Read Masana ZAKARIYA 2 Bible Online

ZAKARIYA 2 - Masana bible

ZAKARIYA 2

¹Nan poŋ iran kulo'o, ɗuw na kayni, iran wi miyokŋ fiɗi.

²Nan ka di tam sunda-wuralawna ma ka kus yoboyn hiɗi nanu ala: Miyokŋ lakŋ ɗek mige lo? Sunda di tanu: Lakŋi mi miyok ma mer hoyok-ziyn Yuda hiɗi Israyel hiɗi Yerusalem goyna.

³Ma-Vatɗin ɗekan sum sa zla cafn kiran fiɗi'.

⁴Nan ka job ala nisi lakŋ co lum meloge? Nam ka dan ala lakŋ mi miyok ma mer hoyok-ziyn Yuda goyna. Sa may as a col kulo vokom noŋɗi; may sa zla cafn lakŋi ka'a kay muɗ sumun nari, kay sum sa yaw miyokŋa visi kulo kat nagat Yudana, nam min cuksi goy gine'e, mersi goy kaw.

⁵Nan poŋ iran kulo'o, nan ɗuw na kayni, iran wi san kep hiɗi zigew ma ŋaɓta ka hay ɓalamu.

⁶Nan di'e: Naŋ tuɗ arige? Nam hotan dita: Nan min tuɗ ŋaɓ Yerusalem, kay ɗuw fiyokŋa va'a hiɗi buɗukŋa va'a.

⁷Duw na kayni, sunda ma ka law hiɗi nanu tuɗis vokomu, sunda mara'a co ŋaf hiɗi namu.

⁸Sunda-wuralawna di tam hena: Fokaŋis jaŋi, sa ma joriyon zawn naŋ ma dum ala, hoyok-ziyn Yerusalem vunam ma mal goyo, kay sumuna hiɗi farayna ma dak hayam ŋolo;

⁹Ma-Vatɗina di'e: Nan kay tuwan ma muɗ ɗawn ti kuta ta ŋuyi ta'a hay baŋal gulmunna, nan ma ɗek gajijita van goy jarsiya.

¹⁰Ma-Vatɗin di'e: Mungi jaŋi, hingi nagat ta gal gaat goyo, kay nan mergiyawa goy hay gef-nagat fiɗi pete. Din mi Ma-Vatɗina.

¹¹Piragu Siyon, naku ta ka musi goy vi goot-cata vi Babilon.

¹²Kay humgi va ma Ma-Vatɗina vi vok-ma-duura di'e: Bugol kayni gajijita ma co'o, nam ganiyawa jar jaf-sum sa vurum slena vigina, la sa ma min tun ɓalam tigiya, nam garanti kayn nanu.

¹³Humgiya, nan min sli ɓan kulo'o katsiya, nisi ma fi lasta hay ɓam sum sa nisi lisi gorvo jewna, nigi ma wi ala nanu gan ay mi Ma-Vatɗina vi vok-ma-duura.

¹⁴Siwelag kulo ŋolo hiɗi firita, nak goota vi Siyon, kay ɗuwagu nan ka co'o kay li ziy hayagu.

¹⁵Hay buur namna ɗawni, jaf-sumun ŋolo ma jun tuwsi tam Ma-Vatɗina; nisi kaf ma muɗ goy sumuna vanu, nan ma li ziy jargiya, nigi ma wi ala gan ay jargi kayni, mi Ma-Vatɗina vi vok-ma-duura.

¹⁶Sumuna vi Yuda ma muɗ goy ir vi Ma-Vatɗina, nisi ma lak hay nagata valam ta peldetta, nam ma hot vilek Yerusalem lo.

¹⁷Nigi sum sa hay nagat kaf, lakgi kiliŋ vok ir Ma-Vatɗina, kay nam zliyawa kulo'o, kaliyawa goy hay liyna valam ma peldetna pa.[2]