Read Masana MATEWUS 12 Bible Online

MATEWUS 12 - Masana bible

MATEWUS 12

¹Hay li namna Yesu jik hay sinena vi alkamarena hay buura vi sabatna. Sa hatayna valamu mayt tun caw cisiya, nisi kus yam wana kay mutumu.

²Hay li ma sa Farisen* wi kayni, nisi dumu: Saraŋ sa hatayna vaŋ tige, va ma telay kay lum hay buura vi sabatnɗina nisi lumu.

³May nam disiya: Nigi bay ɗuw hay ɗota kay va ma David lumna su? Hay li ma mayt tun caw cumu, nam hiɗi sa kuɗumna kaw,

⁴nisi cuk kalaf hay ziyda vi Lawna, nisi ti fun ma zlaray kay tuwamna, ma vun-ma-gatna telem ala sa mara tumɗi, may tum si muliyan-sa-ɗifinna tuta!

⁵Lebo nigi bay jaŋ hay gatta tuwa su?

⁶Ala hay buura vi sabatna, muliyan-sa-ɗifinna li lop hay Tempella, may law may tun kisiɗi. May nan digi ala ma ŋol ma suw Tempella ka tani.

⁷Dita ta ala: Slugota kiran ŋaa'a suw ɗifinna, dita na'ta zawni nigi huma' cawa'a, sa ma may li va ma jooɗina nigi ka kitat kalamɗi.

⁸Kay goora vi sana mi mul sabatna.

⁹Nam fokis ɗawn pa kal hay sinagogayna* visiya,

¹⁰Sa ma ɓalam keŋkeleŋŋa ay musi hay liy namna dam'. Nisi jobomu: Hagat ka kay yer san goyo hay buura vi sabatna su? Kayni kay nisi min a pi lawt kalamu.

¹¹May nam disiya: Jargi tani, la san ka hiɗi ɦu-dimit kep tuta, may la na' nigawa gaa hay zulla hay buura vi sabatna ni, nam as sla' kulo hay na'ta ɗisu?

¹²Sana nam ŋol suw ɦu-dimita ɗisu? La nala vun-ma-gatna hin sana li ŋaata hay buura vi sabatna.

¹³Hay na'ta nam di tam sana: Meɗaŋ ɓaŋ goyo, nam meɗa' goyo, na' muɗi goy ŋaa'a ki heta nala.

¹⁴May sa Farisena* cuk goy jiya, nisi ŋra vun-tuwsi kalamu kay nisi fi bam iram goyo.

¹⁵Hay li ma Yesu wi kayni, nam kali goy hay liy mara'a. Sumuna ŋolo tuɗ kuɗumu, nam muɗsi goy ŋaa'a kafe.

¹⁶Nam gatsiya kay nisi ma di goy kalamu tam sumunɗi.

¹⁷Kay va ma diy hiɗi vun Esaya sa ma jobta-Lawna vunam ma hob goyo, ma di ala:

¹⁸Sa ma sunda vanu ma nan vilekemna zawni, Dukanna ma ciwta vanu daramu, nan ma cuk Ŋusta van kalamu, nam ma ɗek goy kay gasita tam jaf-sumuna,

¹⁹Nam ma ci wayɗi, ma siwel kuloɗi kaw, a as humum delem goy hay haganɗi.

²⁰Cerew ma hormosi gaana nam ma kusum goyɗi, fitil ma ŋal kiɗayna nam ma tewem goy helmesɗi, ta-ta nam ma vul kolda mi gasita.

²¹Jaf-sumuna ma vi hay semda valamu.[18]

²²Bugol kayni nisi mar tam Yesu sa ma ful kalamna, dukiya, gidiŋi kaw, Yesu muɗum goy ŋaa'a ta-ta san muɗ lawa, muɗ wi'e kaw.

²³Sumun kaf muɗ ɦuyum', nisi di'e: Zawni may mi goora vi David ɗisu?

²⁴May hay li ma sa Farisena* hum kayni, nisi di'e: San zawni digiɗ fuliyan goy kayni may hiɗi va maraɗi, may hiɗi Beelzebul mulla vi fuliyan joona.

²⁵May hay li ma Yesu wi varta visiya, nam disiya: La mulda tarige kaw dur jar-tuwa'a, na' ɓulaka; la ziyn lebo hoyok-ziyn marige kaw dur jar-tuwamu, nam fi musɗi.

²⁶La Satan digiɗ Satan goyo, kayn di ala nam ka dur jar-tuwamu, nala mulda valam fi mus nanige?

²⁷La nan digiɗ fuliyan joon kayn hiɗi Beelzebul, gurona vigi digiɗsi goy kayn hiɗi mige? Kay na'ta nisi ma ka kitat kigiya.

²⁸May la nan digiɗ fuliyan ma joon goy kayni hiɗi Ŋusta, hay na'ta mulda-Lawna maawa tigiya.

²⁹Lebo san as kal vo hay ziyna vi sa ma donona kay vurum slena valamu, bay junum goy jew kayn nam as su? Nam junum jew jun tuwa bugolda nam as vurum slena valamu.

³⁰Sa ma may tap hiɗi nanɗi, nam gaw kanu, sa ma tok slena valam kulo'o hiɗi nanɗi, nam merem meri goyo.

³¹Kay na'ta nan digiya: Sumuna ma fi gida kay sulukŋa visiya hiɗi ŋulda visi kaf, may ŋulda tam Ŋusta nisi ma fi gid ka'ɗi.[19]

³²La san law joo'o tam goora vi sana, nam ma fi gida kay kayni. May la san law joo'o kay Ŋusta-Peldetta, nam ma fi gida hay liyn ma nay ka hayam wulinnaɗi, nam ma fi gida hay liyn ma vokŋaɗi kaw.

³³Kay la gun ŋaa'a, vuɗna valamu ŋaa'a kaw; may la gun joo'o, vuɗna valamu joo'o kaw. Kay san wi gun kayni kuɗ vuɗna valamu.

³⁴Nigi jafna vi guy-makayna, nigi joo'o, may nigi as di sle ma ŋaan ɗawn ir nanige? Kay vunna dum goy mi sle ma dikga hobay hiɗi namna.

³⁵Sa ma ŋaana yaw sle ma ŋaana ay goy hay birimna valam ma ŋaana pa, sa ma joona yaw sle ma joona ay goy hay birimna valam ma joona pa kaw.

³⁶May nan digiya: Yoboyn ma waana pet ma sumun dumna kayni ma jobis kisiya hay buura vi kitata.

³⁷Kay butaŋ goy hay vun kitat ɗawni mi yoboyna vi vunaŋu, tun kitat kaŋ ɗawni mi yoboyna vi vunaŋu kaw.

³⁸Hay na'ta sara'a jar sa wi-ɗota hiɗi sa Farisena* ka di talam ala: Bum-yalla, numa'a min ala naŋ ma li ɗekka kirma'a.

³⁹Nam hotsi dita: Jaf sa joona sa zlata-bulona gar ɗekka, may ɗek tara'a ta vulis tisi suw Yonas ma jobta-Lawna tayɗi.

⁴⁰Kay ki Yonas li buur ɦidi goloŋ hay kuluf ŋolla, nala kaw goora vi sana ma li buur ɦidi gaa kuɗ nagata.

⁴¹Sum sa hay Ninive ma yaw kulo'o hay buura vi kitata kat sum sa hay zamanna visiya, nisi ma ka kitat kisiya, hay nisi ham kuɗ yoboyna ma Yonas kusumna. Ɗuwgiya, ma ŋol ma suw Yonas ka tani.

⁴²Ca-mulda ta kayamta ma fok kulo'o hay fatta kitata kat sum sa hay zamanna va'a, ka kitat kisiya kaw kay na'a may hay vun dabaŋ-gu'ta vi nagata pa kay hum yalla vi Salomon; ɗuwgiya, ma ŋol ma suw Salomon ka tani.

⁴³May ful ma liwisna, hay li ma nam kalawa goy hay sana, nam raw hay liyn ma karaŋŋa, gar tun-sukka, may nam fa'ɗi.

⁴⁴Hay na'ta nam di'e: Nan min hot hay ziyna vanu ma nan kali goy hayam pana; hay li ma nam hotawa haya, nam fum goy hini ɦawa'a, fum goy toriya, kotiya kaw.

⁴⁵Hay na'ta nam tuɗ goyo, yaw fuliyan ma joo suwum namna siɗiya lo kuɗumu, nam cuk kulo hay ziyda, lak haya'a kaw, san kayni makka ta nam fa'ta ɗawni suw ta jewta. Jaf-sum nisi sa joon kayni, van ma li tisi ɗawn nala kaw.

⁴⁶Hay li ma nam ka kus yoboyna tam sumun tuwa, ɗuw na kayni, sulumu hiɗi ɓosiyomna ka goy jiy lak', nisi ka gar kay law hiɗi namu.

⁴⁷Sa kep dumu: Humaŋu, suŋu hiɗi ɓosiyoŋŋa ka goy jiy lak', nisi gar a law hiɗi naŋu.

⁴⁸May nam hot dit tam sa ma dumna ala: Sunu ti gige? Ɓosiyonna si gige?

⁴⁹Bugolda nam meɗ ɓalam goyo kay sa hatayna valamu di'e: Ɗuwgiya, lakŋi si sunu hiɗi ɓosiyonna.

⁵⁰Kay gigekaw ma li minda vi bunu ma hay wuralawna, namu mi ɓasun nanna hiɗi ɓasun nanda hiɗi sun nanu.