Read Masana ZAKARIYA 1 Bible Online

ZAKARIYA 1 - Masana bible

ZAKARIYA 1

¹Hay til ma glafandina vi busata ma'ta vi mulla Dariyus, Ma-Vatɗina di yoboyn tam Zakariya goora vi Berekiya goor-ŋolona vi Iddo, Ma-Vatɗin ka dum ala:

²Nanu dikan bulak ŋolo kat sumaygiya.

³Naŋ ma di tisi ala: Ma-Vatɗina vi vok-ma-duura ka di ala: Hotgiyay tanu, -- din mi Ma-Vatɗina vi vok-ma-duura -- nan ma hotis kirgi kaw, din mi Ma-Vatɗina vi vok-ma-duura.

⁴Nigi ma li tuwgi ki sumaygi naɗi, nisiya, sa jobta sa jewn kus yoboyn tisi ala: «Humgi va ma Ma-Vatɗina vi vok-ma-duura di'e, hotgiyay bugolgiya tam hagata vigi ta joota pa, hingi law ta joota vigi goyo». May nisi min humɗi, nisi min tun ŋalda visi kanɗi. Din mi Ma-Vatɗina.

⁵Wulini sumaygi ka arige? Nigi var ala sa jobta vigi ma fot kulo su?

⁶May yoboyna vanu hiɗi gatta ta nan vula' hay vun sa sunda vanu sa jobta, yoboy namna may co tam sumaygiɗi su? Nisi muɗ varta visiya, nisi di'e: Lawna vi vok-ma-duura gatayawa, nam vilek kay lay joo'o kayn kuɗ hagat joo'o ta nay sla'ta hiɗi lop ma joona vaya.

⁷Hay buurta dok-ma' yam fiɗita vi til ma doogo yam kepna, ma yum ala tilla vi Sebat*, kayn ti busata ma'ta vi mulla Dariyus, Lawna di yoboyn tam Zakariya ma jobta, goora vi Berekiya, goor-ŋolona vi Iddo, nam di'e:

⁸Hay henjeta va vul tuwam kiranu, Duwgiya, san kep ka ɓey kay kulum ma bufna, nam ka coli jar warana[1] gaa hay liyn ma beɗna, kulumay ma bufna hiɗi ma slawna hiɗi ma haɓayna ay kaw.

⁹Nan ka job ala mulanna, nisi kayn si sarige? Sunda-wuralawna ma ka kus yoboyn hiɗi nanu di tam ala: Nan ma ɗekaŋ kay sum nisina.

¹⁰San ma coli jar warana sli ditiya di'e: Lakŋi si sum sa Ma-Vatɗin cuksiyay kay ŋuy nagatna.

¹¹Nisi di tam sunda-wuralawna sa ka lakay jar warana ala: Numa ŋuy yam nagatiyawa kafe: Duwgiya, nagat ka tuni kiliŋ hay sle'ta.

¹²Bugolda sunda-wuralawna sli ditiya di'e: Ma-Vatɗina vi vok-ma-duura, wulin kayn busat laawa dok-siɗiya ma naŋ ɗek ɦiyda vaŋ goy tam Yerusalem hiɗi Yuda, busat ta naŋ min lisi slugot haya'ɗita hini gaage lo?

¹³Ma-Vatɗin hot dit tanu hiɗi della vi sunda-wuralawna ma ka kus yoboyn hiɗi nanu, nam dan yoboyn ma ŋaana, ma vul teŋ-irta.

¹⁴Sunda-wuralawna ma ka kus yoboy hiɗi nanu di tanu, siwelaŋu, daŋis ala: Humgi va ma Ma-Vatɗina vi vok-ma-duura: Nan hobi hiɗi hunayt ŋolo kay Yerusalem hiɗi Siyon,

¹⁵Nan muɗi ɦiy ŋolo kat jaf-sum sa subur tuwsina, kay jewe nan ay kaay ɦiy ŋol noŋɗi, may wulini nisi jor jootawa.

¹⁶Kay na'ta humgi va ma Ma-Vatɗina ka di'e, nan min hotay hay Yerusalem hiɗi slugota, ziyna van ma hot in haya' lo, zigewn ma giys tam Yerusalem lo, Din ma Ma-Vatɗina vi vok-ma-duura.

¹⁷Siwelaŋis lo ala: Humgi va ma Ma-Vatɗina vi vok-ma-duura ka di'e, hoyok-ziyna vanu ma hot fi farayn ŋol lo; Ma-Vatɗin ma teŋ ir Siyon sem mara lo, nam ma hot vilek Yerusalem sem mara lo.