Read Masana MARKUS 12 Bible Online

MARKUS 12 - Masana bible

MARKUS 12

¹Yesu tun caw law tisiya hay law ma nir-niramna ala: San kep pi gulda-guldan gaa'a, gi zlaɓ vunamu, jugoɗ zul ma kesl gulda-guldana, in simdira kaw, deŋem goy hay ɓam sa zumna, kali malam rogoyo. LB00103 Sine gulda-guldana

²Hay li ma liyn coowa, nam cuk sa sunda valamu kat sa li lop gulda-guldana kay fi ir galla valamu hay ɓisiya.

³Nisi vumu watamu, hinim kal hiɗi ɓalam ɦawa kaɗaŋ-kaɗaŋ'

⁴nam gi sa ma sunda mara'a katsi lo, namu nisi ŋulumu, cum kalamu kaw.

⁵Nam gi sa ma sem ɦidin lo, namu nisi cum goy mati, ki kayn nala segen lo nisi watsiya, segen lo nisi cisi goy mati kaw.

⁶Wulini hini kalam kayni mi goora valam ma hayam kalamna kepe, nam gum tisi bugol kafe hiɗi varta ta ala: Goora van ɗawni nisi ma li zulo kalam klasige.

⁷May sa zumna di jar-tuwsiya: Zawni mi goora ma yaw vocotna, cayt goyo, nala vocot ma muɗ vaya.

⁸Nisi vumu, cum goyo, gum hay vun-sinena.

⁹Wulini bum-sinena ma lum ɗawn mi mige? Nam ma ma'a, ci sum sa zumna goyo, vul sine gulda-guldana mi sum sara'a.

¹⁰Nigi bay jaŋ hay ɗot kayni noŋ su? Hiɗiyna ma sa in ziyna noyom goyna, Kayni muɗi mi hiɗiy ma ŋolla vi gef-ziyna.

¹¹Van kayni may goy vi Bum-Sumun pa, Mi va ma muɗay ɦuyum' ŋolo.[8]

¹²Nisi gar a vumu, may nisi li nar kay sumuna, kay kirsi ta ala nam di law ma nir-niramna namna kayni kisiya. Nisi hinimu, kali goyo.

¹³Nisi cuk segen sa Farisena* hiɗi sa Sadusena* talamu kay nisi ma vum hay lawta hiɗi dita valamu.

¹⁴Hay li ma nisi maawa, nisi dumu: Bum-yalla, numa wi'e naŋ sa ma di gasita, naŋ may li nar kay saɗi, naŋ ɗuw san kuɗ tuwam ma goy jiynɗi, naŋ hat hagata vi Lawn hay liya'a kaw. Ki kayn nala hagat ka kay vul taara mi Cesar lebo mayɗi su? Numa as vulum taara lebo vulumɗi su?

¹⁵Hay li ma Yesu wi mileta visi wina, ka disi ala: Nigi neman kay mige? Marangi denariyus* kep tige, nan min ɗuwa' tige!

¹⁶Nisi maram denariyus* kepe. nam disiya: Hayam damni yam gige hiɗi ɗota vi gige? Nisi dumu: vi Cesar.

¹⁷Yesu disiya: Vulgi mi Cesar slena vi Cesar, vulgi mi Lawna slena vi Lawna may. nisi muɗ ɦuyum ŋolo kuɗumu.

¹⁸Sa Sadusena* sa di ala dayta-kulota tayɗina ma talamu, nisi jobom ala:

¹⁹Bum-yalla, kayni mi va ma Musus ɗom tuma'a: La san mitawa, hin cata valamawa bay gooro, ɓasulumna ma musa'a kay vuɗum goor selemu.

²⁰Wulini ɓosiyom-tuwsin ay siɗiya: ma jewna sli cata, nam mit bay vuɗ goor hiɗi na'a.

²¹ma ma'na va'a, nam mit bay hin goor bugolom kaw, ma ɦidina nala kaw.

²²Jarsi siɗiya kaf lakŋi ma hin goor mayɗi. Bugolsi kaf cat mitiya kaw.

²³May hay dayta-kulota ɗawni, jarsi kaf lakŋi na' ma mus cat kuɗ marige? Kay nisi kaf joka' kuɗsi ca'a?

²⁴Yesu disiya: Kay na'ta nigi viy goyo, kay nigi wi ɗotɗi, wi donota vi Lawnɗi kaw, naɗi su?

²⁵Kay hay dayta-kulota, jufayn as yaw boyɗi caɗi, boyna as yaw jufayɗi kaw, may nisi ma muɗ ki sunda-wuralawna nala.

²⁶Kuɗ lawta vi sa mitina hiɗi dayta-kulota visiya, nigi bay jaŋ hay ɗerwelda vi Musus tuwa su? Hay li ma nam ka goboy hiɗi gu-ma-zigiyna, Lawn dum ala: Nanu mi Lawna vi Abraham, Lawna vi Isaak, Lawna vi Yakub kaw.

²⁷Lawna may mi Lawna vi sa mitinɗi, may mi Lawna vi sa irina. Nigi viy goy ŋolo.

²⁸Sa kep jar sa wi-ɗota wi Yesu ci way hiɗi sa Sadusen* zaw. Hay li ma nam wi ala Yesu hotsi dit ŋaa'a, nam ma tam Yesu jobom ala: Vun-ma-gatna ma ŋol jaram suw kafna mi marige?

²⁹Yesu hotom dit ala: Vun-ma-gatna ma ŋolla kayni: Humgiya nigi sa Israyella, Bum-Sumuna Lawna vaya, Bum-Sumuna ka kepe.

³⁰Naŋ ma min Bum-Sumuna Lawna vaŋu hiɗi dikaŋ kaf, hiɗi ciwta vaŋ kaf, hiɗi varta vaŋ kaf, hiɗi donota vaŋ kaf.

³¹Ma ma'na kayn ala: Naŋ ma min sugoloŋu ki tuwaŋ nala. Vun-ma-gatna mara ma ŋol suwum nam lakŋi mayɗi.

³²sa ma wi ɗota hot di mi Yesu ala: Kayn ŋaa'a ŋolo, bum-yalla, va ma naŋ dum zawn hay liyamu. A Bum-Sumuna mi nam kepe, Lawn mara ma ki nam nala mayɗi kayn hay liyamu,

³³a san minim hiɗi dikam kafe, hiɗi yalla valam kaf, hiɗi donota valam kaf, a san min sugolomna ki tuwam nala kaw, kayni suw ɗifin ma ŋal-goyna hiɗi ɗifin mige pet.

³⁴Hay li ma Yesu wi ala nam hot dit hay liya'a, nam dumu, naŋ may goy gine'e hiɗi mulda-Lawnɗi. Hay na'ta sa ma tos iram kay jobom va may loɗi.

³⁵Hay li ma Yesu ka hat hay Tempella, nam sli ditiya di'e: Sa wi-ɗota fi di ala Kristu nam mi goora vi David kayn litige?

³⁶David kay tuwamu hay Ŋusta-Peldetta nam di ala: Bum-Sumuna di tam Bum-Sumuna vanu, Musaŋ gaa'a hay galan ta jufta, ta-ta nan ma cuk sa gawt kaŋŋa gaa kuɗ wur-seŋu.[9]

³⁷David kay tuwamu yum ala Bum-Sumuna; nala nam muɗ goora valam ɗawn muɗtige? Sumun ŋolo hum yoboyna valam hiɗi firita.

³⁸Hay hatta valamu nam ka disi ala: Ligi ŋali hiɗi sa wi-ɗota, nisi sa dar a poy hiɗi sligar-fiyokŋa, min gi-deɓta hay lumuna,

³⁹min mus ma vokŋa hay sinagogayna*, min lak voko hay yuldeta kaw.

⁴⁰Nisi sa yaw slena vi boy sa duhulla, nisi siɗaw siɗawta fiyokka kay sumun ma wisiya. May nisi ma fi sum-zlata ŋolda.

⁴¹Nam musi gaa vun timgil ma nisi cuk vulda hayamna ɗiger. Nam ɗuw sumun ka cuk gurjuta hay timgilla, sa farayn ŋolo ka cuk ŋolo kaw.

⁴²May cata duhulta ma'a, na' cuk gurjut gurayt ma', kayni ir karaŋga kepe.

⁴³Yesu yi sa hatayna valamu ka disiya: Nan digi gasita: cata duhulta ta hawta zawni, sum sa cuk hay timgilla kaf na' cuk suwsiya;

⁴⁴Kay nisi kaf cuk kayni kuɗ asta visiya, may na'a, hiɗi hawta va' pet, na' cukum mi sle ma ŋom ŋil tuwa'na kaf, ma as guta'na kaf.