Read Masana ZAKARIYA 12 Bible Online

ZAKARIYA 12 - Masana bible

ZAKARIYA 12

¹Yoboyna vi Ma-Vatɗina ma nam di'e kay Israyel: Humgi va ma Ma-Vatɗin di'e: Namu mi ma ɓet dukalawn kulo'o, ma tun dir nagat gaa'a, ma kot sukka vi san kalaf hayamu kaw.

²Duwgiya nan min muɗ Yerusalem ki dut ta ci dolayn haya'a, ta hiwir sumun goyo nala, sum sa ŋuyi gala'na kaf ma ɦoya, hay li ma nisi ŋuy Yerusalemawana, Yuda kaw ma hiwira.

³Awa, hay buur namna ɗawni, Yerusalem nan ma muɗa' ki hiɗiy ma neke, ma sumun kaf kaw as a geɗemɗina nala; nisi sa min geɗ hiɗiy namna ma fi makka ŋolo; sumun hay nagat kuɗulu ma tok tuwsi kay dura'a.

⁴Ma-Vatɗin di'e: Hay buur namna ɗawni, nan min muɗ kulumayna visi kaf nari, sum sa ɓe kalamna nan ma muɗsi tiŋ-tiŋi, may nan ma cuk iran kay gurona vi Israyel, kay nan min duk ir kulumayna vi sum segen goy kafe.

⁵Muliyana vi Yuda ma di hay diksi kalaf ala: Sum sa ziyna visi kulo hay Yerusalemna nisi mi donota vaya, hay sem Ma-Vatɗina vi vok-ma-duura Lawna visiya.

⁶Hay buur namna ɗawni, sa ŋulona vi Yuda nan ma muɗsi ki kuta-ŋalta, ta vun gun cuki haya'a nala, ki vun-kuta ta ka doya kay ŋal us hiyomna nala, nisi ma ŋal sum sa ŋuyi tisi gal ma jufna, hiɗi gal ma gulla goy kafe, Yerusalem hin ɗawn hay liya' ma Yerusalemna dok-doko.

⁷Ma-Vatɗina ma suɗ guɗukŋa vi Yuda goy jewe, kay a gajijita vi ziyna vi David, hiɗi gajijita vi sum sa hay Yerusalemna ma suw kay Yudaɗi.

⁸Hay buur namna ɗawni, Ma-Vatɗin ma ŋom sum sa hay Yerusalemna, sa jarsi maŋayna ma muɗ dono ki David nala, jafna vi David ma muɗ kirsi ki Lawn nala, ki sunda-wuralawna ma ka tuni voksi nala.

⁹Hay buur namna ɗawni, nan ma gar kay vat jaf-sumuna sa min co dur hiɗi Yerusalemna kaf goyo.

¹⁰Hay na'ta nan ma gi ŋusta van ta slugota hiɗi ta giɗel-della goy hay ziyna vi David, hiɗi sum sa hay Yerusalem kafe. Nala nisi ma cuk irsi kalamu, kir nam ma nisi jikimna.[7] Nisi ma tiy kalamu, ki san tiy kay goora valam ma kalam tuɗoŋ kepna nala, nisi ma tiy dono ŋolo, ki san tiy kay goora valam ma vuɗi jewn nala.

¹¹Hay buur namna ɗawni, tiyn ma li ŋolo hay Yerusalem, ki hay buur ma sumun tiy Hadadrimon* hay liy ma beɗna vi Megiddo nala.

¹²Sum sa hay nagat kaf ma tiya, ziyn ma poŋ goy valamu valamu kay tiya: Sum sa hay ziyna vi Davidna ma poŋ goy visiya; boyn kaw ma poŋ goy visi lay; sum sa hay ziyna vi Natan ma poŋ goy visiya, boyn kaw ma poŋ goy visi lay,

¹³sum sa hay ziyna vi Levi ma poŋ goy visiya; boyn kaw ma poŋ goy visi lay, sum sa hay ziyna vi Simey ma poŋ goy visiya, boyn kaw ma poŋ goy visi lay.

¹⁴Ziy hen ma hinin kaf ma poŋ goyo, boyn kaw ma poŋ goy visi lay.