Read Masana MARKUS 6 Bible Online

MARKUS 6 - Masana bible

MARKUS 6

¹Yesu fokays ɗawn pa kal hay nagata valamu. Sa hatayna valamu tap kuɗumu.

²Hay li ma sabatna maawa, nam tun caw hat hay sinagogayna*. Sum sa dakay hum hatta valamna muɗ huyum ŋolo, Nisi di'e: san kayni fi slen kayn ay arige pa? Yal namna nam fumi kayn arige pa? Ɗekka ta ki kayn nala nam la' kayn ir nanige?

³Nam kayni mi sa ma ceɗ gunɗi su? Namu mi goora vi Mariya ɗi su? Namu mi ɓasum Yakub hiɗi Yoses, hiɗi Yudas hiɗi Simonɗi su? Ɓosiyom sa boyna ka jaray tanɗi su? Nam muɗ mi va ma dabsi sesiya.

⁴Yesu disiya: Sa ma jobta-Lawna sa ɗuwum birek-ceke hay li maraɗi, may jar sumiyamu hay nagata valamu.

⁵Ɗawni nam may li dekka kep noŋɗi, may nam bar ɓalam kay sum sa moy sara'a yersi goyo tuta.

⁶Nam muɗ ɦuyum' kay bay-vida visiya. Nam ŋuy hay hoyok-ziy ma goboyn kaf kay hatsiya.

⁷Nam yi sa doogo yam ma'na talamu, tun caw cuksi kuɗ tuwsi sun ma' ma', vulsi donota kay digiɗ fuliyan ma liwisna goyo.

⁸Nam gatsi kay nisi ma sli va kisi hay hagatɗi, yaw fuɗi, yaw birimɗi, yaw gurju hay pos-sligara visiɗi kaw, may mi zugul ɦawa.

⁹Nam disi lo: yawgi tuguru segiya, yawgi sligar-tuwna ma' ma'ɗi.

¹⁰Nam disiya: ziy marige kaw la nigi cukawa hayamu, nigi ma lak hayamu ta-ta hay li ma nigi raw vokgiya.

¹¹Liyn ma nigi co hayamna arigekaw la nisi min vigiɗi, min hum kuɗgiɗi kaw, pogi butuw ma wur-segin goyo hay li ma nigi min kal vokgiya, kay kayni ma li di-goyt kisiya.

¹²Nisi cuki goyo kus yoboyna kay sumuna ma hama,

¹³nisi digiɗ fuliyan goy ŋolo, nisi ɦok mul kay sa moyna ŋolo muɗsi goy ŋaa'a kaw.

¹⁴Mulla Herod hum kayni, kay sem Yesu tiy ŋolo, nam di'e: Yohana ma baptisma dayawa kulo'o hay mitta pa, kuɗ na'ta kayni nam ka hiɗi donota kay li ɗekka.

¹⁵May segena di'e: kayni mi Eliyas, segena lo di'e: kayni mi san kep jar sa jobta-Lawna.

¹⁶May hay li ma Herod hum kayni, nam di'e: Day kulo kayn mi Yohana ma nan kaam yalam goyna.

¹⁷Kay Herod kay tuwamu cuk sumuna kay vi Yohana, junumu, gum hay daŋgayna kaw, kayni kuɗ Herodiya, cata vi ɓasulumna Filip, ta nam va'ta,

¹⁸kay Yohana di Herod ala: vun-ma-gatna hinaŋ vi cata vi ɓasuŋɗi.

¹⁹Herodiya ka gaw hay dika' tam Yohana, na' gar a cum goyo, may na' as kay li kaynɗi,

²⁰kay Herod ka li nar kuɗ Yohana, kay nam wi ala nam sa ma ɗigera ma peldetna. Nam ka ŋom Yohana, hay li ma nam humumawa, dikam muɗ tum ŋolo, may nam mus humum malam hiɗi firit nala.

²¹May na' fi hagat kayni, hay li ma yuldeta vi buurta vu'da vi Herod co'o, nam li yuldeta kay sa ŋulona valamu: sa ŋulona vi duura hiɗi sa ŋulona vi Galileya,

²²hay li ma goota vi Herodiya ma kalafi kay pir dalaŋgana, Herod hiɗi sa lakay ti hiɗi namu irsi va' ŋaa ŋolo, nala mulla di tam goot-cata: Goota, la nak siɗawan kay mige kaw nan ma vulakga.

²³Nam yi va kalam ala: la nak joban kay mige mige kaw, nan ma vulakga, la ti gal mulda van kaw.

²⁴Na' kali goyo job tam su' ala: Nan ma jobom talam mi mige? Su' hota' dita: Nak ma jobom yam Yohana ma Baptisma.

²⁵Wulini wulini na' ma kalaf gosoy tam mulla, ka siɗawam ala: Nan min ala naŋ ma vulan yam Yohana ma Baptisma hay tasat kayni wulini.

²⁶Mulla dikam muɗ yor ŋolo, may kay va ma nam yum kalamna, kuɗ nisi sa dakayna kaw, nam min tela'ɗi.

²⁷Wulini wulini mulla gi soje ma gardena valam kepe, dum kay nam mar yam Yohana ma Baptisma.

²⁸Gardena kali hay liy ma daŋgayna, nam ka yam Yohana, maram yalam hay tasata. Vulum mi goot-cata, na' vulum mi su'a.

²⁹Hay li ma sa hatayna valamu hum kayni, nisi ma'a, slum tuwamu pum gaa hay zulla.

³⁰sa apostolayna dak tuwsi tam Yesu, nisi vum labara kay sle ma nisi lumayna hiɗi sle ma nisi hatamayna.

³¹Nam disiya: Nigiyay goy kuɗan hay liy ma fulla tani kay tun sukgi neeɗa. Kay sumun ŋolo ka kal talamu, segena ka cukay goyo kaw, nisi may fi liyn kay ti fu noŋɗi.

³²Nisi ɓe hay lumda, kay tuɗ goy hay liyn ma fulla goy ŋayaya.

³³Sumun ŋolo wi liy ma nisi ka kal hayamna, sumun ŋolo hay hoyok-ziyn kaf tun tuwsi goy voksi hiɗi sesiya, kay tuɗ hay liy ma nisi min na hayamna.

³⁴Hay li ma Yesu jikay goy hay lumna jikŋa, nam wi sumun ŋolo, nisi muɗ kiram hawi. Kay nisi muɗi ki fok-dimi ma bay ŋomda nala. Nam tun caw hatsi ŋolo.

³⁵Hay li ma fatta kali ŋolo, sa hatayna valamu tuɗ talamu dumu: liyn kayni goy fulu, fatta kali ŋolo kaw,

³⁶gisi irsiya, kay nisi ma kal hay hoyok-ziyna hiɗi naga ma galamna kaw kay gus va ma ti vunsiya.

³⁷Yesu disiya: Nigi kay tuwgiya vulsi va ma tina. May nisi dumu: Numa tuɗ gus tina ir gurjut kis-ma', kay vulsi va ma ti'e su?

³⁸May nam disiya: Ɗuwgi fu ma kigin haw tige, nam gaage? Hay li ma nisi ɗuwumu, nisi di ala numa ka hiɗi fun vasl, kuluf ma' may.

³⁹Nam di'e: sumun ma mol gaa kuɗ farana farana kay us ma ŋulomna.

⁴⁰Nisi mol gaa hitit' hitit', segen kis kis, segen dok-vasl dok-vasl may.

⁴¹Nam yaw fu ma vasl hiɗi kuluf ma ma'na, ɗuw kulo hay wuralawna, gi bol kay funa, ɓurawamu, vulum mi sa hatayna kay nisi ma ɓurawam tam sumuna. Kuluf ma ma'na nam ɓurawam tam sumun kafe kaw.

⁴²Nisi kaf ti'e hob kaw.

⁴³Dir funa hiɗi kuluf ma hinna nisi yawam kulo'o, nam oy tikisi doogo yam ma'.

⁴⁴Nisi sa ti funa sum sa jufayn birim vasl.

⁴⁵Wulini wulini nam li sa hatayna valam hiɗi dono'o a nisi ma jik hay lumna kay tuɗis vokom kulo deŋel gal hena, hay gal Betsayda, kay nam kay tuwam hinis gi ir sumuna.

⁴⁶Hay li ma nam gi ir sumunawa, nam kay tuwam jik kulo kay hiɗiyta kay siɗawa.

⁴⁷Hay li ma vulatita coowa, lumda ka goy way niyna, Yesu hinis kulo deŋel valam kepe.

⁴⁸Nam wi ala lop ŋolo kisiya kay gi lumda, kay simeɗna ay kirsiya. Hay ŋomda-fiɗita[3] nam co tisiya, poy kay niyna, ki nam min cap galsiya nala.

⁴⁹Hay li ma nisi wum tuɗ kay niyna, nisi var ala kayni mi fulla, nisi tun caw ciriya.

⁵⁰Kay nisi kaf irsi wumu, nisi muɗ nar ŋolo. May gosoy wit' Yesu ka disi ala: vigi dikgiya, kayni mi nanu, ligi narɗi.

⁵¹Bugol kayni nam jik kulo tisi hay lumna, simeɗn tun gaa kiliŋ, nisi muɗ huyum ŋolo.

⁵²Kay nisi bay hum caw gul-yalda ta nam la' hiɗi fun tuwa, kay diksi so'otay ŋolo.

⁵³Hay li ma nisi jik kulo jikŋa, nisi co hay nagata vi Genesaretna, nisi tun lumda kulo deŋele.

⁵⁴Hay li ma nisi jikay goy hay lumda pa jikŋa, sumuna wi Yesu vuntuni vuntuni.

⁵⁵Sum sa hay nagat na'ta kaf jaŋ tam Yesu, nisi tun caw maram sa moyna, buri kay raŋgawna visi waŋ waŋ, hay li ma nisi hum ala Yesu ka tani.

⁵⁶Hay liyn kaf ma Yesu poy hayna, hay hoyok-ziy ŋulona hiɗi hoyok-ziy gurayna, hay liy ma kawayana kaw, nisi bur sa moyna visi goy hay liy ma lumuna, nisi siɗawamu kay nisi min jom mi vun-sligara valamu tuta. Nisi kaf sa jo vun-sligara valamu, nisi muɗi goy ŋaa'a.