Read Masana MARKUS 15 Bible Online

MARKUS 15 - Masana bible

MARKUS 15

¹Hay graw culum culum, muliyan ŋulo sa-ɗifinna ŋra vunsi hiɗi sa maariyana, hiɗi sa wi-ɗota hiɗi sa ɗiger-lawta* kafe. Nisi jun Yesu, kalam goyo, vulum hay ɓam Pilatus.

²Pilatus jobomu: Naŋu mi mulla vi Yudiyana su? Yesu hotom dit ala: Naŋ di hay liyamu.

³Muliyan ŋulo sa-ɗifinna tun lawt kalam ŋolo.

⁴Pilatus ka jobom lo ala: Naŋ hot dit noŋɗi su? Law ma nisi pum kaŋŋa kaf kayn naŋ ka wum su?

⁵May Yesu min hot dit noŋɗi, nala Pilatus muɗ ɦuyum'.

⁶May hay buura vi yulden kaf, Pilatus gisi sa ma nisi siɗawam kalamna goy kep kep.

⁷Hay na'ta sa mara ay hay daŋgayn kep yum Barabas. Nam ay giy daŋgay hiɗi sum segena, kay mige nisi fok lawta, hay law na'ta nisi ci sa kep goy mati.

⁸Sumun jik kulo'o, kali talamu kay nam vulsi va ma nam ka lum tisi dok-dokŋa.

⁹Pilatus hotsi dita: Nigi min ala nan ma gigi mulla vi Yudiyan su?

¹⁰Kay nam wi ala muliyan ŋulo sa-ɗifinna vul Yesu goy hay ɓalam kayn kuɗ hunayta.

¹¹May muliyan ŋulo sa-ɗifinna gi yam sumuna, kay nisi siɗawamu kay nam ma vulsit goy mi Barabas.

¹²Pilatus hot dit tisi lo di'e: Nigi min ala nan ma lum mi mige hiɗi nam ma nigi yum ala mulla vi Yudiyana?

¹³Nisi siwel lo ala: Ɓalam kat gu-ma-grakŋa.

¹⁴Pilatus disiya: Kay mige? Nam lum joon mi mige? May nisi siwel ŋolo suwa ala: Ɓalam kat gu-ma-grakŋa.

¹⁵kay Pilatus min sleɗ hay sumuna, nala nam gisi Barabas goyo; bugolda nam vul hagata kay nisi wat Yesu, nam vulum kay nisi tuɗ ɓalam kat gu-ma-grakŋa.

¹⁶Sojena kal Yesu kalafi hay wur-daŋŋa, kayn di ala Pretoriyum*, nisi dak sa gardena kafe.

¹⁷Nisi cukum sligara purpel talamu, nisi cil bogoray ma zigiyna, tunumti kalamu.

¹⁸Nisi tun caw gum deɓe, dum ala: Gaŋ deɓawa, mulla vi Yudiyana.

¹⁹Nisi watam kalam hiɗi libetna, tuf nenen kalamu, cuk ŋulofsi gaa'a kay girif gaa vokomu.

²⁰Bugol nisi ŋulum ŋulla, nisi fok sligar purpella goy talamu, cukum sligara valamu, kalam goyo kay ɓalam kat gu-ma-grakŋa.

²¹Nisi ŋaf hiɗi sa ma may goy hay sinen pa, Simon ma Sirene, bum Aleksander hiɗi Rufus, namu nisi vum hiɗi dono'o kay ziy gu-ma-grakŋa vi Yesu.

²²Nisi kal Yesu hay liyn ma yum ala Golgata, kayn min di ala liyn ma zok-ta'ara.

²³Nisi vulum vinna a ci'e, rigasay hiɗi miir, may nam min cumɗi.

²⁴Nisi ɓalam kat gu-ma-grakŋa, sligara valamu nisi ɓurawam jarsiya, ŋaɓam kuɗ ɦayta, kay wi va ma san gigekaw as yawa.

²⁵Nisi ɓalam kat gu-ma-grakŋ kayni hay leer ma ɦidina.

²⁶Va ma nisi ɓalam kat gu-ma-grakŋa kalamna ka ɗo'ay ala: MULLA VI YUDIYANA.

²⁷Nisi ɓal sum sa coŋcoloŋ ma' hiɗi namu, kep hay galam ma jufna, kep hay galam ma gulla may.

²⁸Nala ɗota ta diy ala nam ŋaɓay jar sa jiw-zlata vuna' hobawa.

²⁹Sum sa jik hay hagata ŋulumu, gila yisi talam kaw, nisi di ala: Haha! Waŋŋi mi naŋ sa ma di ala naŋ min ɦo Tempella gaa'a, hot inim kulo'o hay buur ɦidin ɗisu?

³⁰Suɗaŋ tuwaŋ kay tuwaŋu, jikaŋay gaa kay gu-ma-grakŋa pa yoge!

³¹Muliyan ŋulo sa-ɗifinna kaw hiɗi sa wi-ɗota ka buraham jar-tuwsi ala: Nam suɗ sum segen goyo, may nam asay a suɗ tuwam namɗi may su?

³²Hin Kristu mulla vi Israyel jikay gaa'a pa wulini, kay nay fi wumu, vi hayamu kaw. Nisi sa ɓalay kat grakŋa hiɗi namu ŋulumu.

³³Hay leer ma karkiyana, jufunda li gaa kay nagata ta-ta hay leer ma zleeŋena.

³⁴hay leer ma zleeŋena, Yesu siwel hiɗi delem kulo ŋolo ala: Eloy, Eloy, lama sabaktani? Min di ala: Lawna vanu, Lawna vanu, naŋ noyonawa goyo kay mige?

³⁵May sara'a jar nisi sa lakay goboy lakŋa, hay li ma nisi hum kayni, nisi di'e: Humgiya, nam ka yi Eliyas.

³⁶sa kep kal jaŋi, nam yaw sligara, jiyobom hay vinegrena, junum vun zugulla, vulum mi Yesu a ci'e. Nisi di'e: Hinim tuwa haw', la Eliyas as co'o kay jikimay gaa'a klasige.

³⁷May Yesu siwel ŋolo, bugolda sukam sa'ata.

³⁸Sligar ma hay Tempella iram jet gaa ma', kulo pa ta-ta gaa'a.

³⁹Hay li ma mul ma sojen kalam kisna ma ka colay goy ɗiger vok Yesu wi ala sukam sa'atawa, nam di'e: Gasiya, san kayni mi goora vi Lawna.

⁴⁰Boyna kaw ka ɗuway goy gine'e pa. Jarsiya ay Mariya Madelen, Mariya sum Yakub ma goora hiɗi Yoses, hiɗi Salome,

⁴¹nisi sa ay tapay kuɗumu sunum kaw hay li ma nam ay hay Galileya, hiɗi segena ŋolo sa jik kulo hiɗi namu hay Yerusalem.

⁴²Hay li ma vulatita liyawa, kay kayni mi liyn ma kotta, kayn di ala buurta ta jew sabatna,

⁴³Yosef ma Arimatena, sa ma sumun tiyim selem ŋolo jar sa sa ɗiger-lawta*, namu mi sa ma ka cub mulda-Lawna kaw, nam co'o. Nam tos iramu, kal kalaf tam Pilatus, jobom kay tuw Yesu.

⁴⁴Pilatus muɗ ɦuyum' kay Yesu miti gosoyo, nam yi mul ma sojen kalam kisna, jobom ala Yesu mit kayn musi ŋol su?

⁴⁵Hay li ma nam vi labara vun mul ma sojen kalam kisna vina, nam vul tuw Yesu mi Yosef.

⁴⁶Yosef gus sligara ma haɓna, nam sli tuw Yesu ay gaa'a kay gu-ma-grakŋa pa, ɗutum hiɗi sligara, burum gaa'a hay zulda ta nisi jugoɗa goy jar hiɗiyna pa, nisi ligat hiɗiyn vun zul na'ta.

⁴⁷Mariya Madelen hiɗi Mariya sum Yakub ka ɗuw liyn ma nisi burum hayna.