Read Masana MARKUS 3 Bible Online

MARKUS 3 - Masana bible

MARKUS 3

¹Nam kal hay sinagogŋa* mara lo. Sa ma ɓalam keŋkeleŋŋa ay hay liy namna dam'.

²Nisi ka cigeɗ Yesu ala, la nam fi yerem goyo hay buura vi sabatna klasige, kay nisi fi mar lawt kalamu.

³Yesu di tam sa ma ɓalam keŋkeleŋŋa ala: fokaŋ kulo'o, colaŋ kulo jar sumun tani.

⁴Nam disiya: vun-ma-gatna min ala hay buura vi sabatna san ma lum mi va ma ŋaa'a lebo va ma joo'o su? A suɗ irita vi sana lebo hina' ba goy su? May nisi lak kiliŋ.

⁵Nam cuk iram kisiya, muɗ ɦiya, nam yor tuwam kay yisi ma ɗeŋ ŋolla. Nam di tam sana: meɗaŋ ɓaŋ goyo, nam meɗ ɓalam goyo, na' muɗ goy ŋaa'a de'.

⁶Sum sa Farisen* cuk goy jiya, nisi ŋra vun-tuwsi gosoy wit hiɗi sa Herodiyana* kay gar yal ma bam iram goyo.

⁷Yesu hot hiɗi sa hatayna valam goy kel niy-lumna, sum sa Galileyan ŋolo tuɗ kuɗumu,

⁸Sum sa Yudana, sa Yerusalemna, Sa Idumiyana, sa goy gal bugol vi Yordan hay galla vi Tirus hiɗi Sidon, sumun ŋolo hay li ma nisi hum labara kay slen ma nam ka lumna kaf, nisi ma talamu.

⁹Nam di tam sa hatayna valamu kay nisi ma musum hay goor lum tara kepe, kay sumuna ma hebem kuloɗi.

¹⁰Kay nam ka yer sumun goy ŋolo, kuɗ na'ta nisi sa ka hiɗi moyna hebem kulo'o kay jomu.

¹¹Hay li ma fuliyan ma liwisna wumu, nisi girif gaa vok Yesu, siwel ala: naŋu mi Goora vi Lawna.

¹²May Yesu lawsi hiɗi dono'o ŋolo, nam disi ala nisi ma ɗek sumun goy kalamɗi.

¹³Bugolda nam jik kulo hay hiɗiyta, nam yi sa nam min yisina, nisi ma talamu.

¹⁴Nam vilek sara goy doogo yam ma', kay nisi ma lak hiɗi namu, kay nam fi cuksi goyo kay kus yoboyna,

¹⁵kay cuksi goy kus yoboyna hiɗi gaŋeraŋa kay digiɗ fuliyan ma joon goyo.

¹⁶Kayni semda vi sa doogo yam ma' sa nam vileksi goyna: Simon ma nam kaam semda valam ala Peter,

¹⁷hiɗi Yakub goora vi Sebedew, hiɗi Yohana ɓasum Yakubna, nisiya nam kaasi gileta visi ala Buwanerge: kayn ala gurona vi law-ma-bayna,

¹⁸hiɗi Andre hiɗi Filip, hiɗi Bartelemi, hiɗi Matewus hiɗi Tomas, hiɗi Yakub goora vi Alfewus hiɗi Tadewus, hiɗi Simon ma Kanaaniyana,

¹⁹hiɗi Yudas Iskariyot sa ma di newt kalamna.

²⁰Bugolda nisi hotay vo'o, sumun tok mara lo, ta-ta muɗ kayni nisi fi fu ma tiɗi.

²¹Hay li ma sa hay jafna valamu hum kayni, nisi cukay goyo kay vumu, kay nisi di'e: Nam guruɗi goyo.

²²Sa wi-ɗota sa may kulo Yerusalem pana di'e: Beelzebul ka kalamu, kay nam digiɗ fuliyan goy kayni hiɗi mulla vi fuliyana.

²³Nam yisi talamu, law tisi hiɗi law ma nir-niramna ala: Satan fi digiɗ Satan goyo ir nanige?

²⁴La mulda dur jar-tuwa'a, na' fi musɗi!

²⁵La ziyna dur jar-tuwamu, nam fi musɗi.

²⁶La Satan fok kulo kay dur tuwam jar tuwamu, nam ɓurawaya, fi musɗi, may nam vat goyo.

²⁷La san jun sa ma donon jewɗina, nam fi kal hay ziyna valamu kay vurum slena valamɗi, junum jun tuwa, bugolda nam fi vurum ziyna valamu may.

²⁸Nan digi gasita, gurona vi sumuna ma fi gida kay sulukŋa visi kaf, hiɗi ŋulda visi kaf ta nisi ka ŋul hiɗi na'a kaw,

²⁹may sa ma ŋul Ŋusta-Peldetta ta-ta hay vatɗit kaw nam fi gidaɗi, may kitat ka kalamu kay suluk ma vatɗina.

³⁰Yesu ka di ki kayn nala kay mige nisi di ala ful ma liwisna ka kalamu.

³¹Hay li namna sulumu hiɗi ɓosiyomna co'o, nisi lak goy jiya, nisi gi sun kalamu kay yumaya.

³²Sumun ka tokay talam ŋolo, nisi ka di talam ala: Humaŋu, suŋu, ɓosiyoŋ sa jufayna hiɗi sa boyn kaw ka garaŋ goy jiya.

³³May nam hot dita: sunu ti gige? Ɓosiyonna si gige?

³⁴Bugolda nam cuk iram kay sa dakay talamna ka di ala: Lakŋi si sun nanu hiɗi ɓosiyon nanna.

³⁵Kay gigekaw ma li minda vi bunu, namu mi ɓasun nanna, ɓasun nanda hiɗi sun nanu kaw.