Read Masana ZAKARIYA 3 Bible Online

ZAKARIYA 3 - Masana bible

ZAKARIYA 3

¹Nam ɗekan kay Yosuwa mul ŋol ma-ɗifinna, nam ka coli kulo vok sunda vi Ma-Vatɗina, Satan ka coli hay galam ma jufn zaw kay pi lawt kalamu.

²Sunda-wuralawna di tam Satan: Ma-Vatɗina ma gataŋu Satan, Ma-Vatɗina ma gataŋu, kay namu mi ma vilek Yerusalem goyna, Yerusalem kayni mi vun gu ma slumi goy hay kut pana ɗisu?

³Hay na'ta Yosuwa ay cuki hiɗi sligar ma gesayna, nam ka coli kulo'o vok sunda-wuralawna.

⁴Sunda-wuralawna sli ditiya, di tam sa ka lakay vokomna: Sligar ma gesay ma cuki talamna nigi ma fokomti goyo. Bugolda nam di tam Yosuwa: Ɗuwaŋu Yosuwa, nan yaw jiw-zlata vaŋawa goyo, nan cukaŋ sligar ma yuldetawa taŋu.

⁵Nan ka di'e: Ɗutum katamul ma haɓ tal-tal' kalamu. Nisi ɗutum katamul ma haɓ tal-tal' kalamu, cukum sligar ma haɓ talam may. Hay na'ta sunda-wuralawna ka coli zaw.

⁶Sunda-wuralawna sli ditiya di tam Yosuwa:

⁷Humaŋ va ma Ma-Vatɗina vi vok-ma-duura ka di'e: La naŋ tuɗ hay hagata vanu, la naŋ hum kuɗ gatta van kaw, naŋ ma ka kitat kay ziyna vanu, naŋ ma ŋom wur-daŋŋa vanu, sum sa ka tani nan ma malaŋ hagat kay naŋ kal jarsiya may.

⁸Wulin kayn humaŋu, Yosuwa naŋ mul ŋol ma-ɗifinna, naŋ hiɗi nuriyoŋ sa ka lakay vokaŋ tani, kay nisi lakŋi nan ma li ɗekka hiɗi nisiya. Humgiya, nan min mar sa ma sunda vanu, namu mi vun-jafna.

⁹Kay humgiya, kay hiɗiyn ma nan jakam vok Yosuwan zawni, ira siɗiya ka zlari tam hiɗiy na'ta ta kepta, nan kay tuwanu min ɗo va ma kuɗ hayanna kay hiɗiy na'ta, jiw-zlata vi gurona vi nagata nan min yawa' goyo hay buur kep ɦawa, din mi Ma-Vatɗina vi vok-ma-duura.

¹⁰Ma-Vatɗin di'e: Hay buur namna ɗawni nigi ma yi tuwgi jar-tuwgiya gaa kuɗ gulda-guldana hiɗi gu-gumna.