Read Masana ZAKARIYA 8 Bible Online

ZAKARIYA 8 - Masana bible

ZAKARIYA 8

¹Ma-Vatɗin vi vok-ma-duura vul dit tan ala:

²Humgi va ma Ma-Vatɗina vi vok-ma-duura ka di'e: Nan muɗi hunay ŋolo kat Siyon, dikan muɗi ɦiy ŋolo kay Siyon.

³Nala Ma-Vatɗina di'e: Nan min hot hay Siyon. Nan min cuk ziyna van kulo jar sum sa hay Yerusalem. Muɗ ɗawni Yerusalem ya' ala hoyok-ziyna vi sum sa gasina, hiɗiyta vi Ma-Vatɗina vi vok-ma-duura, hiɗiyta ta peldetta.

⁴Humgi va ma Ma-Vatɗina vi vok-ma-duura di'e: Sum sa wulsi vatayna, jufayn hiɗi boyna ma hot lak goy hay haga ŋulona vi Yerusalem lo, gigekaw hiɗi zugul ɓalam kay kay', kay wulsi ma vatay ŋolla.

⁵Joriyona hiɗi guro-boyna ma tok tuwsi ŋolo hay liyn ma liwna vi hoyok-ziyna kay liwa.

⁶Ma-Vatɗina vi vok-ma-duura di'e: La kayni lop ŋolo kay sum sa hay hoyok-ziyn tani, nam kan nan lop ŋol lay su? Din mi Ma-Vatɗina vi vok-ma-duura.

⁷Ma-Vatɗina vi vok-ma-duura di'e: Sumuna vanu sa hay nagat ta gal kuɗuwta hiɗi sa hay nagat ta gal vulatita kaf nan min suɗsi goyo.

⁸Nan min hotsiyaya, nisi ma lak kulo hay Yerusalem, nisi ma yisi ala sumuna vanu, nanu ma yan ala Lawna visiya hiɗi dikga gasita hiɗi ɗigerta.

⁹Humgi va ma Ma-Vatɗina vi vok-ma-duura di'e: Ligi tuwgi ɗeŋe, nigi sa vaydi humi yoboyna hay vun sa jobta-Lawna sa vul tuwsi kirgi hay liyn ma jewna, hay liyn ma sem ziyda vi Ma-Vatɗina vi vok-ma-duura tun gaana, hay li ma Tempella tun caw in kulona.

¹⁰Kay jew buur namna kayni, san may fi wurak kuɗ lop ma nam lumnaɗi, farayn kaw may fi wurak kuɗ lop ma nam lumnaɗi. Sum sa poy jar-tuwsina kaw sle'ta may kisiɗi kay sum sa gawta, kay nan gi ir sumun kat tuwsi kay li tuwsi joo'o.

¹¹Ma-Vatɗin vi vok-ma-duura di'e: Wulin kayni dir sum nisin ma hinin tani, nan min lisi ki nan li jew nala loɗi.

¹²Wulin ɗawni sle ma sinen ma li ŋaa'a ŋolo, gulda-guldan ma vuɗ hay hagamu, jafn ma vuɗ hay nagata, dukalawn ma gi maɗayn gaa kay nagata, dir sumun ma hinin lakŋi nan ma sleɗsi haysi hiɗi sle ma gaa kay nagatna.

¹³Ki nigi jafna vi Yuda hiɗi jafna vi Israyel ay jewe mi va ma beɗayna jar jaf-sumun nala, wulin ɗawni nan min suɗgiya, nan ma muɗgi mi va ma bolda giy kalamna; ligi narɗi, ligi tuwgi ɗeŋ suwa.

¹⁴Kay Ma-Vatɗina vi vok-ma-duura ka di ala: Jewe hay li ma sumaygi ɓulakan dikanu, nan vari kay ligi joo'o, nan may muɗ varta van noŋɗi. Din mi Ma-Vatɗina vi vok-ma-duura.

¹⁵Wulin kayn nan muɗ varta vanawa, dikan coliya kay li ŋaat tam Yerusalem hiɗi ziyna vi Yuda hay buur ma wulin lakŋi. Ligi narɗi.

¹⁶Kayni mi va ma nigi ma li'e: Gigekaw ma di gasit mi sugolomna; gigekaw ma ka kitat vun ziyna valam hiɗi gasita kay toyt ma li jargiya;

¹⁷Hin sa var law ma joo'o kat sugolomɗi, yi va kigi kay sindaɗi, kay kaf zawni mi sle ma nan ka gaw hiɗi namna, din mi Ma-Vatɗina.

¹⁸Ma-Vatɗina di yoboyn tan ala:

¹⁹Humaŋ va ma Ma-Vatɗin vi vok-ma-duura ka di'e: Laata ta hay til ma fiɗina, ta hay til ma vaslna, ta hay til ma siɗiyana hiɗi ta hay til ma doogona ma muɗ ɗawni mi buur ma yuldeta hiɗi firita ŋolda hiɗi buur ma gurona vi Yuda pir kulo'o. May mingi gasita hiɗi sle'ta.

²⁰Kayni mi va ma Ma-Vatɗina vi vok-ma-duura di'e: Jaf-sumun sa ka lakay hay hoyok-ziyn mara'a mara'a ŋolo ma co'o.

²¹Sum sa hay hoyok-ziyn hena ma tuɗ hay hena; nisi ma di'e: Tuɗay garay sem Ma-Vatɗina vi vok-ma-duura, yayt selemu! Numa kaw min tuɗis lay!

²²Jaf-sum sa dono ŋolo, hiɗi sumun hay nagat ŋolo ma co gar Ma-Vatɗina vi vok-ma-duura hay Yerusalem, ma gar kay yum selemu kaw.

²³Ki kayn nala Ma-Vatɗina vi vok-ma-duura di'e: Hay buur namna ɗawni, sumun doogo sa may kuɗ jaf mara'a mara'a ma jab tuwsi kay sa ma Yudiyan kep, ma mok vun sligara valamu, nisi ma di'e: Numa min tapis kuɗaŋu, kay numa humi ala Lawn ka hiɗi naŋu.