Read Masana MARKUS 4 Bible Online

MARKUS 4 - Masana bible

MARKUS 4

¹Yesu tun caw hat lo kel niy-lumna. Sumun ŋolo dak talamu, nam jik hay lumda, kal mus goy goloŋ hay niy-lum ma ŋolla, sumun kaf mol kulo deŋele gaa kay nagata.

²Nam hatsi ŋolo hay law ma nir-niramna, hay hatta valamu nam di tisi ala:

³Humgiya: sa ma was-jafna kali goyo kay wasam gaa'a.

⁴Hay li ma nam ka wasamu, hena ni paŋay hagana, layna ma'a tumu.

⁵Hen nig hay hagata ta goorhoyona, hay li ma nam fi nagat gaa kuɗum ŋolɗi, nam day kulo gosoy wit', kay nagata valamu may gaa zulɗi.

⁶Hay li ma fatta dayawa kulo'o, nam war goyo, kay sutiyam cuki gaaɗi, nam so goyo.

⁷Hen nig jar zigiyna, zigiyna wul kulo'o muruɗumu, nam li jafɗi.

⁸Hena nig jar nagata ŋaata, nam wul kulo'o li jaf ŋolo kaw. Hena yaw dok-ɦidi, hena yaw dok-karkiya, hena yaw kis may.

⁹Nam disiya: sa ma humam ka'a kay huma, nam ma huma.

¹⁰Hay li ma nam hin valam kepe, nisi sa ŋuyi talamna hiɗi sa doogo yam ma'na jobom kay law ma nir-niramna.

¹¹Nam di tisiya: ŋayayta vi mulda-wuralawna na'ta kayni vuli tigi nigiya, may tam nisi sa goyna, slen vuli tisi kaf hay law ma nir-niramna.

¹²Kay nisi ma wi'e, wi goy haraŋɗi, kay nisi sa huma, may humum cawamɗi, kay nisi ma hamɗi, fi gidaɗi kaw.

¹³Nam disi lo: Law ma nir-niramna kayni nigi humum cawam su? La law ma nir-niramna kayni nigi humum cawamɗi, nala law ma nir-niram hena nigi humum cawam ɗawn humtige?

¹⁴Sa ma was-jafna was yoboyna.

¹⁵may nisi sa wasay paŋay hagata kayni si nisi sa yoboyna wasay haysina, hay li ma nisi humumawa, wulini wulini Satan ma'a, yaw yoboyn ma wasay haysina goyo.

¹⁶Nala kaw, nisi sa wasay kay liyn ma hiɗiyna, kayni si nisi sa hum yoboynawa, wulini wulini nisi vum hiɗi firita,

¹⁷sutiyam may cuki gaa haysiɗi, nisi mus hay vida ir neeɗa, may hay li ma zumalda hiɗi lasta coowa kisiya kuɗ yoboyna, nisi hor de'.

¹⁸Segena sa wasay jar zigiyn kayni si nisi sa hum yoboynawa,

¹⁹may varta kay slena vi nagata hiɗi nemda vi farayna hiɗi darta vi sle hena cuk kalafi muruɗ yoboyna, nam li jafɗi.

²⁰Nisi sa wasay hay nagata ŋaata; kayni si nisi sa sa hum yoboynawa, vumawa kaw, nam li jafi, yaw dok-hidi, yaw dok-karkiya, yaw kis kaw.

²¹Nam disi lo: Fitilla san as kuluɓum kayn gaa kuɗ dutta lebo gaa kuɗ gilikŋa su? Tunum kayni kulo kay va ma tun fitilla ɗisu?

²²Kay va ma ŋayaya ma as vul tuwam goy haraŋɗi mayɗi, va ma kusuɓiya ma ma goy hay falaytɗi mayɗi.

²³La san humam ka'a kay huma, nam ma huma.

²⁴Nam di tisi sem mara'a lo: Ligi ŋali kay sle ma nigi humumna. Dutta-kusta ta nigi kus wan hiɗi na'ta kayni ma kusgi hiɗi na'a, ma vulgi suwa kaw.

²⁵Kay sa ma falam ka'ana, talamu ma vulis lo, may sa ma falam mayɗina, va ma ka kalamna kayni ma sliys goy kalamu.

²⁶Nam di lo: mulda-wuralawna na' ŋray ca ki sa ma was jafn gaa kay nagata nala:

²⁷La nam kal sen malamu, la nam mus jigere kaw, henjeta hiɗi falayta, jafna day kulo'o, wul kulo'o kaw, ir nanige kla nam wiɗi.

²⁸Nagat kay tuwa'a wul jafna; jewe mi zlemdekŋa, kalam mi wiira, bugolda yam wan cuk goyo may.

²⁹Hay li ma jafna niyawa, nam gi kewt kuɗum yo, kay feɗna coowa.

³⁰Nam di lo: nay ma ŋra mulda vi Lawna hiɗi mige? Lebo nay as ŋra' hiɗi law ma nir-niramna mige?

³¹Na'a ki jaf-gu seneve ma, hay li ma san wasam gaa kay nagata, nam gooro suw jaf ma kay nagatna kaf,

³²nir-na'ta kep, hay li ma wasamawa, nam muɗ ŋol hizim-hizim' suw hadafna kafe, ɓet ɓalam goy ŋolo, ta-ta lay ma dukalawn kaw ma'a tun tokosayna valamu hay humamu.

³³hiɗi law ma nir-niramna ŋolo ki kayn nala nam kus yoboyn tisiya, kuɗ va ma nisi nagay kay humumna.

³⁴Bay law ma nir-niramna nam law tisiɗi, may hay li ma nam fi tuwamawa goy ŋayaya hiɗi sa hatayna valamu, nam disi caw law ma nir-niramna goyo.

³⁵Hay vulatita vi buur na'ta, Yesu di tisiya: nay nay kulo gal hena.

³⁶Hay li ma nam gi ir sumuna goy gina, nisi kal hiɗi namu hay lumda ta nam ay musi haya'ta, lumay hena kaw tapay hiɗi nisiya.

³⁷Birin ŋolo fokay kulo'o, billa ko kulo'o hay lumna, ta-ta lumna goboy oya.

³⁸Nam buri sene hay giɗer lumda, yalam tuni kay ɗigalla ta may. Nisi zliyimu dum ala: Bum-yalla, tuwaŋ may wiraŋ kay sir ma nay ka sir goloŋŋa noŋɗi su?

³⁹Nam zliy kulo'o, nam bay simeɗna, nam di tam niy-lumna ala: basaŋu, tunaŋ gaa'a, wulini wulini birina tuni gaa helmes', liyna tuni kiliŋ.

⁴⁰Nam disiya: nigi li nari kay mige? Nigi lak hay bay-vid tuwa nala litige?

⁴¹Tuwsi cuk nar ŋolo, nisi di jar tuwsi ala: sa namna ma niyna hiɗi birina gat kuɗum nala kayni mi nam gige?