Read Masana MATEWUS 5 Bible Online

MATEWUS 5 - Masana bible

MATEWUS 5

¹Hay li ma nam wi sumuna, nam jik kulo'o kay hiɗiyta, nam mus gaa'a. Sa hatayna valamu ma talamu.

²Nam mal vunam goyo hatsiya di'e:

³Sle'ta ka kay sa haw hay ŋusta, kay mulda-wuralawna kayni fisita.

⁴Sle'ta ka kay nisi sa tiy hay diksiya, kay nisi ma fi teŋ-irta.

⁵Sle'ta ka kay sa zigin-zlata, kay nisi ma yaw nagat voco'o.

⁶Sle'ta ka kay nisi sa mayt cisiya, laat lisiya kaw kuɗ garta ɗigerta, kay nisi ma hoba.

⁷Sle'ta ka kay sa slugona, kay nisi ma fi slugota.

⁸Sle'ta ka kay sa diksi ka goy peldete, kay nisi ma wi Lawna.

⁹Sle'ta ka kay sa tap jaara, kay nisi ma yisis gurona vi Lawna.

¹⁰Sle'ta ka kay nisi sa fi lastawa kuɗ ɗigerta, kay mulda-wuralawna kayni fisita.

¹¹Sle'ta ka kigiya hay li ma sumun ŋulgiya, ligi lasi, ka sin ma joon pet kigiya kaw kuɗan nanu.

¹²Firigiya hay dikgi ŋaa ŋolo, kay wurakŋa vigi ka ŋolo hay wuralawna, kay sa jobta-Lawna sa ay jewgin kaw nisi lassi ki kayn nala.

¹³Nigiya mi mandana[10] vi nagata. May la mandana muɗawa goy lemdeke, hot muɗum vi cet-cet' ɗawn hiɗi mige? Ŋaata valam kayni kay kom goyo, sumun tayam gaa kuɗ sesiya tuta.

¹⁴Nigiya mi haraŋa vi sa nagatna, hoyok-ziyn ma ka kulo kay hiɗiyta fi ŋay goyɗi.

¹⁵Fitilla san dom kayni kay kuluɓum gaa kuɗ duttaɗi, may tunum kulo kay va ma tun fitilla, ki kayn nala nam as vul haraŋa mi nisi kaf sa hay ziyna.

¹⁶Nala nigi kaw hingi haraŋa vigi wile goy vok sumuna, kay nisi ma wi lopna vigiya ma ŋaana, subur bugiya ma hay wuralawna kaw.

¹⁷Nigi ma var ala nan ma kayni kay ɓulak vun-ma-gatna hiɗi dita vi sa jobta nigi ma var naɗi. Nan ma kayni kay ɓulakamɗi, may kay hobom vunam kulo'o.

¹⁸Nan digi gasita, hay li ma dukalawna hiɗi nagata ka tuwa, slen ma ɗoy hay vun-ma-gatna va mara goor ne' kaw as jet goy kuɗumɗi, ta-ta vunam hob kaf tuwa.

¹⁹Kay na'ta la vun-ma-gatna ma kiɗayn kayni la sa hin mara kep goy kuɗumu, la nam hat sumuna kay li nala kaw, nisi ma yum ala ma kiɗayna hay mulda-wuralawna, may la san vi kuɗum kafe, hatam goy mi segena kaw, namu nisi ma yum ala ma ŋolla hay mulda-wuralawna.

²⁰Kay nan digiya: la ɗigerta vigiya may suw ɗigerta vi sa wi ɗota hiɗi sa Farisenɗina, nigi fi kal hay mulda-wuralawn noŋɗi.

²¹Nigi hum ala dit di tam sa ɓa-ɓana: Naŋ ma ci matɗi. Gigekaw ma ci mati, kitata ka kalamu.

²²May nanu, nan digiya: gigekaw ma muɗ ɦiy tam ɓasulumna, kitata ka kalamu. Gigekaw ma di tam ɓasulumna ala Raka,[11] kitata vi sa ɗiger-lawta* ka kalamu. Gigekaw ma di ala naŋ ɦay-ɦaya, kitata vi kuta ta tewɗita ka kalamu.

²³Kay na'ta hay li ma naŋ mar vulda vaŋu tam liyn ma ɗifinna, la hay liy namna humaŋ gaŋawa kay lawta ta ka jaraŋ hiɗi ɓasuŋŋa,

²⁴hinaŋ vulda vaŋis vok giwin-ma-ɗifinna, tuɗan kat ɓasuŋŋa, toygi jargi jew toy', bugol kayni hotaŋiya, laŋ vulda vaŋu may.

²⁵Toyaŋ jaraŋ hiɗi sa ma gawt kaŋŋa gosoyo, hay li ma nam ka hiɗi naŋ hay hagata tuwa, kay la naɗi sa ma gaw kaŋŋa ma vulaŋ goy tam sa ka kitata, sa ka kitata ma vulaŋ tam mul daŋgayna, nam ma gaŋ daŋgaya may.

²⁶Nan daŋ gasita, naŋ ma kal goy hay daŋgaynɗi, ta-ta naŋ ma wurak bal ma kaŋŋa kafe, la karaŋga kep kaw hinɗi.

²⁷Nigi humi ala dit di'e: naŋ li zlata-buloɗi;

²⁸May nan digiya, gigekaw ma ci porlay mi cata kay nam mina'a ni, nam li zlata-bulotawa hiɗi na'a hay dikam vatiya.

²⁹La iraŋ ta jufta kalaŋ hay nemda, hulota' goyo, ga' goy gine hiɗi naŋu, kay a iraŋ kep ɦawa ba'a, may tuwaŋ kaf kal hay kuta ta tewɗitɗi kayn ŋaa'a kaŋu.

³⁰La ɓaŋ ta jufta nemaŋu, ka' goyo, ga' goyo kaw, kay a ɓaŋ kep ba'a, may tuwaŋ kaf kal hay kuta tewɗitɗi kayn ŋaa'a kaŋu.

³¹Dit di kaw ala: Gigekaw ma gi cata valam goyo, nam ma vula' ɗerwelda ta ɗek ala jarsi muniya.

³²May nan digiya: la san gi cata valam goyo kuɗ law mara'a, may kuɗ lawta vi zlata-bulotɗi ni, nam muɗa'awa li zlata-bulo'o. La san sli cata giy-goyta ni, nam li zlata-bulo'o.

³³Lo nigi humi ala dit di tam sa ɓa-ɓan ala: Yi va kaŋ sin waaɗi, may va ma naŋ yum kaŋŋa naŋ ma hobom vunamu.

³⁴May nan digiya: Yigi va kigi noŋɗi, hiɗi wuralawnɗi kaw, kay namu mi zlamda-mulda vi Lawna,

³⁵yi va kigi hiɗi nagatɗi kaw, kay na'a mi va ma Lawn tun wur-selem kalamna, yi va kigi hiɗi Yerusalemɗi kaw, kay na'a mi hoyok-ziyna vi mul ŋolla.

³⁶Yi va kigiya hiɗi yigiɗi kaw, kay ɗuŋus ma kigina kep kaw ma nigi as muɗum haɓ mayɗi, ma nigi as muɗum wura mayɗi kaw.

³⁷May dita vigi ma li nala: la awa, awa; la a'a, a'a. La va ma suw kayni ka'a, nam may vi ma joon pa.

³⁸Nigi humi ala dit di'e: Ira kay ira, siyna kay siyna.

³⁹May nan digiya: Yawgi kulo'o kay sa ligi joonɗi, may la san caŋ kay galaŋ ma jufna, muɗum galaŋ ma gulla kaw.

⁴⁰La san min naraŋ vun kitata kay yaw sligara vaŋu, hinim yaw yaw sligar-tuwna vaŋ kaw.

⁴¹La san soŋ dono'o kay naŋ tuɗ kuɗum ir kilometre kepe, tuɗaŋis kuɗum ir kilometre ma'.

⁴²La san siɗawaŋ kay va'a, naŋ vulumta, la san min ni bal kaŋu, naŋ ma muɗ bugolaŋ talamɗi may.

⁴³Nigi humi ala dit di'e: naŋ ma min sugoloŋu, may naŋ ma ka gawt tam sa ma gawt kaŋŋa.

⁴⁴May nan digiya: mingi sa gawt kigina, gigi bolo kay nisi sa ŋulgiya, ligi ŋaat tam nisi sa ka gawt kigiya, siɗawgi kay sum sa curoɗgina hiɗi sa lasgina,

⁴⁵Kay nigi ma muɗ goy gurona vi bugiya ma hay wuralawna. Kay nam hin fatta valamu day kulo'o kay sa joona hiɗi sa ŋaana, nam hin niyn si gaa kay sa ɗigera hiɗi sa bay-ɗigera,

⁴⁶Kay la nigi minsi si sa mingina tuta ni, wurakŋa vigiya ka arige? Sa tar vun-lumuna kaw li kayn nala ɗisu?

⁴⁷La nigi gi deɓ kayn mi ɓosiyogin tuta ni, nigi li va ma suw segena su? Sa waan kaw li kayn nala ɗi su?

⁴⁸Kay na'ta nigi ma muɗ goy ŋaa'a pasiyak ki bugi ma hay wuralawna ka pasiyaki nala kaw.