Read Masana ZAKARIYA 9 Bible Online

ZAKARIYA 9 - Masana bible

ZAKARIYA 9

¹Kayni mi yoboyn ma Ma-Vatɗin di'e kay nagata vi Hadrak: Yoboyna valam jik gaa kay Damas, kay Ma-Vatɗina iram ka cuki kay sumuna, ki iram ka cuki kay sa Israyel nala kaw.

²Yoboyna valamu jik gaa hay Hamat, hay jar-nagata vi Damas, sum sa hay Tirus hiɗi Sidon, hiɗi yalda visi pet kaw. nam jik gaa jarsiya.

³Sum sa hay Tirus in gulmun ma dononawa kulo katsiya, nisi tok gurjunawa ki ŋeslna nala, nisi mol orawa yam tuwamu ki naga ma hay hagan nala.

⁴Humgiya, Bum-Sumuna ma hot yawam kisiya, nam ma zut donota visi goloŋ hay niy-lumna ma ŋolla, kut ma ŋala' goyo.

⁵Hay li ma sum sa Askalon ma wi kayni, tuwsi ma cuk nari; sum sa hay Gaza kaw, narta-ŋolda ma nig gaa kisiya. Sum sa hay Ekron kaw, kay va ma nisi vi ɓisi talam may loɗi, mul ma hin hay Gaza loɗi, sa ma li ziy hay Askalon loɗi.

⁶Sa ma pul ma li ziy hay Asdod, subur-tuwta vi sum sa Filistina nan ma vata' goyo.

⁷Nan ma hulotsi busuwn goy hay vunsiya, nan ma hulotsi sliw ma liwisna goy kuɗ gaŋsiya. Nisi kaw ma lak ir vi Ma-Vatɗina vaya, nisi ma lak ki sa ŋulon nala hay Yuda, sum sa hay Ekron muɗ ɗawni ki sum sa Yebusiyena nala.[5]

⁸Nan ma tun vokŋa vanu goboy kat ziyna vanu, kay hin sojen co talam goboyɗi, kay sum sa tuɗ jar-tuwsin co talam goboyɗi, kay sa ma min li joo'o ma jik kulo talam goboyɗi, kay wulini iran cukawa kisi yo.

⁹Firiyagu, siwelag kulo ŋolo goota vi Siyon, gag nul ma firina, nak goota vi Yerusalem, kay ɗuwagu, mulla vag ka tuɗi katagu, nam sa ma ɗigere, namu mi mul kolda kaw, nam ŋal ŋolo, musi kay kurota, musi kay kuro ma goora, goora vi kuro tan-cata.[6]

¹⁰Keke-ma-duura vi gurona vi Efrayim nam ma tom goyo, kulumay ma hay Yerusalemna kaw, ɓaraw ma duura ma muɗ may loɗi, nam ma vul labara vi toyta tam sumuna, mulda valam ma tun caw ay hay vun niy-lum ma hena, ta-ta goy vun niy-lum hen goŋ', tun caw ay hay vun niy-lumni zaw, ta-ta hay vun nagat ma dabayna.

¹¹May naŋu, kuɗ bonota ta nay juna' hiɗi busuwna, sa daŋgayna vaŋu nan ma yawsi goy hay zul ma wiŋŋa ma niyn may hay noŋɗina.

¹²Nigi sa gorvo sa hobawa hiɗi cubta-sle'ta, hotgi kulo hay hoyok-ziyna vigiya, kay gulmun gaawa talamu. Nan min di tigi vaydi ala, nan min vulgi sem ma' lo.

¹³Kay nan kot Yuda ki diŋ-diŋ ɓarawta van nala, nan kot Efrayim ki ɓarawta nala may. Siyon, nan ma yaw sumuna vag kulo'o kat gurona vi Yavan*, nan ma muɗgi ki kew-gaferaŋa vi sa ma wi duur nala.

¹⁴Ma-Vatɗina ma vul tuwam kulo kisiya, ɓarawta valam ma riŋ goyo ki wileta nala, Bum-Sumuna Ma-Vatɗina ma buw togolomna, nam ma tun vok birina ma may hay gal kayam pana.

¹⁵Ma-Vatɗina vi vok-ma-duura ma ŋomsiya, nisi ma ti sumun ɓuraŋi, nisi ma kol kay hiɗiy ma hay tiwlekŋa, sum segen ma ci busuwsiya ki nisi ɦoyay ki dolayn nala, haysi ma hob cep-cep' ki dutta nala, ki miyokŋa vi giwin-ma-ɗifinna nala.

¹⁶Hay buur namna ɗawni, Ma-Vatɗina Lawna visi ma suɗsi goyo, ki sa ma ŋom farayn nala, kay nisiya mi bogoray hiɗiyna, ma ka wile'e hay nagata.

¹⁷Awa, nisi muɗi faray ŋolo natige, nisi muɗi jifiy ŋolo natige. Guro-joriyon ma wul hiɗi alkamarena, guro-boyn ma wul hiɗi gulda-guldana ma jibetna.