Read Masana MATEWUS 2 Bible Online

MATEWUS 2 - Masana bible

MATEWUS 2

¹Hay li ma Yesu vuɗi hay Betlehem hay Yudiya hay buura vi mulla Herod kayni, sa wi yalla sa hay nagat ta gal kuɗuwta ma hay Yerusalem,

²Nisi di'e: Mulla vi Yudiyana ma vuɗi wulina ka arige? Kay numa'a wi mislekka valam ay hay gal kuɗuw pa, numa co kayni kay girifimu.

³Hay li ma Herod hum kayni, dikam ɓirim jitit', sum sa hay Yerusalem kaf li nala kaw.

⁴Nam tok muliyan ŋulo sa-ɗifinna kaf, hiɗi sa wi-ɗota jar sumuna, nam jobsi ala liyn ma Yesu ma vuɗ hayna ka arige?

⁵Nisi dumu: Hay Betlehem hay Yuda; kay sa jobta-Lawna ɗoy ala:

⁶Naku, Betlehem hay nagata vi Yuda, Nak may ti ta goota jar nagana vi Yuda noŋɗi, Kay goy hay nak pa mul kep ma kali goyo, Nam ma muɗ mi ma ŋomda vi sumuna vanu sa Israyella.[2]

⁷Bugol kayni Herod yi sa wi yalla goy talam ŋayaya, nam jobsi goy haraŋ ala nisi wi mislekŋa kayni lancitige?

⁸Nam gisi irsi hay Betlehem, disi ala tuɗgiya, jobgi labar ŋaa'a kay goora, hay li ma nigi fumawa, nigi ma danu kay nan kaw min tuɗis girifimu.

⁹Hay li ma nisi hum dita vi mulla humna, nisi cuk goyo. Ɗuw na kayni, mislekka ta nisi wa' hay gal kuɗuw pata tun voksiya, ta-ta na' co'o, col kulo hay liyn ma goor buri hayna.

¹⁰Hay li ma nisi wi mislekka, haysi li firi ŋolo.

¹¹Nisi cuk kalafi hay ziyda, irsi cuk kay goora hiɗi sulumu Mariya, nisi guɗof gaa'a girifimu, nisi but slena visi ma ŋaana goyo, nisi vulum ora, urdi ma his fayna hiɗi urdi ma yum miir.

¹²Bugolda Bum-Sumuna ɗeksi hay duwayta ala nisi ma hot tam Herod loɗi, nisi sli hagata tara'a, hot hay nagata visiya may.

¹³May hay li ma sa wi yalla kalawa kayni, sunda-wuralawna vi Bum-Sumuna vul tuwam kir Yosef hay duwayta, ka ɗekem ala: Fokaŋ kulo'o, yaw goora hiɗi sulum kuɗaŋu, pirgi hay Egipte, kay Herod min ci goor goyo. Naŋ ma mus ɗawni ta-ta nan ma daŋu.

¹⁴Nam fokay kulo'o, yaw goora hiɗi sulum kuɗumu, kali hay Egipte.

¹⁵Nam musi ɗawni ta-ta hay mitta vi Herod, kay hob vun va ma Bum-Sumuna dum hay vun sa ma jobta ala: Goy hay Egipte pa nan yi goora van goyo.[3]

¹⁶Hay li ma Herod wi ala sa wi yalla ɗutum ɗutiya, nam muɗ ɦiy ŋolo, nam cuk sojena kay ci guro sa jufayna kaf hay Betlehem goyo, hiɗi naga ma ŋuyi ta'na kaf kaw, nisi sa liy busat ma' hiɗi sa bay li busat ma' kaw, ŋray dig liyn ma sa wi yalla di talamna.

¹⁷Kayni kay hob vun dita vi Yeremiyas ma jobta ta di ala:

¹⁸Sumun ka hum winekŋa goy hay Rama pa, tiyna hiɗi yorta ka ŋolo, Rakel ka tiy kay gurona va'a, Na' min kay teŋ ira'ɗi, kay nisi say loɗi.[4]

¹⁹May hay li ma Herod mitawa kayni, sunda-wuralawna vi Bum-Sumuna vul tuwam kir Yosef hay duwayta hay Egipte pa,

²⁰ka dum ala: Fokaŋ kulo'o, yawaŋ goora hiɗi sulum kuɗaŋu, hotaŋ hay nagata vi Israyel, kay nisi sa gar a ci goor goyna mitawa.

²¹Nam fokay kulo'o, yaw goora hiɗi sulum kuɗumu, hotay hay nagata vi Israyel.

²²Hay li ma nam hum ala Arkelawus musi mul hay Yudiya hay baŋal bulum Herod, nam li nari kay tuɗ hay nagat Yudiya, may hay li ma Ŋusta dum hay duwayt din kayni, nam kali hay nagat Galileya.

²³Nam co'o, mus ziy hay hoyok-ziyn Nasaret, kay slen ma sa jobta dumna vunam ma hoba, ala: Nisi ma yum ala sa ma Nasaretna.