Read Masana MATEWUS 23 Bible Online

MATEWUS 23 - Masana bible

MATEWUS 23

¹Yesu di yoboyn tam sumuna hiɗi sa hatayna valam kaw ala:

²Sa wi-ɗota hiɗi sa Farisena* ka lakay kay liyn ma kusta vi Musus.

³Slen ma nisi digit kafna nigi ma li kuɗumu, may ligi kuɗ lopna visiɗi. Kay nisi di slen hiɗi vunsiya, may nisi kay tuwsi li kuɗumɗi.

⁴Nisi jun jakŋa ma nek ŋolla ma ziy lopna, nisi tunum pel sumuna, may nisi kay tuwsi geɗem hiɗi cita-ɓisiɗi.

⁵Lopna visi nisi lum kaf kayni kay sumun ma wisiya: Katamulla visiya nisi ɗutum beɗ ŋolo, vun sligara visiya vuɗi tisip tisip' kaw;

⁶nisi dar mus ma vokŋa hay yuldeta, min mus hay zlamna ma vokŋa hay sinagogayna* kaw,

⁷min gi-deɓta hay lumuna, min ala sumun ma yisi ala Rabbi kaw.

⁸May nigi ma hin sa yigi ala Rabbiɗi, kay bum-yalla vigiya mi kepe, may nigi kaf si ɓosiyom-tuwgina.

⁹Nigi ma yi sa gaa kay nagat tan ala buma'aɗi, kay bugiya ka kepe, nam ma ka hay wuralawna.

¹⁰Nigi ma hin sa yigi ala sumay hattaɗi, kay mul-hatta vigi ka kepe, kayni Kristu.

¹¹May ma ŋolla jargiya ma muɗ goy ma sungina.

¹²Kay gigekaw ma subur tuwamu, nam ma muɗ goy waa'a, may gigekaw ma muɗ tuwam waana nam ma fi suburta.

¹³May joot kigiya, nigi sa wi-ɗota hiɗi nigi sa Farisena*, nigi sa milena, nigi sa duk vun mulda-wuralawna kay sumuna, may nigi kay tuwgiya fi kal haya'ɗi. Nisi sa min kal haya, nigi min hinsi hagatɗi kaw.

¹⁴Joot kigiya, nigi sa wi-ɗota hiɗi nigi sa Farisena*, nigi sa milena. Kay nigi ti ziyna vi boy sa duhulla, nigi siɗaw fiyoko kay sumuna ma wigiya, kuɗ kayni nigi ma fi kitata ŋol suwa.

¹⁵Joot kigiya, nigi sa wi-ɗota hiɗi nigi sa Farisena* sa milena, kay nigi ŋuy niy-lumna hiɗi nagata kaw, kay gar sa ma vi kuɗgiya, may hay li ma nam vaawa kuɗgiya, nigi muɗum goy goora vi kuta tewɗita suwgi nigi sem ma'.

¹⁶Joot kigiya, nigi sa dukina sa tun vok sumuna, nigi di ala la sa yi va kalam hiɗi Tempella, kayn may tun kalamɗi, may la sa yi va kalam hiɗi or ma hay Tempella, kayni tuni kalamu.

¹⁷Nigi sa ɦay-ɦayna hiɗi nigi sa dukina, ma ŋol jaram nam lakŋi mi marige? Ora lebo Tempella ma li or goy peldetna su?

¹⁸Lo nigi di ala: La sa yi va kalam hiɗi giwin-ma-ɗifinna, kayni may tun kalamɗi; may la san yi va kalamu hiɗi ɗifinna ma maram kulo hay giwin-ma-ɗifinna, kayni as tun kalamu.

¹⁹Nigi sa dukina, ŋol jaram mi marige? Ɗifinna lebo giwin-ma-ɗifinna ma ɓi ɗifin kulo kalamna su?

²⁰Sa ma yi va kalamu hiɗi giwin-ma-ɗifinna, nam yi va kalamu hiɗi giwin-ma-ɗifinna hiɗi sle ma lakay kulo kalamna kafe.

²¹Sa ma yi va kalamu hiɗi Tempella, nam yi va kalamu kayni kay Tempella hiɗi nam ma musi haya kaw.

²²Sa ma yi va kalam hiɗi wuralawna, nam yi va kalam kayn hiɗi zlamda vi Lawna hiɗi nam ma mus ka'na kaw.

²³Joot kigiya, nigi sa wi-ɗota hiɗi nigi sa Farisena* sa milena, nigi vul gal-ma-doogona vi minte, hiɗi anise hiɗi kumen, may sle ma ŋulo suwna hay vun-ma-gatna ki ɗigerta, slugota hiɗi vida nala, nam lakŋi mi sle ma nigi may lumɗi. Nam lakŋi mi sle ma nigi as lumu, hin hena bay liɗi kaw.

²⁴Nigi sa tun vok sumuna sa dukina, nigi sa yor niyn goy hiɗi temena kay ɦurutta, may lamgana nigi ligimu.

²⁵Joot kigiya, nigi sa wi-ɗota hiɗi nigi sa Farisena, nigi sa milena, kay kaway-ma-cina hiɗi tasana nigi muzum ŋorom goyo, may hayamu hobawa hiɗi kulda hiɗi haramda.

²⁶Nigi sa Farisen* sa dukina, kaway-ma-cina hiɗi tasana nigi ma muzum hayam goy jewe, bugolda ŋorom ma muɗ goy cet-cete.

²⁷Joot kigiya, nigi sa wi-ɗota hiɗi nigi sa Farisena*, nigi sa milena, kay nigi ŋray ca hiɗi yam-usna ma ŋorom koray haɓi, may hayam kalafi hobawa hiɗi zokŋa vi sa mitina hiɗi sle ma liwisna pet.

²⁸Nigi kaw ŋorgi goy jiy kir sumun ɗigere, may haygi kalafi hobawa hiɗi mileta hiɗi jiw-zlata.

²⁹Joot kigiya, nigi sa wi ɗota hiɗi nigi sa Farisena*, nigi muw yam-usna vi sa jobta-Lawna, kot yam-usna vi sa ɗigera ŋaa ŋolo,

³⁰nigi di ala: Lali numa ay hay buura vi sumayma'a, numa'a fi tap hiɗi nisiya kay mar busuwna vi sa jobta-Lawna kuma'ɗi.

³¹Nala nigi ka li di-goyt kigi kay tuwgi ala, nigi si gurona vi sa ci sa jobta-Lawn goyna.

³²Nigi kaw hobgi vun dutta-kusta vi sumaygiya!

³³Nigi guyna, nigi jafna vi guy-makayna, nigi pir goy kay kitata vi kuta tewɗit ɗawn pirtige?

³⁴Kay na'ta, ɗuwgiya, nan ma cuk sa jobta-Lawna hiɗi sa yalla hiɗi sa wi-ɗota tigiya, segena nigi ma cisi goyo, ɓalsi kat gu-ma-grakŋa, segena nigi ma watsi hay sinagogayna* vigiya, segena nigi ma tuɗ kuɗsi hay hoyok-ziyn mara'a mara'a kay lassiya.

³⁵Kay busuwna vi sa peldetna ma jaŋ goy gaa kay nagata, tun caw tam busuwna vi Abel ma ɗigera pa, ta-ta tam busuwna vi Zakariya, goora vi Berekiya, ma nigi cum goy jar Tempella hiɗi giwin-ma-ɗifinna,[33] busuwna visi kaf ma tun kigiya.

³⁶Nan digi gasita: Slen kayni kaf ma co kay jafna vigiya.

³⁷Yerusalem! Yerusalem! Nak ci sa jobta-Lawna goyo, sa cuksi hayagŋa nak gisi hiɗi goorhoyona kaw. Sem gaage nan gar a tok yam gurona vagu ki slekka tok gurona va'a gaa kuɗ gilaŋata'a nala, may nigi minɗi.

³⁸Humgiya: ziyna vigiya ma hin goy hiweŋ'.

³⁹Kay nan digiya: nigi ma wan iran loɗi ta-ta hay buur ma nigi ma di ala: Bolda ka kay nam ma min ma'a hay semda vi Bum-sumuna.