Read Masana HAGGEYA 2 Bible Online

HAGGEYA 2 - Masana bible

HAGGEYA 2

¹Hay buurta dok-ma' yam kepta vi til ma siɗiyana, Ma-Vatɗin hin yoboyn hay vun Haggeya sa ma jobta, ka dum ala:

²naŋ ma di tam Zorobabel goora vi Seyaltiyel, guverner ma hay Yudana, hiɗi Yosuwa goora vi Yotsadak, mul ŋol ma-ɗifinna, hiɗi sum segen kaf, naŋ ma disi ala:

³Ziyd zawni, sa ma jargi tani wi jifiyta va' ta jewta mi gige? Nigi sara' wulin kayn na' litige? Wulin nigi sara' zawn na' muɗi kirgi va ma waa'a ɗisu?

⁴Wulin kayni laŋ ɗeŋga Zorobabel, din mi Ma-Vatɗina. Laŋ ɗeŋga, Yosuwa, goora vi Yotsadak, mul ŋol ma-ɗifinna. Ligi ɗeŋga, nigi sumuna vi nagat noŋ kaf, din mi Ma-Vatɗina. Ligi lopo, kay nan ka hiɗi nigiya. Din mi Ma-vatɗina vi vok-ma-duura.

⁵Bonot ta nan juna' hiɗi nigita nan ka ŋoma' dok-doko. Hay li ma nigi kali goy hay Egipte pa, Ŋusta van ka jargiya, ligi narɗi!

⁶Kay Ma-vatɗina vi vok-ma-duura di ala: Hini ŋolɗi ɦawa, nan ma geɗ dukalawna hiɗi nagata, niy-lum ma ŋolla hiɗi yam-liyn ma soy goyna.

⁷Nan ma geɗ jaf-sumun kaf, sle ŋaa ma hay nagat kafna ma fi tuwam tani, ziyd zawn nan ma hoba' hiɗi gajijita, Din mi Ma-Vatɗina vi vok-ma-duura.

⁸Gurjuta na' vanu, ora nam vanu, din mi Lawna vi vok-ma-duura.

⁹Ziy ta wulinta ɗawni, gajijita va' ma li ŋol suw ta jewta, din mi Lawna vi vok-ma-duura. Toyt nan vula' goy ɗawn hay liy namna tan pa. Din mi Ma-Vatɗina vi vok-ma-duura.

¹⁰Hay buurta dok-ma' yam fiɗita vi til ma zleeŋena vi busata ma'ta vi Dariyus, Lawna ɗek yoboyn goy kir Haggeya sa ma Jobta.

¹¹Ma-vatɗina vok-ma-duura ka dum ala: Jobaŋ tam muliyan-sa-ɗifinna kay nisi sar lawt kayn tige.

¹²La san ziy sliw ma vuli goy tam Ma-Vatɗina hay vun-sligara, may la vun-sligar namna jo tam funa, tin ma koti kotna, vinna, hiɗi mula, lebo va mara ma ti'e, sle namna lakŋ as muɗum peldet lo su? Muliyan-sa-ɗifinna hot dita: A'a.

¹³Haggeya di lo, la sa muɗi liwisi kay nam jo ŋumna, may la nam jo sle namna lakŋawa, sle namna lakŋi as muɗ liwis su? Muliyan-sa-ɗifinna hot dita: Awa, nam muɗi liwisi.

¹⁴Wulin kayn Haggeya sli dita di'e: Sum nisin kayni nisi nala kaw, jaf nisin kayni vok iranu kaw nisi ki kayn nala. Din mi Ma-Vatɗina. Lopna ma nisi lumna kaw nam nala. Slen ma nisi vulum tanu kaf nam liwisi.

¹⁵Slen ma min li'e, tun cawis hay buur ma wulin pa lakŋi, vargi kalam ŋali, jew a jak hiɗiyn kulo kay tuwamu hay Tempella vi Ma-Vatɗina.

¹⁶La sa coowa kay ŋaɓ tasa dok-ma', nam ma fi doogo ɦawa. La sa coowa kay hob doway-firin dok-vasl, nam ma fi ɗawn dok-ma'.

¹⁷Nan gatgiyawa hiɗi wana vigi ma so goyna, hiɗi fiyumna hiɗi mogoyna. Lop ma nigi lum hiɗi ɓigin kaf, nan ɓulakamawa goyo. Hiɗi kayn kaf nigi min hotay tanɗi, Din mi Ma-Vatɗina.

¹⁸Tungi ŋalgi kay va ma li jargiya, hay buurta dok-ma' yam fiɗita vi til ma zleeŋena, tun caw hay buur ma Tempella vi Ma-Vatɗin inna pa, jiɓergi hiɗi ŋal tige.

¹⁹Wulini jaf mara ka hay feera lo su? La mi gulda-guldana, la mi gu-gumna, la mi grenadinna, la mi gu-olive kaw may vuɗ noŋɗi. May tun cawis hay buur na'ta pa ɗawni, nan ma was bolda van goy kay sumuna.

²⁰Ma-Vatɗina di yoboyn tam Haggeya sem ma ma'na, hay buurta dok-ma' yam fiɗita vi tilla, nam dumu:

²¹Naŋ ma di tam Zorobabel, guverner ma hay Yudana ala: Nan min geɗ dukalawna hiɗi nagata,

²²nan min ɦo zlamda-mulda gaa'a, donota vi mulda ŋulota, hiɗi jaf ma ŋulona nan min ɦom gaa'a. Keke-ma-duura hiɗi sum sa ɓe hayamna, nan min vatam goyo; kulumayna hiɗi sum sa ɓe kalamna ma fi cita-goyta, nisi ma cal tuwsi jar-tuwsi hiɗi kew-gaferaŋa.

²³Ma-Vatɗina vi vok-ma-duura di'e: Hay buur namna ɗawni, nan min slaŋu, naŋ Zorobabel goora vi Seyaltiyel, naŋ ma sunda vanu: Din mi Ma-Vatɗina. Naŋ ma muɗ mi tampoŋŋa vanu.[1] Nan vilekaŋawa. Din mi Lawna vi vok-ma-duura.