Read Masana MATEWUS 20 Bible Online

MATEWUS 20 - Masana bible

MATEWUS 20

¹Mulda-wuralawna na' ŋray ca hiɗi bum-ziyna ma kal goy grawt culum culum kay gar sa lopna hay sine gulda-guldana valamu.

²Hay li ma vunam ŋra hiɗi sumuna kay gurju kep kepe kay busa hay lopna, nam cuksi hay sine gulda-guldana valamu.

³Nam kal goy lo hay leer ma ɦidina bugolda, nam wi sum segen hay liyn lak', lop ma nisi lum mayɗi,

⁴nam ka disi ala: Tuɗgi hay sine gulda-guldana vanu, nan ma vulgi va ma hay liyamna.

⁵Nisi kali may. Nam kali goyo hay leer ma karkiya bugoldan lo, hay leer ma zleeŋen lo, nam li ŋray ca ki jew nala.

⁶Nam kali goy hay leer ma doogo yam kepna lo, nam fi segen lakay ɦawa lak', nam ka disi ala: Nigi busa tan ɦawa he' kayn kay mige?

⁷Nisi dumu: Kay sa may yuma kay lopɗi. Nam disiya: Nigi kaw tuɗgi hay sine gulda-guldana vanu.

⁸May hay li ma vulatita laawa, bum sine gulda-guldana di tam sa ma ŋom lopna ala: Yaŋ sa lopni goyo, vulsi wurakŋa visiya, naŋ ma tun wurakŋa tam sa co bugolla, ta-ta vatam goy tam sa co jewna.

⁹Wulini sa yawsi hay lopna hay leer ma doogo yam kepna coowa, nisi fi gurju kep kepe.

¹⁰Hay li ma sa jewna co'o, nisi var ala nisi ɗawn ma fi suwa, may nisi kaw fi gurju kep kep.

¹¹Hay li ma nisi ka yaw gurjuta, nisi ka ŋurnay tam bum-ziyna,

¹²nisi di ala: Sum sa co bugolla lakŋi nisi li leer hay lopn kep ɦawa, nam ŋrasi hiɗi numa sa busa hay lopn he' hay hiɓiyna hiɗi makka kayni kay mige?

¹³Nam hot dita tam san kep jarsi ala: Bananna, nan may laŋ va ma jooɗi, nay ŋra vunay jar-tuway kayn kay gurju kepɗi su?

¹⁴Vaŋ gurjuta vaŋu tuɗaŋu, may sa ma co bugolla zawni nan min vulum ŋray ca ki nan vul maŋ nala kaw.

¹⁵Va ma nan min lum hiɗi farayna vanu hagat may kan kay lum disu? Naŋ li hunay kay ŋaata ta nan la'ta kay mige?

¹⁶Nala kaw sa cawna ma muɗ si sa jewna, sa jewna ma muɗ si sa cawna may.

¹⁷Hay li ma Yesu ka tuɗ kulo hay Yerusalem, hay hagata nam yaw sa doogo yam ma'n goy ŋayaya, ka disi ala:

¹⁸Humgiya, nay ma tuɗay kulo hay Yerusalem, goora vi sana ma vulis goy hay ɓam muliyan ŋulo sa-ɗifinna hiɗi sa wi-ɗota. Nisi ma ka kitat kalamu kay cum goyo,

¹⁹nisi ma vulum goy hay ɓam sa waana kay nisi ma ŋulumu, watamu, ɓalam kat gu-ma-grakŋa kaw, may hay buurta ɦidita nam ma day kulo'o.

²⁰Hay na'ta sum gurona vi Sebedew tuɗ tam Yesu hiɗi gurona va'a, na'a girif gaa vokomu, kay siɗawam kay va'a.

²¹Nam joba' ala: Nak min mige? Na' hotom dita: Naŋ ma vul hagat kay gurona van lakŋi ma lak galaŋ hay mulda vaŋu; kep hay galaŋ ma jufna, kep hay galaŋ ma gulla may.

²²Yesu hot dita: Nigi wi va ma nigi siɗaw kalamnaɗi, kaway-ma-cina ma nan min cumna nigi asay kay cum su? Nisi dumu: Numa as cumu.

²³Nam disiya: kaway-ma-cina vanu nigi as kay cum gasi, may kay mus galan ma jufna lebo galan ma gulla kayni, vulum mi san mi nanɗi, may bunu as vul kayni mi sa mulda koti kisina.

²⁴Hay li ma sa doogona hum kayni, diksi ɓulak tam ɓosiyom-tuwsi sa ma'na.

²⁵Yesu yisi talamu, nam disiya: Nigi wi ala muliyana vi nagata curoɗ sumuna, sum sa ŋulona li sumun dono'o kuɗ ŋolda visiya kaw.

²⁶May nigi ma li ki kayn nala jar-tuwgiɗi, may sa ma ŋolla jargiya ma muɗ tuwam goy ma sunda vigiya,

²⁷sa ma min muɗ goy ma jewna jargiya, nam ma muɗ mi ma sungina kaw.

²⁸Ki kayn nala kaw, goora vi sana ma kayni kay sa sunumɗi, may kay nam kay tuwamu sun sumuna, vul irita valam goyo kaw kay muɗ sumun ŋolo.

²⁹Hay li ma nisi kali goy hay Yeriko pa, sumun ŋolo tuɗ kuɗumu.

³⁰Sum sa dukin ma' ka lakay hay gal hagat lak, nisi hum ala Yesu ka capa, nisi ka siwel ala: Laŋ slugot kuma'a, Bum-Sumuna, goora vi David.

³¹Sumun tun caw lawsiya kay nisi ma ziŋa. May nisi siwel ŋol suwa di'e: Bum-Sumuna, laŋ slugot kuma'a lige, naŋ goora vi David.

³²Yesu cola, nam ka yisiya, nam jobsi ala: Nigi min ala nan ma lum tigin mi mige?

³³Nisi dumu: Bum-Sumuna, numa min kay irma'a ma mal goyo.

³⁴Wulini nisi muɗ kir Yesu haw ŋolo, nam tun ɓalam kirsiya, wulini wulini, irsi mal goyo, nisi tap kuɗumu may.