya, irsi cuki goy voksi ŋiresl', nisi mol sum sa nisi yawsin yam tuwsi ki ŋeslna nala.

¹⁰Muliyan kirsi kayn mi va ma waa'a; Yeriman kirsi kayn mi va ma liw ɦawa, gulmun ma ŋuyi tam hoyok-ziyna nisi liw liwi hiɗi nam ɦawa, nisi mol nagan yam tuwamu, sli hoyok-ziyna.

¹¹Bugolda nisi li hiɗi dono lo, nisi kala, li hiɗi wasta, Lawna visi kayn mi donota visiya tuta.

¹²May Ma-Vatɗina, hay jew pa naŋu mi Lawna vanu, Ma-Vatɗina vanu, ma peldetna vanu kaw ɗisu? Numa as mitɗi! Ma-Vatɗina, naŋ tun sum nisin hay nagat kayni kay ka kitatɗi su? Naŋ hiɗiyna vanu, naŋ vul donot mi sum nisin kayni, kay gat vun sumuna vaŋu ɗisu?

¹³Kay iraŋ ma peldetna ŋaf hiɗi jootɗi, naŋ as ɗuw jiw-zlatɗi, iraŋ min ɗuw sa ma tun lawt kay sumuna vaŋu kay mige? Naŋ mus kiliŋ hay li ma sa joona ka las sum sa ɗigera kay mige?

¹⁴Wulini naŋ min li sumuna ki kuluf ma goloŋ jar niyn nala, ki sle ma ɦarmatna ma sa ma dum lawam mayɗin nala kay mige?

¹⁵Sa ma ciwna yawam kulo hiɗi siwitna, nam yawam kulo hay dena, nam tokom yalam hay jella, nala firit kal hayam may.

¹⁶Nam li ɗifin mi dena valamu, li ɗifin ma his fayna tam jella valamu; kay tina valamu ma ŋaana ma hobom hayamna, nam fum kayn kuɗ slen namna cani.

¹⁷Nisi ma gulut dena visi goy dok-dok, kuɗ kayni nam ma ko dena valam goyo lebo, ma ŋat jaf-sumun goy bay kir-hawta su?