Read Masana MATEWUS 24 Bible Online

MATEWUS 24 - Masana bible

MATEWUS 24

¹Hay li ma Yesu ka kal goy hay Tempella pa, sa hatayna valamu ma talamu, ka ɗekem kay inda ŋaata vi Tempella.

²May nam hot dita disiya: Slen kayni kaf nigi ka wum su? Nan digi gasita, hiɗiy ma jakay kulo kay tuwamu ma as ɦo gaaɗin may tanɗi.

³May hay li ma nam mus kulo kay hiɗiyt Olive, sa hatayna valamu tuɗ talam goy ŋayaya, ka jobom ala: Duma'ay tige, slen kayni ma li citige? Va ma ɗek kay hotta vaŋu hiɗi vatta vi nagat kaw mi mige?

⁴Yesu disiya: Ligi ŋali, hin sa ɗutgi goyɗi.

⁵Kay sumun ŋolo ma ma'a hay semda vanu, nisi ma di ala nan zawn mi Kristu; nisi ma ɗut sumun goy ŋolo kaw.

⁶Nigi ma hum kay duura hiɗi winekŋa vi duura: Nigi ma li narɗi, kay la nanigekaw slen kayni ma co'o, may vatta bay co tuwa.

⁷Jaf-sum sara'a ma yaw kulo'o kay jaf-sum sara'a, mulda tara'a ma fok kulo'o kay mulda tara'a kaw, mayta hiɗi wiira nagata ma li tani, li ɗawn kaw.

⁸May slen namna kayni kaf mi tun cawta vi tuw-tita.

⁹Hay na'ta nisi ma vulgi goy hay lasta, cigi goyo kaw, jaf-sumun kaf ma ka gawt kigiya kay semda vanu.

¹⁰Hay na'ta sumun ŋolo ma hora, nisi ma di newt jar-tuwsiya, ka gawt jar-tuwsiya kaw.

¹¹Sa jobta-Lawna sa bay-gasina ŋolo ma yaw kulo'o, ɗut sumun goy ŋolo kaw.

¹²Jiw-zlata ma li ŋolo, ti-kamda hay sumuna ŋolo ma muɗ kiɗaya.

¹³May sa ma so tuwamu ta-ta hay dabaŋ-gu'ta, nam ma fi su'da.

¹⁴Labara ma firina vi mulda ma kusis goy hay nagat kuɗulu', kay vul di-goyta tam jaf-sumun kaf, hay na'ta dabaŋ-gu'ta ma ma'a.

¹⁵Hay na'ta liwista vi ɓulak-goyta ta sa ma jobta-Lawna Daniel di ka'ta[34] hay li ma nigi wa'awa tuni hay liy ma peldetna, sa ma jaŋ lawta kayni ma li ŋali.

¹⁶Hay na'ta nisi sa ka hay Yudiya ma pir kulo'o kay hiɗiyta,

¹⁷sa ma ka kulo kay yam-ziyda ma jik gaa'a hay ziyda valamu kay yaw sle ma ka hay ziyda valamɗi.

¹⁸Sa ma ka goy hay sinena ma hot kay yaw sligar-tuwna valamɗi.

¹⁹Joot kay boy sa hayna hiɗi boy sa guron digsina kaw hay buur na'ta ɗawni.

²⁰May nigi ma siɗawa kay pir-goyta vigiya ma li hay caydaɗi, hay buura vi sabatnɗi kaw.

²¹Kay hay na'ta lasta ma li ŋolo, hay tun cawta vi nagat pa ta-ta wulini, lasta ta ki kayn nala bay li tuwa, vokay kaw lasta ta ki kayn nala ma liɗi.

²²La buur na'ta kaay kiɗayɗi ni, sa kep kaw fi suɗ goyɗi, may kuɗ sa vileki-goyna, buur na'ta kaay kiɗaya.

²³La sa co digi ala: Ɗuwgiya Kristu ka tani lebo Kristu ka ɗawni, nigi ma vi kuɗumɗi.

²⁴Kay Kristuwayn sa bay-gasina hiɗi jobta-Lawna sa bay-gasina ma yaw kulo ŋolo, nisi ma li ɗekka ŋolo ŋolo, hiɗi sle ma ŋulona kaw, ta-ta la asa, sa vileki-goyn noŋ kaw nisi ma ɗutsi goyo.

²⁵Humgiya, slen kayni nan digiyawa goy kalam jewe.

²⁶La nisi digi ala: Ɗuwgiya, nam ka hay fulda, tuɗgi kuɗsiɗi, la nisi digi ala: Nam ka hay ziyna, tuɗgi kuɗsiɗi kaw.

²⁷Kay ki wileta may gal kuɗuwu pa, kal gal vulatiya, mata vi goora vi san kaw ma li ɗawn nala.

²⁸Arigekaw ma ŋumna ka'a, hay liyn kayni bakŋa ma daka.

²⁹May bugol buura vi las na'ta de' ɗawni, fatta ma muɗ jufunu, tilla ma vul haraŋa valam loɗi, mislekŋa ma cukay gaa dukalawn pa, donota vi dukalawna ma wira.

³⁰Hay na'ta ɗekka vi goora vi sana ma li hay dukalawna, jafna vi sum sa gaa kay nagat kaf ma yor tuwsiya, nisi ma wi goora vi san ma'a hay ɗugul ma hay dukalawna, hay gaŋeraŋa hiɗi gajijit ŋolo.

³¹Nam ma cuk sa sunda-wuralawna valam goyo hiɗi togolom ma buwna, nisi ma tok sa vilekayna valamu hay gef-nagat fiɗi pete, hay vun dukalawn hena pa ta-ta tam vun dukalawn hena.

³²Hatgi law ma nir-niramna tam gu-gumna, hay li ma miira co hay ɓalamu, humam goɗ kaw, nala nigi ma wi ala menda ka goboyo.

³³Nala nigi kaw, hay li ma nigi wi slen kaynawa kafe, nigi ma wi ala goora vi sana ka goboy tam vun-galana.

³⁴Nan digi gasita, jaf namna kayni ma vat goyɗi, ta-ta slen kayni kaf co'o.

³⁵Dukalawna hiɗi nagata ma vat goyo, may yoboyna vanu ma vat goy noŋɗi.

³⁶Buura hiɗi leera namna sa ma wum mayɗi, sunda-wuralawna as wumɗi, goora kaw as wiɗi, may mi bumna nam kepe.

³⁷Kay ki hay buura vi Nuwa nala, mata vi goora vi san kaw li ɗawn nala.

³⁸Kay jew a niyn de kay nagat kayni, sumun ti'e ci'e kaw, yaw boyna, vul guron goyo kaw, ta-ta hay buur ma Nuwa kal kalaf hay lumna,

³⁹nisi may giriŋ kay va noŋɗi ta-ta hay li ma niy ma dena, dolsi kafe; mata vi goora vi san kaw ma li ɗawn ki kayn nala.

⁴⁰Sum ma' ma lak goy hay sinena; kep ma slumis goyo, kep ma hin zaw.

⁴¹Boyn ma' ma lak luta, kepta ma' sla'ays goyo, kepta ma hina.

⁴²Kay na'ta lakgi jigere kay nigi may wi buur ma Bum-Sumuna vigi ma maanɗi.

⁴³Sargi tam bum-ziyna tige! Lali nam wi liyn ma kulla co haya hay henjeta kay kula ni, nam ɗawn ma mus jigere, hin sa ma kulla co ziyna valamɗi kaw.

⁴⁴Kay na'ta nigi kaw lakgi jigere, kay goora vi sana ma ɗawni hay leer ma nigi may var kalamɗi.

⁴⁵Sa ma ŋom ziyna ma dikam ŋaa'a, ma ŋali kaw, ma bum-ziyna valamu musum kay sum sa vo valamna, kay nam ma vulsi tin hay liyamu kaw kayni mi sa marige?

⁴⁶Sle'ta ka kay sa ma ŋom ziyna ma bum-ziyna fum ki kayn nala hay li ma nam hotiya.

⁴⁷Nan digi gasita, nam ma musum kay zlamda valamu.

⁴⁸May la nam mi ma ŋomda ma joona, la nam di hay dikam kalaf ala bum-ziyna van may co gosoyɗi,

⁴⁹la nam tun caw to nuriyom sa sunda, ti'e ci'e hiɗi sa ci dolayna kaw,

⁵⁰hay na'ta bum-ziyna valam ma co kalam ɓukudum', hay leera ma nam may wumɗi,

⁵¹nam ma calam goy tiges tiges', ma vulum liyna valamu jar sa milena hay liyn ma tiyta hiɗi mut-siyna ka hayna.