Read Masana ZAKARIYA 6 Bible Online

ZAKARIYA 6 - Masana bible

ZAKARIYA 6

¹Nan poŋ iran kulo mara lo, nan ɗuw na kayni, iran wi keke-ma-duur fiɗi kali goy jar hiɗiyn ma' pa, hiɗiy namna mi kawaya.

²Keke ma jewna jaŋam mi kulumay ma bufu, keke ma ma'na jaŋam mi kulumay ma wura'a.

³Keke ma ɦidina jaŋam mi kulumay ma haɓi, keke ma fiɗina jaŋam mi kulumay ma tuwam ɗoya, slaw lay.

⁴Nan sli ditiya di tam sunda ma ka kus yoboy hiɗi nan ala: Mulanna, nam kayni mi mige?

⁵Sunda-wuralawna hot di tanu: Nam kayni, mi simeɗma fiɗi hay dukalawna, nam ay lakay hay vok Bum-Sumuna ma di law nagat kafna, wulini nam kali goyo.

⁶Kulumay ma wurana ma ka jaŋ keke ma kepna ka tuɗ hay nagat ta gal gaat zaw, ma haɓayna ka jaŋ bugolomu; ma tuwam ɗoyna ka jaŋ hay gal nagat ta kayamta.

⁷Ma slawna kali goyo, nam job hagata kay nam min tuɗ ŋuy nagat kafe. Sunda-wuralawna di talamu: Tuɗgiya, ŋuygi yam nagata. Nisi kaliya, ŋuy yam nagata may.

⁸Nam yanu danu: Humaŋu, kulumayn ma ka tuɗ hay nagat ta gaata min gi ɦiyda vanu kay sum sa li ziy hay nagat ta gal gaata.

⁹Ma-Vatɗina di yoboyn tan ala:

¹⁰Naŋ ma vi vulda hay ɓam sum sa ay goy gorvo pana: Naŋ ma va' hay ɓam Helday, Tobiya hiɗi Yedaya, hay buur namna ɗawni, naŋ kay tuwaŋu ma tuɗ hay ziyna vi Yosiyas goora vi Sofoniya, kayn mi liyn ma nisi ka haya hay li ma nisi hotay hay Babilon pa.

¹¹Naŋ ma yaw gurjuta hiɗi ora, naŋ ma kot bogorayn hiɗi na'a, naŋ ma tuna' kay Yosuwa goora vi Yotsadak, mul ŋol ma-ɗifinna.

¹²Naŋ ma di talamu: Humaŋ va ma Ma-Vatɗina vi vok-ma-duura di'e: Sa ka kepe semda valamu vun-jafna, jaf namna ma day kulo'o, nam ma in Tempella vi Ma-Vatɗin kulo'o.

¹³Ma hot in liyn ma ɗifinna vi Ma-Vatɗin kulo ɗawn mi namu, ma cuk sligara vi mulda ɗawn mi namu. Nam ma mus kay zlamda-mulda, mul-ma-ɗifin mara ma mus galamu, vunsi ma li ŋray ŋaa'a ŋolo.

¹⁴Bogorayna ma hin ɗawn vi Helem,[4] Tobiya hiɗi Yedaya, vi Hen goora vi Sofoniya kaw. Nam ma hin ɗawn mi va ma gi humda hay Tempella vi Ma-Vatɗina.

¹⁵Nisi sa kali goy gine'e ma co li lop hay Tempella vi Ma-Vatɗina; nigi ma wi ala gan ay tigi kayn mi Ma-Vatɗina vi vok-ma-duura. La nigi hum della vi Ma-Vatɗina Lawna vigiya, van kayni ma li'e.