Read Masana MATEWUS 27 Bible Online

MATEWUS 27 - Masana bible

MATEWUS 27

¹Hay li ma liyn foowa goyo, muliyan ŋulo sa-ɗifinna hiɗi sa maariyana vi sumuna kaf ŋra vun-tuwsiya kay ci Yesu goyo.

²Nisi junumu, tuɗum goyo, vulum hay ɓam guverner Pilatus.

³Hay li ma Yudas ma di newt kay Yesuna wi ala nisi tun kitatawa kay Yesu, nam ham goyo, nam hot gurjuta ta dok-ɦidita tam muliyan ŋulo sa-ɗifinna hiɗi sa maariyana,

⁴nam disiya: Nan li sulukawa hay li ma nan di newta kay busuwna ma may li jootɗina. May nisi dumu: Kayni may ti lawta vumaɗi, may lawta vaŋu.

⁵Ki kayn nala Yudas cuk gurjuta ta dok-ɦidita gaa hay Tempella, nam vi tuwam goyo, kaliya, jun tuwam kulo'o.

⁶Muliyan ŋulo sa-ɗifinna yaw gurjuta, nisi di'e: Sa fi cuka' hay timgil ma hay Tempelɗi, kay kayni gurjuta vi busuwna.

⁷Nisi ŋra vun-tuwsiya kay gurju na'ta, nisi yawa'a, gus sinena vi sa ma in dowayn hiɗi na'a, kay pi sum sa pulla haya'a.

⁸Hay na'ta sine namna yum ala sinena vi busuwna ta-ta vaydi.

⁹Kayni kay hob vun dita vi Yeremiyas ma jobta-Lawna ma nam di ala: Nisi yaw gurjut dok-ɦidi, gurju ma gusna ma ŋaɓay kalamna, ki ma gurona vi Israyel ŋaɓam gusta valam nala.

¹⁰Nisi vulum kay sinena vi sa ma in dowayna, ki Bum-Sumuna vulum hagata nala.

¹¹May Yesu col kulo'o vok guvernera. Guvernera jobom ala: Naŋu mi mulla vi Yudiyan su? Yesu hotom dit ala: Naŋ di hay liyamu.

¹²May law ma muliyan-sa-ɗifinna hiɗi sa maariyana pum kalam kafna, nam min hot dit kuɗumɗi.

¹³Pilatus dumu: Law ma nisi pum kaŋŋa kaf kayni naŋ may humumɗi su?

¹⁴Yesu may hotom dit kay va kep noŋɗi, van kayni muɗ guverner ɦuyum' ŋolo.

¹⁵May hay buura vi yuldet kaf, guverner gisi sa ma daŋgay goy kep kep, sa ma sumun jobomna.

¹⁶Hay na'ta sa ma selem tiy ŋolo ay hay daŋgay kepe, yum Barabas.

¹⁷Kay na'ta hay li ma nisi ay dakaya, Pilatus disiya: Nigi min ala nan gigit goyn mi gige? Barabas lebo Yesu ma yum ala Kristuna su?

¹⁸Kay nam wi ala nisi vulum Yesu goy kayni kay hunayta.

¹⁹May hay li ma nam ka musi hay zlamda-kitata, cata valamu gi sun ay talam ala: Sa ma ɗigera kayni naŋ ma li va talamɗi, hay henjeni duwayt lasan ŋolo kuɗumu.

²⁰Muliyan ŋulo sa-ɗifinna hiɗi sa maariyana gi yam sumuna kay nisi ma siɗaw kay Barabas, may ci Yesu goyo.

²¹Guverner sli lawtiya disiya: Jar sa ma'n lakŋi, nigi min ala nan gigit goyn mi gige? Nisi di'e: Barabas.

²²Pilatus di tisiya: Yesu ma yum Kristuna nan ma lum talam mi mige? Nisi kaf di'e: Ɓalam kat gu-ma-grakŋa.

²³Guverner di'e: Kay mige? Nam lum joon mi mige? May nisi siwel ŋol suwa ala: Ɓalam kat grakŋa.

²⁴May hay li ma Pilatus wi ala lawta valam may ti loɗi, hay li ma nam wi kaw ala winekŋa ka jor vokom ŋol suwa, nam sli niyna, muz ɓalam goyo vok sumun kaf, nam di'e: Sa ma ɗigera kayni busuwna valam may kanɗi, kayni lawta vigi nigiya.

²⁵Sumun kaf hot dit ala: Hin busuwam tun kuma numa'a hiɗi gurona vuma'a.

²⁶Ki kayn nala Pilatus gisi Barabas goyo. Bugolda nam vul hagata kay nisi ma wat Yesu, nam vulumu kay nisi ma ɓalam kat grakŋa.

²⁷Kay na'ta sojena vi guvernera vi Yesu kuɗsi kalaf hay Pretoriyum*, nisi dak sa gardena kaf talamu.

²⁸Nisi fok sligara valam goyo, cukum sligar-tuw ma slaw keŋŋa talamu,

²⁹nisi cil bogoray ma zigiyna, tunumti kalamu, vulum libetna hay ɓalam ma jufna kaw, nisi girif gaa vokomu, panam ala: Gaŋ deɓawa, mulla vi Yudiyana.

³⁰Nisi tuf nenen kalamu, yaw libetna, watam kalamu.

³¹Hay li ma nisi panam panna, nisi fok sligar-tuwna valam goyo, cukum sligara valam talamu, kalam goyo kay ɓalam kat grakŋa.

³²Hay li ma nisi cuk goyo, nisi ŋaf hiɗi sa ma Sirene[36] kepe, semda valamu Simon, nisi vum hiɗi dono'o kay ziy gu-ma-grakŋa vi Yesu.

³³Hay li ma nisi co hay liyn ma yum ala Golgata, kayni di ala liyn ma zok-ta'ara;

³⁴nisi vulum vin ma ci'e, rigasay hiɗi goyo-goyna, may hay li ma nam jugomu, nam min ciɗi.

³⁵Nisi ɓalam kat gu-ma-grakŋa, nisi ɓuraw sligara valamu jarsiya, ŋaɓam kuɗ ɦayta, kay hob vun dita vi sa ma jobta-Lawna ma di ala: Nisi ɓuraw sligara vanu jarsiya, sligar-tuwna vanu nisi ŋaɓam kuɗ ɦayta.[37]

³⁶Nisi lak gaa'a ŋomomu.

³⁷Kulo kalamu nisi ɗo ɗot ta nisi pi lawt kalam hiɗi na'ta ala: KAYNI MI YESU MULLA VI YUDIYANA.

³⁸Hay na'ta nisi ɓal sum sa coŋcoloŋ ma' kat gu-ma-grakŋa kaw hiɗi namu, kep hay galam ma jufna, kep hay galam ma gulla may.

³⁹Nisi sa jik hay hagata ŋulumu, gila yisiya kaw,

⁴⁰ala: Ŋaŋu ma ɦo Tempella gaa'a hot inim kulo'o hay buur hiɗi kawna, suɗaŋ tuwaŋ yo! La naŋu mi goora vi Lawna, jikaŋay gaa'a kay gu-ma-grakŋa pa.

⁴¹Muliyan ŋulo sa-ɗifinna, sa wi-ɗota hiɗi sa maariyana kaw ŋulumu di'e:

⁴²Segena nam suɗsiya, may nam asay kay suɗ tuwamɗi su? Namu mi mulla vi Israyel, la nam jikay gaa'a kay gu-ma-grakŋa pa, nay ma vi hayamu.

⁴³Nam zam ɓam Lawna, hin Lawna suɗum wulini, la nam kiram ŋaa'a, kay nam di'e: Nanu mi goora vi Lawna.

⁴⁴Sa coŋcoloŋŋa sa ɓalay kat gu-ma-grakŋa hiɗi namna ŋulum nala kaw.

⁴⁵May hay leer ma karkiyana, jufunda li hay nagata pet, ta-ta leer ma zleeŋena.

⁴⁶Hay leer ma zleeŋena Yesu siwel hiɗi delem kulo ŋolo di'e: Eli, Eli, lama sabaktani! Kayn ala Lawna vanu, Lawna vanu, naŋ hinanawa kay mige?

⁴⁷Segena jar nisi sa ay hay liy namna hum kayni, nisi di'e: Nam ka yi Eliyas.

⁴⁸Wulini wulini kep jarsiya fok jaŋi, nam yaw sligara, nam jiyobom hay vinegrena, junum vun zugulla, vulum kulo'o mi Yesu kay nam ma cumu.

⁴⁹May segena di'e: Hinim tuwa, may ɗuwa la Eliyas co'o kay suɗum goyo klasige.

⁵⁰May Yesu siwel hiɗi delem kulo ŋolo, sukam sa'ata.

⁵¹May ɗuw na kayni, sligar kojolayna ma ɓuraw jar Tempella haway goy ma', kulo kalam pa ta-ta gaa dab', nagat wira, hiɗiyna mun goyo.

⁵²Vun-zulla mali goyo, tuwna vi sa peldetna ŋolo sa ay mitina dayay kulo'o.

⁵³Nisi cukay goy hay zulla pa, cuk kulo hay hoyok-ziyna ma peldetna bugol dayta-kulota vi Yesu, vul tuwsi kir sumun ŋolo.

⁵⁴May hay li ma mul ma sojen kalam kisna hiɗi nisi sa lakay ŋom Yesu wi wiira-nagata hiɗi sle ma lina, nisi muɗ nar ŋolo, nisi di'e: Gasi wete, san kayni mi goora vi Lawna.

⁵⁵Boyn ŋolo ka dakay goy gine'e hiɗi liy namna kay ɗuwa, nisi sa ay tapay kuɗ Yesu hay Galileya pa kay sunumu kaw.

⁵⁶Jarsiya ay Mariya Madelen, hiɗi Mariya sum Yakub, hiɗi Yoses, hiɗi sum gurona vi Sebedew.

⁵⁷May hay li ma vulatita coowa, sa ma farayna kepe hay Arimate, semda valam ala Yosef, nam kaw mi ma hatayna vi Yesu.

⁵⁸Nam kali tam Pilatus, jobom kay tuw Yesu. Pilatus vul hagata kay nisi ma slum tuwamu.

⁵⁹Yosef sli tuw Yesu, nam ɗutum hay sligar ma haɓ tal-talla,

⁶⁰Nam burum hay zul ma wulina, ma nam ceɗemu gaa'a jar hiɗiyna. Bugolda nam ligat hiɗiy ma ŋolla vun zulla, kaliya may.

⁶¹May Mariya Madelen hiɗi Mariya heta ka lakay gaa'a ɗiger vul zulda.

⁶²May hay buurta ka'ta, kayni ti buur ta bugol buura vi kotta, muliyan ŋulo sa-ɗifinna hiɗi sa Farisena* tapay kuɗ tuwsiya, kali tam Pilatus,

⁶³nisi di'e: Sam-ŋolla, humma guma kay va ma sa ma ɗut sumuna kayni dumu hay li ma nam ka iriya tuwa, kay nam di'e: Buur ɦidi nam ma day kulo'o.

⁶⁴Kay na'ta naŋ ma vulsi hagata kay nisi ma ŋom zulda ta-ta hay buurta ɦidita, kay la naɗi sa hatayna valam ɗawn ma co slum tuwam goyo, nisi ɗawn ma ɗut sumun ala nam dayawa kulo'o hay mitta pa, nala ɗutta ta bugolta ma li ŋol suw ta jewta.

⁶⁵Pilatus disiya: Sa gardena vigi ka'a, tuɗgi ŋomgi zulda ŋaa'a kuɗ donota vigiya.

⁶⁶Nisi kaliya, nisi lak vun zulda kay ŋoma'a, nisi duk vun hiɗiyn dono'o, lak sum sa ŋomda kaw.