Read Masana SOFONIYA 1 Bible Online

SOFONIYA 1 - Masana bible

SOFONIYA 1

¹Ma-Vatɗina di yoboyn tam Sofoniya goora vi Kusi, goora vi Gedaliya, goora vi Amariya, goora vi Ezekiyas, kayni hay buura vi Yosiyas, goora vi Amon, mulla vi Yuda.

²Ma-Vatɗina di'e: Slen ma kay nagat kafna nan min bulakam goyo.

³Sumuna hiɗi farayna nan min ɓulaksi goyo, layayn ma dukalawna hiɗi kuluf ma goloŋŋa kaw, nan min ɓulakam goyo, slen ma dab sem sana hiɗi sum sa joona; sum sa kay nagatna nan min vatsi goyo, Din mi Ma-Vatɗina.

⁴Sum sa hay Yudana nan min meɗ ɓan goy kisiya, sum sa hay Yerusalem kaf kaw. Caw slen ma hin hay liy namna, ma ir vi Baal kaf nan min vatam goyo. Sum sa li ɗifin mi Baal hay liy namna kaf, nan min vatsi goyo,

⁵sum sa dab voksi gaa hiɗi sem Lawna, may yum vunsi mi sem mulla visiyana, nan min vatsi goy lay.

⁶Nisi sa muɗ ŋorsi tam Ma-Vatɗina, nisi sa may gar Ma-Vatɗinɗina, sa min jobomɗina nan ma vatsiya.

⁷Lakgi ŋal kiliŋ vok Bum-Sumuna, Ma-Vatɗina, kay buura valam ka goboyo, kay Ma-Vatɗina kot ɗifinna valamawa, sa yiyna valamu nam porsiyawa.

⁸May hay buur ma li ɗifinna van ɗawni, nan ma ka kitat kay muliyana hiɗi gurona visiya, hiɗi nisi kaf sa cuk sligar ma pulla.

⁹Hay buur namna ɗawni, nan ma ka kitat kay nisi sa pir goy kay vun-ziyna, nisi sa hob ziyna vi mulaysina hiɗi ɦawlata, hiɗi sle ma ɗutna.

¹⁰Ma-Vatɗina di'e: Hay buur namna ɗawni, ciriyn ma li ŋolo, ma tun caway hay vun-galana vi kulufna pa, tiyn ma li ŋolo goy hay gal ma hena vi hoyok-ziyna. Boŋoloŋŋa ma ɦo gaa ŋolo.

¹¹Tiygiya, nigi sa ziyna vigi hay Maksesna, kay nisi kaf sa li filiwna vatawa goyo,[1] sum sa li lop hiɗi gurjuta kaf vatawa goyo.

¹²Hay li namna ɗawni, sum sa hay Yerusalem nan ma bilersi hiɗi kuta, nan ma ka kitat kay sum sa siri gaa jislik' lakŋa, nisi sa ka di ala Ma-Vatɗina may li va ma ŋaaɗi, may li va ma jooɗi kawna.

¹³Farayna visiya sumun ma vurumumu, ziyna visi ma ɦo gaa'a, ziyn ma nisi inimna nisi ma bur hayam loɗi, gulda-gulda ma nisi pumna, nisi ma ci vinna valam loɗi.

¹⁴Buur ma ŋolla vi Ma-Vatɗina ka goboyo, nam ka goboyo, nam hebawa, buura vi Ma-Vatɗina ka di delemu, sum sa donon ka tiy ir haw ŋolo.

¹⁵Buura namna mi buura vi ɦiyda ŋolda, buur ma sum-zlata hiɗi lasta ŋolda, buur ma ɓulakka hiɗi ɦo-gaata vi slena, buur ma jufunda ŋolda, buur ma ɗugulla hiɗi tukŋa.

¹⁶Buur ma togolomna vi duura ma buwa, ɗuwulta vi duura ma ci'e kaw, kat hoyok-ziy ŋulo ma gulmun ŋuyi talamna.

¹⁷Nan ma kal sumun vun zlata, nisi ma muɗ poy ki sum sa dukin nala, kay nisi li sulukawa kat Ma-Vatɗina; nan ma ɦoksi busuwsi goyo, ki san ko butuwn goy nala, sliwsi ma koys goyo ki tugosna nala.

¹⁸Hay buur ŋol ma ɦiyda van ɗawni, gurjuta visiya hiɗi or fi butsi goy hay ɓan loɗi; nagat kaf ma vat goyo, hiɗi kuta ta ɗek hunayta valamu, kay sum sa hay nagat kaf nam ma co kisi wilik', kay ŋalsi goyo.