Read Masana MARKUS 7 Bible Online

MARKUS 7 - Masana bible

MARKUS 7

¹Sa Farisena* hiɗi segena jar sa wi ɗota sa may Yerusalem pana tok tuwsi tam Yesu.

²Hay li ma nisi wi segen jar sa hatayna valamu ti hiɗi ɓisi gese, kayn di ala ɓisi bay muz goyo,

³kay sa Farisena* hiɗi sa Yudiyan noŋ kaf la ɓisi bay muz goy ŋaa'a, nisi tiɗi, kay nisi li kuɗ data vi sumaysiya.

⁴Hay li ma nisi mayawa goy lumu pana, la tuwsi bay muz goyo, nisi tiɗi. Sle hegen ŋolo ma nisi vum kisin ka kaw: ki muzta vi kaway-ma-cina nala, muzta vi dowayna hiɗi doway ma wayna kaw.

⁵Sa Farisena* hiɗi sa wi-ɗota jobom ala: sa hatayna vaŋu may poy kuɗ data vi sumaysiɗi kayn kay mige? Nisi ti fun hiɗi ɓisi bay muz kayn kay mige?

⁶Yesu disiya: Nigi sa milena, Esaya di vun-jobta kigi kayn hay liyamu, hay li ma nam di vokom ala: Sumun kayn slan yan kulo hiɗi vunsi ɦawa, May diksi ka goy gine hiɗi nanu;

⁷kay nisi girifan kayni goy ɦawa'a, hay li ma nisi hat hatta ta may goy hay data vi sumuna.[4]

⁸Nigi hin vun-ma-gatna vi Lawna goyo, may nigi vi dono'o kuɗ data vi sumuna.

⁹nam hot disi lo: Gasi, nigi ra gatta vi Lawnawa goyo kay vi kuɗ data vi sumuna.

¹⁰Kay Musus di'e: slaŋ yam buŋu hiɗi suŋu kulo'o, lo, sa ma ŋul bulum kla sulum kla, nam ma fi cita-goyta.

¹¹May nigi hat sumun ala: La san di tam bulumu lebo sulumu ala: va ma nan min gutaŋ hiɗi namna nan min muɗum goy korban, kayn ala va ma vulum tam Lawna.

¹²Nala nigi hinim a gut kuɗ bulum hiɗi sulumɗi.

¹³Nala nigi muɗ yoboyna vi Lawna wa goy waa'a kuɗ data vigi ta nigi hat sumun hiɗi na'ta, slen ŋolo ki kayn nala nigi ka lumu.

¹⁴Nam yi sumun talam mara lo ka disi ala: Humgi slen kayni, humgit cawam kaw:

¹⁵Va ma mays goy jiy pa kal kalaf hay sana muɗum liwisɗi, may va ma muɗ san liwis kayni mi va ma may goy hayam pana.

¹⁶Sa ma humam ka'a kay huma, nam ma huma.

¹⁷Hay li ma nam kal kalafi hay ziyda, goy gine hiɗi sumuna, sa hatayna valamu jobom kay caw law ma nir-niramna kayni.

¹⁸Nam disiya: Nigi kaw bay yal nala lay su? Va ma may goy jiy pa kal kalaf hay san kayn muɗum liwisɗi, nigi may wi kaynɗi su?

¹⁹Kay nam kal hay dikamɗi, may hay ruwatam ɦawa, capis goy hay liy ma gal tuɗoŋo. Nam di ala sle ma tin kaf nam bay-liwisi.

²⁰Nam disiya: Va ma kali goy hay san pa kayni mi va ma muɗum liwisna.

²¹Kayni mi slen ma joona ma may goy kalaf hay dik san pa, muɗum liwisi: Varta joota, viyuwta, kulda, ci-matta,

²²zlata-bulota, haramda, dikga joota, ɗutta, hum gatɗi, ci porlayta, ŋulda, jigal-tuwta, ɦoyta.

²³Kayni kaf mi sle ma joona ma may goy hay san pa, ma as muɗum liwisna.

²⁴Bugol kayni Yesu fokays ɗawn pa, nam kal goy hay nagata vi Tirus. Nam kal kalaf hay ziy tara kep, nam may min ala sa wumɗi, may nam fi a ŋay tuwam kay sumunɗi.

²⁵Kay cat tara ka kepe, goota va'a ful ma liwisna ka ka'a, hay li ma na' hum labara kay Yesu, na' ma'a, gi tuwa' gaa vok gayamu, na' girifimu.

²⁶May cat na'ta kayni ti cata Grekga, ta jafa' may hay Sirofenisiya pa, na' siɗawamu kay nam ma digiɗ ful ma liwisna goy kay goota va'a.

²⁷May nam di ta'a: hin gurosgurayna hob jewe, a yaw funa vi gurosgurayna cukum goy mi guro durnayna kayni may hay liyamɗi.

²⁸Na' hot dita: Gasiya, Bum-Sumuna, guro durnayna kaw mut helek ma cuk gaa kuɗ tablena vi gurosgurayna.

²⁹Nam di ta'a: kuɗ yoboyn kayni, fuliyan cukawa goy hay goota vagu, tuɗag magu.

³⁰hay li ma na' co vo'o, na' fi goot meɗi goy gaa kay va ma buur sileŋdeŋ', ful ma ka'na kali goy may.

³¹Bugol kayni Yesu hin Tirus, nam jik hay Sidon. Nam hotay kel niy-lumna Galileya, hay nagata vi Dekapolis.

³²Sa ma gidiŋ ma vunam di ŋaaɗina kepe, nisi maram tam Yesu. Nisi siɗaw Yesu kay nam ma tun ɓalam kalamu.

³³Nam kalam goy ŋayaya, gine hiɗi sumuna, kal ɓalam humamu, jom sinemu hiɗi nenena;

³⁴bugolda nam muɗ iram kulo wuralawna, gi suku di'e: Effata, kayn di ala: malaŋ goyo.

³⁵Wulini wulini humam mali goy wiŋ', sinam ta zlaɓayta but goyo kaw, nam tun caw law goy haraŋi.

³⁶Nam gatsi kay nisi ma di kayni goy mi saɗi, may hay li ma nam gatsi ŋol gatna, nisi di labar goy voksi suwa.

³⁷Nisi muɗ ɦuyum' ŋolo, slen kaf ma nam lum kayn ŋaa'a ŋolo, sa gidiŋŋa nam muɗsi huma, sa sinsi zlubakaya nam muɗsi di kaw.