Read Masana MATEWUS 19 Bible Online

MATEWUS 19 - Masana bible

MATEWUS 19

¹Van li nala hay li ma Yesu vat yoboyna valam vatna, nam fokis hay Galileya pa, kal hay gal nagata vi Yuda goy bugol Yordan.

²Sumun ŋolo tap kuɗum ɗawni, nam muɗsi goy ŋaa'a.

³Sa Farisena* ma talamu kay nememu, nisi ka jobom ala: hagat ka vuli tam sana kay gi cata valamu kuɗ law mige mige kaf su?

⁴Nam hot disiya: Nigi bay ɗuw hay ɗot tuwa su? Ɗot di ala: Hay cawa'ta tunita nam ma in slena kot jufna hiɗi cata,

⁵nam di'e: Kay na'ta jufna ma hin bulumu hiɗi sulumu, tap hiɗi cata valamu, nisi ma', may sliw-tuwsi ma muɗ kepe,

⁶nisi may tak-tak ma' loɗi, may sliw-tuwsi muɗi kepe, kay na'ta va ma Lawna tapami tapna, hin san munum jaram goyɗi.

⁷Nisi dumu: Musus vulma gatta kay vul ɗerwelda ta mun jar jufna hiɗi cata, ta gi cata, kayn kay mige?[28]

⁸Nam disiya: Musus hingi cuk boyna vigi kayn kuɗ so'otta vi dikgiya, may hay cawa'ta tunita va ma ki kayn nala mayɗi.

⁹May nan digiya: La san gigekaw gi cata valamu, la kuɗ viyuwta tutaɗi, may nam sli ca tara'a ni, nam li zlata-bulo'o.

¹⁰Sa hatayna valamu dumu: La lawt jar jufna hiɗi cat kayn ki kayn nala ni, may ŋaa'a kay sa sli caɗi.

¹¹Nam hot disiya: Sumun kaf may hum caw yoboyn kaynɗi, may humum si sa nam vuli tisina.

¹²Kay sum sa patayna ka'a, nisi ay nala kalaf hay sumaysi pa; segen ka'a patsi si sumuna, segen ka'a muɗ tuwsi pataya, kuɗ mulda-wuralawna. Sa ma as hum caw kayni, hinim huma.

¹³Kay na'ta nisi mar gurosgurayn talamu kay nam ma bar ɓalam kisiya, siɗaw kisiya kaw, may sa hatayna lawsiya.

¹⁴May Yesu di'e: Hingi gurosgurayn ŋal kiliŋ, telsi goy kanɗi, kay mulda-wuralawna fa' si sum sa kisi nisi naana.

¹⁵Nam bar ɓalam kisiya, kal goy hay liy mara'a.

¹⁶Sa kepe ma tam Yesu, ka dum ala: Bum-yalla, nan ma lum mi mige kay fi irita vatɗita?

¹⁷May Yesu dumu: Naŋ joban kay ma ŋaana kay mige? Ma ŋaana ka kep tuta. May la naŋ min tuɗ kalafi hay irita, laŋ kuɗ vun-ma-gatna. Nam hot job ala vun-ma-gatna marige?

¹⁸Yesu di'e: Naŋ ci matɗi, naŋ li zlata-buloɗi, naŋ ka sinɗi, naŋ kulɗi.

¹⁹Naŋ ma sli yam buŋu hiɗi suŋu kulo'o, naŋ ma min sugoloŋu ki tuwaŋ nala.

²⁰Sa ma joriyona dumu: Slen kayni pet nan ka li kuɗumu, hini kan bay li mi mige?

²¹Yesu dumu: La naŋ min muɗ goy ŋaa'a noŋ pasiyaki ni, tuɗaŋu, gusaŋ slena vaŋ kaf goyo, vulum mi sa hawna, naŋ ma fi farayna hay wuralawna, naŋaya tapaŋay kuɗanu may.

²²May hay li ma sa ma joriyon kayni hum yoboyn namna, nam kali goyo yor hay dikam kalafi, kay nam mi sa ma faray ŋolo.

²³Yesu di tam sa hatayna valamu: Nan digi gasita: Lop ŋolo kay sa ma farayna a kal hay mulda-wuralawna.

²⁴Nan digi lo: Lamgana as raw hay ŋil baadalla bay lopo suw sa ma farayna ma min kal hay mulda-Lawna.

²⁵Hay li ma sum sa hatayna hum kayni, nisi muɗ ɦuyum' ŋolo di'e: La ki kayn nala ma fi su'da ɗawn gige?

²⁶Yesu ɗuwsiya, nam disiya: San may as kay li slen kayni noŋɗi, may Lawna as kay slen pet.

²⁷Peter sli ditiya dumu: Ɗuwaŋu, wulini numa hin slena vuma'awa goy pete, tapawa kuɗaŋu, numa'a ma fi mige?

²⁸Yesu hot disiya: Nan digi gasita: Hay li ma goora vi sana ma mus hay zlamda-mulda vi gajijita valamu hay mu'da wulita vi slen kaf ɗawni, nigi sa tap kuɗanna, nigi ma lak hay zlamda-mulda doogo yam ma', nigi ma ka kitat kay jafna vi Israyel sa doogo yam ma'na.

²⁹Gigekaw ma hin goy ziyna valam kla, ɓosiyom sa jufayn kla, sa boyn kla, bulum kla, sulum kla, guron kla, sinen kla kay semda vanu, nam ma fi sem kis suwa, irita vatɗita nam ma yawa' voco'o kaw.

³⁰May segena ŋolo jar sa jewna ma muɗ si sa cawna, sa cawna ŋolo ma muɗ si sa jewna kaw.