Read Masana MARKUS 14 Bible Online

MARKUS 14 - Masana bible

MARKUS 14

¹Yuldeta vi paskata hiɗi fun-bay-kufna ka li hay buur ma' bugolda. Muliyan ŋulo sa-ɗifinna hiɗi sa wi-ɗota gar yali kay vi Yesu hiɗi nilamda kay cum goyo kaw.

²May nisi di'e: vum hay buura vi yuldetɗi, kay sumun ɗawn ma ɦilay kulo jar-tuwsiya.

³Hay li ma Yesu ay hay Betaniya, hay ziyna vi Simon ma kuturuna, hay li ma nam mus ti'e, cata kep kali kalafi hay li ma nam ka ti'e, na' ka hiɗi urdina nard ma ŋaana ma gusta valam lop ŋolo, na' malam vunam goyo, ɦok urdina kay Yesu.

⁴May segen jarsiya muɗ ɦiya di'e: ɦok mula goy nala kay mige?

⁵Urdin kayni gusum gusi goy ir denariyus* kis-ɦidi kay vulum mi sa hawna kayni may asɗi su? Nisi law cat ŋolo.

⁶May Yesu di'e: Hingi cat hinge. Nigi muɗa' bisi kay mige? Na' li lop ma ŋaanawa tanu.

⁷Kay sa hawna ka hiɗi nigi dok-doko, hay li ma nigi mina, nigi fi lisi ŋaa'a, may nanu nan may hiɗi nigi dok-dokɗi.

⁸Na'a li va ma na' as a lumna, na'a setan tuwanawa kay pita vanu.

⁹Nan digi gasita, hay nagata pet, arigekaw ma labara ma firina ma kusis hayana, va ma cat kayni li'e labaram ma diys goyo, kay sumuna humsi ma gisi ka'a.

¹⁰Yudas Iskariyot kep jar sa doogo yam ma'na kali tam muliyan ŋulo sa-ɗifinna kay di newt kay Yesu.

¹¹Hay li a nisi hum kayni, diksi li firiya, nisi dum ala nisi min vulum gurju'u kaw. Yudas gar hagata kay vulsi Yesu.

¹²Hay buurta jewta hay yuldeta vi fun-bay-kufna, hay li ma nisi ŋat goor ɦu-dimin paskana, sa hatayna valamu dumu: Naŋ min ala numa ma tuɗ kay kot liyn kay naŋ fi ti goor ɦu-dimi paskana arige?

¹³Nam cuk sa hatayna valam ma' sunu disiya: Tuɗgis hay hoyok-ziyna, ɗawni nigi ma ŋaf hiɗi sa ma ziy genda niyna kepe, tapgi kuɗ sa namna.

¹⁴Hay li ma nam kalawa vo hay ziyna, nigi ma job tam bum-ziy namna ala: Bum-yalla ka job ala ziyda ta nam ma ti goor ɦu-dimi paskana hiɗi sa hatayna valamu haya'ta ka arige?

¹⁵Nala nam ma ɗekgi kay ziyda-ŋolda ta kulota, ta ka koti kot, nigi ma kotay tin ma paskana hay ziy na'ta.

¹⁶Sa hatayna kaliya, nisi co hay hoyok-ziyna, nisi fi slen ki bum-ziyna visi disi nala, nisi kot tin ma paskana.

¹⁷Hay li ma vulatita coowa, nam cooya hiɗi sa doogo yam ma'na.

¹⁸Hay li ma nisi lak gaa kay ti'e, Yesu disiya: Nan digi gasita, kep jargiya ma di newt kanu, nam mi ma ka ti hiɗi nan damni kaw,

¹⁹nisi tun caw yor tuwsiya, gigekaw ala mi nan su mi nan su.

²⁰Nam disiya: Mi san kep jar sa doogo yam ma'na, namu mi ma ka do fun hiɗi nan hay tasat kep damni.

²¹Kay goora vi sana ma vulis goyo ki ɗot ɗo'ay kalam nala, may joot kay sa ma di newt kay goora vi sana, san kayni lali vuɗ vuɗi goyɗin ŋaa suwa.

²²hay li ma nisi ka ti'e, nam sli fun kepe, gi bolo, ɓurawamu vulsiya di'e: Yawgita, kay kayni mi tuwanu.

²³nam sli kaway-ma-cina, gi deɓe vulsiya, nisi kaf ci hayamu.

²⁴Nam disiya: kayni mi busuwanu, busuwna vi bonota ma ɦokay goyo kay sumun ŋolo.

²⁵Nan digi gasita, tun cawis wulin pa nan ma ci vuɗ gulda-guldan loɗi, ta-ta hay buur ma nay ma cum kuɗ tuwaya hay mulda-Lawna.

²⁶Hay li ma nisi gi nul ma gi-deɓta gina, nisi koray gal hiɗiyta Olive.

²⁷Yesu disiya: Nigi kaf ma hora, kay ɗot di ala: Nan min ci sa ma ŋomda goyo, fok-dimina ma mera may.[10]

²⁸May hay li ma nan dayawa kulo'o, nan ma kalis vokgi hay Galileya.

²⁹May Peter di'e: La segen kaf hora, nan hayɗin as hor noŋɗi.

³⁰Yesu dumu: Nan daŋ gasita, vaydi hay henjet zawni, jew a slek-gulokŋ hel sem ma', naŋ ma puw vunaŋ kan sem hiɗi.

³¹May Peter so vunam goy ba' di'e: La nan mit man hiɗi naŋ kaw, nan as puw vunan kaŋɗi. Nisi kaf ka di kayn nala.

³²Hay li ma nisi co tam liyn ma yum Getsemani, nam di tam sa hatayna valamu: lakgi gaa tani, nan min tuɗ goyo kay siɗaw Lawna.

³³nam yaw Peter hiɗi Yakub hiɗi Yohana kuɗumu, tuwam tun caw li nari, nam tun caw yor tuwam ŋolo.

³⁴Nam disiya: Ciwta vanu ka yor ŋolo ta-ta hay mitta, lakgi tani jigere.

³⁵Bugolda nam ɦur vokom neeɗa, gi tuwam gaa kay nagata, ka siɗaw ala: La van fi li'e, hin leera namna jik goy kalamu.

³⁶Nam di'e: Baba bunu, slen pet naŋ as kalamu, kaway-ma-cina namna naŋ hinim raw goy kan rawge, may nir na'ta kep kuɗ minda vanɗi, may kuɗ minda vaŋu.

³⁷Nam ma'a fisi cuki sene. Nam di tam Peter: Simon, naŋ kal sen su? Naŋ as mus iri ir leer kep noŋɗi su?

³⁸Lakgi jigere siɗawgiya, kay nigi ma kal hay nemdaɗi, ŋusta mina, may sliwna maŋaya.

³⁹Nam kal goyo, siɗaw lo, dum mi yoboy ma nam dum jewna lo.

⁴⁰Nam hotay lo fisi buri sene, kay irsi muɗi nek zil'; nisi wi va ma nisi hot dit talam hiɗi namnaɗi.

⁴¹Nam hotay tisi selem ɦidita lo, fisi buri sene. Nam disiya, kalgi sen migi wulin yo, wulini goora vi sana ma vulis goy hay ɓam sa sulukŋa.

⁴²Yawgi kulo'o, tuɗaya; nam ma min di newt kanu ka tuɗay ɗaw.

⁴³Wulini wulini hay li ma nam ka di yoboyn tuwa, Yudas, kep jar sa doogo yam ma'na, coowa hiɗi sumun kuɗum ŋolo, nisi ka hiɗi kew-gaferaŋa hiɗi zugulayna, nisi may goy vi muliyan ŋulo sa-ɗifinna hiɗi sa wi-ɗota hiɗi sa maariyani pa.

⁴⁴nam ma di newti kalamna disi goy jew ala: Nam ma nan ŋaf vunan hiɗi namna ɗawni mi namu, nigi ma vumu, tuɗgi hiɗi namu, ŋomom ŋaa'a.

⁴⁵Hay li ma nam coowa kayni, nam ma goboy tam Yesu, ka dum ala: Rabbi. Nam bow Yesu.

⁴⁶ki kayni nala nisi ŋuy Yesu, nisi vumu.

⁴⁷Kep jar nisi sa ay kuɗumna pat kew-gaferaŋa valamu goyo cal sa ma sunda vi mul-ma-ɗifinna hay humamu, puratam humam goyo.

⁴⁸Yesu sli ditiya disiya: Nigi ki nigi min vi sa ma coŋcoloŋŋa, nigi ka hiɗi kew-gaferaŋa hiɗi zugulayna kay vanu kayn litige?

⁴⁹Fatta kaf nan ka musi hiɗi hay Tempella kay li hatta, may nigi vanɗi, may kayni li'e kay ɗota vuna' ma hoba.

⁵⁰Nisi kaf hinimu, piriya may.

⁵¹sa ma joriyona kep tuɗ kuɗumu, bari talam mi ladarana ɦawa'a, nisi vumu;

⁵²may nam hinsi ladarana, piri jaŋ goyo nala'a.

⁵³Nisi tuɗ Yesu tam mul ŋol ma-ɗifinna, hay li namna muliyan ŋulo sa-ɗifinna, sa maariyana hiɗi sa wi-ɗota kaf tok tuwsiya,

⁵⁴Peter ka tuɗis goyo bugolomu gine'e, ta-ta kalaf hay wur-daŋŋa vi mul ŋol ma-ɗifinna, nam ka musi gaa'a hiɗi sa ŋomda, nam ka hol tuwam vun kuta.

⁵⁵Muliyana ŋulo sa-ɗifinna hiɗi sa ɗiger-lawta* kaf gar di-goyta ta sinda kay Yesu kay cum goyo, may nisi fi va noŋɗi.

⁵⁶Kay sumuna ŋolo ka ka sinda kalamu, may di-goyta visiya may tap kuɗ tuwamɗi.

⁵⁷segena yaw kulo'o li di-goyta ta sinda kalam ala:

⁵⁸Numa humum law ala: Tempella ma ini hiɗi ɓam san zawni nam min ɦom gaa'a, hay buur hiɗi nam min in Tempel mara'a kulo'o, ma may koti hiɗi ɓam saɗi.

⁵⁹Nir na'ta kepe di-goyta visiya may tap kuɗ tuwa'ɗi.

⁶⁰Mul ŋol ma-ɗifinna fok kulo'o jar tokŋa, ka job Yesu ala: Naŋ may hot dit kay va ma sumun ka dum kaŋŋaɗi su? Va ma sumun ka dum kaŋŋa kayn mi mige?

⁶¹Yesu col ŋal kiliŋ, min di va noŋɗi. Mul ŋol ma-ɗifinna ka job Yesu lo ala: Naŋ mi Kristu Goora vi Bum-Bolda su?

⁶²Yesu hot dita: Nanu mi namu. Nigi ma wi goora vi sana musi hay gal ɓam ma jufna vi Ma gaŋeraŋ-Petna, nam ma co'o jar ɗugulla ma dukalawna kaw.

⁶³Wulini mul ŋol ma-ɗifinna jet sligara valam goyo di'e: Nay gar sa di-goyta lo kay lum hiɗi nisi mi mige?

⁶⁴Nigi kay tuwgi hum ŋolda valamawa. Nigi var anige? Nisi kaf ka kitat kalam ala nam nagay mitta.

⁶⁵Segena tun caw tufum nene kalamu, kusuɓum iramu, cum kutopoŋŋa kaw, dum ala: daŋay tige. sa sunda cum geliyamu.

⁶⁶Hay li ma Peter ka gaa hay wur-daŋŋa, goota ta vo vi mul ŋol ma-ɗifinna kep ma'a.

⁶⁷Na' wi Peter hol tuwam vun kut zaw, na' cuk ira' kiram ŋiresl' ka dum ala: Naŋ kaw, naŋ ay hiɗi Yesu ma Nasaretna.

⁶⁸Nam puw vunamu ka di ala: Nan may wiɗi, va ma nak dumna zawni nan may humum cawamɗi. Bugolda nam kali goyo kuɗ diɓira.

⁶⁹Goot-cat na'ta wum mara lo, na' tun caw di kayni mi sa tokayna ala, zawni mi sa ma kuɗ sum nisina.

⁷⁰Nam puw vunam kay kayn lo. Mus neeɗa bugolda sa tokayna di mi Peter ala: Gasiya, naŋ kaw jar sum nisina. Kay naŋ mi sa ma Galileyana, naŋ law kisi nisi nala.

⁷¹May nam tun caw beɗ tuwamu, sumal tuwam kaw ala: Sa ma nigi di kalamna kayn nan may wumɗi.

⁷²Wulini wulini slek-gulokŋ hel sem ma', Peter humam gum kay dita vi Yesu ta ala: Jew a slek-gulokŋ hel sem ma', naŋ ma puw vunaŋ kanu sem ɦidi. Hay li ma nam var kay kayni, nam tun caw tiya.