Read Masana MARKUS 16 Bible Online

MARKUS 16 - Masana bible

MARKUS 16

¹Hay li ma sabatna vatawa, Mariya Madelen, hiɗi Mariya sum Yakub hiɗi Salome gus aromatna* kay tuɗ yamam kay tuw Yesu.

²Graw culumta, kayn min di ala hay buurta jewta, buurta vi dimasta, nisi co vun zulda, kayni hay li ma fatta dayaya.

³Nisi di jar-tuwsi ala: Sa ma ligatay hiɗiyn goy vun zulda ɗawn mi gige?

⁴Nisi poŋ irsi kulo nala kayni, hiɗiy ma ŋol namna ka ligatay goy vun zulla.

⁵Hay li ma nisi jik gaa hay zulda, nisi wi sa ma joriyo dam', cuki hiɗi sligar ma haɓ talam ca', nala nisi muɗ nari.

⁶Nam disiya: Ligi narɗi, nigi garam kayn mi Yesu ma Nasaretna, ma nisi ɓalam kat gu-ma-grakŋa; nam dayay kulo'o, nam may tanɗi, ɗuwgi liyn ma nisi burum hayamna tige.

⁷May tuɗgiya di tam sa hatayna valamu hiɗi Peter ala nam kalis vokgi hay Galileya, ɗawni nigi ma wumu, ki nam kay tuwamu di tigi nala.

⁸Nisi cukay goy hay zulda pa, kali goy jaŋi hiɗi tuwsi visi bat-bat'; ŋalda visi tay tisi loɗi, may nisi min di kayn mi sa noŋɗi kuɗ narta.

⁹May hay li ma Yesu day kulo'o hay buurta jewta vi lumuta,[11] nam vul tuwam jewe kir Mariya Madelen, na'a ta nam digiɗ fuliyan siɗiya goy ka'ta,[12]

¹⁰Na' kaliya, tuɗ labara tam nisi sa ay hiɗi namu, nisi sa ka ti do'olo ka tiya kaw.

¹¹hay li ma na' disi ala Yesu ka iriya, na' kaw wum hiɗi ira'a, nisi min vi kaynɗi.

¹²Bugol kayni nam vul tuwam ir jafam valam lo kir segen jarsi ma', sa ka hay hagata kay tuɗ goy hay sinena.

¹³Nisi hotay bugolsiya vi labar namna mi segena, nisi min vi dita visiɗi kaw.

¹⁴Bugolda nam vul tuwam kir sa doogo yam kepna hay li ma nisi lakay ti'e, nam lawsiya kay bay-vida visiya hiɗi so'otta vi diksiya, kay nisi min vi kuɗ sum sa disi kay dayta-kulota valamnaɗi.

¹⁵Bugol kayni nam disiya: Tuɗgi hay nagat kuɗulu, kusgi labara ma firina tam sum sa Lawn kotsin kaf.

¹⁶sa ma vi'e, fi baptisma kaw, nam ma fi su'da. May sa ma viɗina, kitata ma tun kalamu.

¹⁷Kayni ti ɗekka ta tap kuɗsit ɗawni: Hay semda vanu nisi ma digiɗ fuliyan goyo, nisi ma di hiɗi vun ma wuliya,

¹⁸nisi ma yaw guyn hay ɓisiya, la nisi ci gu ma ci san mati kaw, nam ma lisi joo'o noŋɗi, nisi ma bar ɓisi kay sa moyna, sa moyna ma yer goyo may.

¹⁹Wulini Bum-Sumuna Yesu, bugol nam kus yoboyn tisi kusna, slumis kulo'o hay wuralawna, musi hay gal ɓam ma jufna vi Lawna.

²⁰Nisi kali goyo kus yoboyn hay liyn kaf. Bum-Sumuna ka li lop hiɗi nisiya, nam ka hob vun dita valam tisiya hiɗi ɗekka ta nisi ka li'e.