Read Masana ZAKARIYA 5 Bible Online

ZAKARIYA 5 - Masana bible

ZAKARIYA 5

¹Nan poŋ iran kulo mara lo, nan ɗuw na kayni, iran wi ɗerwel ma ɗutina kep ka dol kulo'o hay simeɗna.

²Nam di tanu, iraŋ wum mige? Nan ka hotom dita: Iran wi ɗerwel ma ɗuti kep ka dol kulo hay simeɗna, fiyokom ir goldoŋ dok-ma', buɗukam ir goldoŋ doogo.

³Nam hot di tanu: Kayni mi be'da ma min mer goy hay nagat kafna, kuɗ va ma ɗoy hay ɗerwelda kayni, sum sa kuliyan kaf ma digiɗis goy tani pa, sum sa ŋulda kaf ma digiɗis goyo.

⁴Ma-Vatɗin vi vok-ma-duura di'e: Ɗerwel namna nan gumi goy kayni kay nam kal hay ziyna vi sum sa kuliyana hiɗi sum sa yi va kisi hiɗi sinda hay semda vanu. Nan min ala ɗerwel namna tun ziyna valam hay liy namna, kay nam ma ŋal guna hiɗi hiɗiyn goyo.

⁵Sunda-wuralawn ma ka kus yoboyn hiɗi nanu kalis vokomu, nam di tanu: Poŋaŋ iraŋ kulo'o ɗuwaŋ va ma min kali goyo.

⁶Nan ka hotom dita: Mi mige? Nam di'e: Kalay goy ɗawn ti tikisita. Nam hot di tan lo: Kayni mi jiw-zlata vi sum sa hay nagat kafna.

⁷Duw na kayni, va ma nek ma tuni vun tikisita poŋ goyo, cat ka musi kalaf hayam dam'.

⁸Nam di'e: Kayni ɗek jiw-zlata, nam zuta'ays kalaf hay tikisita, hot duka' vuna'is kulo'o.

⁹Nan poŋ iran kulo lo, ɗuw na kayni, boyn ma' co goy kiranu. Hay gilaŋatsiya simeɗn ka biw goyo, gilaŋsi ki gilaŋat lay-joriyon nala, tikisi na'ta nisi sla' kulo jar dukalawna hiɗi nagata.

¹⁰Sunda-wuralawna ma ka kus yoboy hiɗi nanu, nan jobom ala: Tikisita nisi nara' kayn arige?

¹¹Nam hot di tanu: Nisi nara' kayni kay ina' ziy kulo hay duk-nagata vi Sineyar;[3] hay li ma liyna va' asawana, nisi ma tuna' hay liya'na may.