Read Masana MATEWUS 28 Bible Online

MATEWUS 28 - Masana bible

MATEWUS 28

¹May hay li ma sabatn goboy vata, grawt culumta vi buurta dimasta, Mariya Madelen hiɗi Mariya heta kali kay ɗuw zulda.

²Ɗuw na kayni, wiira vi nagata ka li ŋolo; kay sunda-wuralawna vi Bum-Sumuna jikay gaa'a wuralawni pa, na'a ligat hiɗiyn goyo, musi kalamu.

³Sunda-wuralawn na'ta tuwa' ay ki wileta nala, sligara va'a haɓ tal-tali ki barawna nala.

⁴Sa gardena tuwsi tun caw visi bat-bat' kay narta, nisi muɗ ki nisi ay miti mit nala.

⁵May sunda-wuralawna sli ditiya di tam boyna: Ligi narɗi, nan wi ala nigi gar Yesu ma ɓalay kat gu-ma-grakŋa.

⁶Nam may tanɗi, nam dayay kulo'o ki nam di nala, nigiyaya, ɗuwgi liyn ma nisi burum hayamna.

⁷Tuɗgi goy gosoyo, digi tam sa hatayna valam ala: Nam dayawa kulo'o hay mitta pa, nam kali vokgi hay Galileya, goy ɗawni nigi ma wumu. Nan digiyawa.

⁸Gosoy wit', nisi kal goy tam zulda pa, hiɗi narta hiɗi firita ŋolda, nisi kali jaŋi, nisi vi labar namna mi sa hatayna.

⁹Ɗuw na kayni, Yesu co ŋafsi irsiya, nam di'e: Toyta tigiya, nisi ma talamu, vum gayamu, nisi girifimu.

¹⁰Hay na'ta Yesu disiya: Ligi narɗi, tuɗgi tam ɓosiyonna, nigi ma disi ala: Nisi ma kal hay Galileya, ɗawni nisi ma ŋaf hiɗi nanu.

¹¹May hay li ma nisi ay hay hagata, sa ŋomda co hay hoyok-ziyna, nisi di muliyan ŋulo sa-ɗifinna kay sle ma lina pet.

¹²Nisi dak hiɗi sa maariyana, nisi ŋra vunsiya, nisi vul gurjut ŋolo mi sojena,

¹³nisi disi lo ala: Nigi ma di goy ala sa hatayna valamu co hay henjeta, nisi kulum tuwam goyo hay li ma numa ka kali sene.

¹⁴La guverner hum van kaynawa, numa ma kus yoboyn talamu ta-ta nigi ma li narɗi.

¹⁵Hay na'ta sojena yaw gurjuta, li kuɗ va ma nisi hatsiya, dita kayni joki goy jar sa Yudiyana ta-ta hay fatta vaydita.

¹⁶May sa doogo yam kepna koray hay Galileya tam hiɗiyta ta Yesu di ka'ta.

¹⁷Hay li ma nisi wumu, nisi girifimu, may segena ay giriŋi.

¹⁸May Yesu ma tisiya, kus yoboyn tisiya di'e: Gaŋeraŋa pet hay wuralawna, kay nagat kaw vulanti manu.

¹⁹Kay na'ta nigi tuɗgi goyo, muɗgi jaf-sumun kaf goy sa hatayna, lisi baptisma hay semda vi Bumna, vi Goora, vi Ŋusta-Peldetta kaw.

²⁰Hatsiya kay vi kuɗ vun ma nan gatgi hiɗi namna pet, ɗuwgiya, nan ka hiɗi nigiya hay buura vigi kaf, ta-ta hay dabaŋ-gu'ta vi nagata.