Read Masana HAGGEYA 1 Bible Online

HAGGEYA 1 - Masana bible

HAGGEYA 1

¹Hay busata ma'ta vi Dariyus hay mulda, hay buurta jewta vi til ma karkiyana, Ma-Vatɗina di yoboyn tam Haggeya ma jobta ala, nam di tam Zorobabel goora vi Seyaltiyel, guverner ma hay Yudana, tam Yosuwa goora vi Yotsadak mul ŋol ma-ɗifinna ala:

²Humgi va ma Ma-Vatɗina Lawna vi vok-ma-duura di'e: Sum nisin di'e: Liyn ma in ziyna vi Ma-Vatɗin kulona bay co tuwa.

³Kuɗ kayni Ma-Vatɗina di Haggeya ma jobta kay nam ma di yoboyn tisi ala:

⁴Wulin kayn nigi laki hay ziy ma koti ŋaana, may «ziyd» zawni ɓulakay goyo kayn litige?

⁵Humgi va ma Lawna vi vok-ma-duura ka di'e: Sargi baŋalgi ŋaa tige.

⁶Nigi cuk jaf ŋolo, may nigi feɗ kiɗay ɦawa, nigi ti fuwa, may nigi may hobɗi, nigi ka ci niyo, may laata vigi may vatɗi, nigi cuki sligari, may tuwgi may gi kuɗi, wurak ma nigi fum kuɗ lop ma nigi lumna, cuk kayn hay birim ma diram coy goyo.

⁷Humgi va ma Lawna vi vok-ma-duura di'e: Sargi baŋalgi ŋaa tige,

⁸jikgi kulo kay hiɗiyna, margi guna, ingi ziyda, nan hayan ma firiya, semda van ma fi suburta, Din mi Ma-Vatɗina.

⁹Nigi varay ala nigi ma fi ŋolo. May sargi tige, nigi faawa ne' ɦawa. Nigi feɗemawa vo'o, may nan biwimawa goyo. Lawna vi vok-ma-duura di'e: Kay mige? Kay ziyda van ta ɦoy gaata, may gigekaw ka li tuwam koloyo kay kot ziyna valamu.

¹⁰Kuɗ na'ta kayni dukalawn min vulgi maɗayn loɗi, nagat min hin jaf ma ka'na vuɗ loɗi.

¹¹Nan yi koɓoroniyawa kay nagata, kay hiɗiyna, kay alkamarena, kay gulda-guldana, kay mula, nan yi koɓoroniyawa kay sle ma vuɗ kay nagat kafna, kay sumun lay, kay muuriyan lay, kay sle ma san lum hiɗi ɓalamna kaf kaw.

¹²Zorobabel goora vi Seyaltiyel, Yosuwa goora vi Yotsadak mul ŋol ma-ɗifinna, hiɗi sumun kaf hum dita vi Ma-Vatɗina Lawna visiya hiɗi dita vi Haggeya ma jobta, kuɗ lopna ma Ma-vatɗina vulumti hay ɓalamna na kayni, narta ŋolo kal hay diksiya vok Ma-vatɗina.

¹³Haggeya ma sunda vi Ma-Vatɗina di tam sumuna: Ma-Vatɗin vulan hagata kay nan digi ala: «nan ka hiɗi nigiya» din Ma-Vatɗina.

¹⁴Zorobabel goora vi Seyaltiyel, guverner ma hay Yudana, hiɗi Yosuwa goora vi Yotsadak mul ŋol ma-ɗifinna hiɗi sum segen kaf Ma-Vatɗina zliy ŋusta visi kulo'o. nisi co'o, nisi tun caw li lop hay ziyna vi Ma-Vatɗina, Lawna vi vok-ma-duura visiya.

¹⁵Kayni hay buurta dok-ma' yam fiɗita vi til ma karkiyana, busata ma'ta vi mulla Dariyus.