Read Masana LUKAS 1 Bible Online

LUKAS 1 - Masana bible

LUKAS 1

¹Kay sum segena ŋolo tun caw ɗo labara kay sle ma li jarayna,

²ki nisi sa hay tun cawta pa wi labar namna hiɗi irsiya, nisi sa wulini muɗi si sa sunda vi yoboyna vul labar namna tuma'a nala,

³nan kaw, hay li ma nan fek caw lawt kayni goy hay dira' ma tunna ŋaa fekŋa, ɗuw kiran ŋaa'a kay nan ma ɗom goy hay liyam ɗiger, vulum taŋ naŋu Tewfilus sam-ŋolla,

⁴kay naŋ ma wi gasita vi hatta ta naŋ hata'ta goy haraŋi.

⁵Hay liyna vi Herod mulla vi Yuda, mul-ma-ɗifinna ay kepe, semda valamu Zakariya, hay jafna vi Abiya, cata valamu hay jafna vi Aaron, semda va' ala Elisabet.

⁶Nisi ma' kafe ay ɗigere vok ir Lawna, vun-ma-gatna hiɗi dita vi Bum-Sumuna kaf nisi poy kuɗum ŋaa'a ŋolo.

⁷May guro visi sayɗi, kay Elisabet ay getiya, nisi ma' kaf busata visi kali ŋolo.

⁸hay fat tara kep Zakariya ka li lop ɗifinna vok ir Lawna, kuɗ vurnata vi vokŋa valamu,

⁹Ŋaɓta nig kalamu, kuɗ gatta vi lop ma ɗifinna, kay nam ma kal kalaf hay Tempella ŋal urdina.

¹⁰Sumun kaf ka tokay goy jiya hay leer ma nam ka ŋal urdina.

¹¹Sunda-wuralawna vi Bum-Sumuna vul tuwam kiramu, col hay gal ma jufna vi giwin-ma-ɗifinna ma ŋal urdina.

¹²Hay li ma Zakariya wi sunda-wuralawna, sukam yaw kelemu, narta vumu.

¹³May sunda-wuralawna dumu: laŋ narɗi Zakariya, kay Lawna hum siɗawta vaŋawa, cata vaŋu Elisabet ma vuɗaŋ gooro, naŋ ma yum semda valam ala Yohana.

¹⁴Nam ma laŋ dikaŋ firi ŋolo, ma sleɗaŋ hayaŋu kaw, sumun ŋolo ma li firiya kay vu'da valamu.

¹⁵Kay nam ma muɗ ŋolo vok ir Bum-Sumuna, nam ma ci vinɗi, ci dolay ma galakŋaɗi kaw, nam ma hob hiɗi Ŋusta-Peldetta tun caw kalaf hay sulumi pa.

¹⁶Gurona vi Israyel ŋolo nam ma hotsiyay tam Bum-Sumuna Lawna visiya.

¹⁷Nam ma poy vok iramu hiɗi Ŋusta hiɗi donota vi Eliyas, kay hot dik guron ay kat sumaysiya, kay hot sa ŋel gatta ay kat yalla vi sa ɗigera, kay kot mi Bum-Sumuna sum sa diksi koti ŋaa'a.

¹⁸Zakariya di tam Sunda-wuralawna: Kayni nan ma wum goy gasi ɗawn witige? Kay nanu sa ma muɗi maari, cata van kaw busata va' kali ŋolo!

¹⁹Sunda-wuralawna hot dit talamu: Nanu mi Gabriel, nanu mi ma colay vok Lawna; nam ganiya kay law taŋu, kay vaŋ labar namna ma ŋaan kayni.

²⁰Humaŋu, naŋ ma muɗ gidiŋi, naŋ ma lawɗi ta-ta van kayni li tuwa, kay yoboyna vanu ma vunam min hob hay liy namna ɗawni, naŋ min vi kuɗumɗi.

²¹Hay na'ta sumun ka dakay goy jiya kay cub Zakariya, nisi muɗi ɦuyum' kay nam vi yalamay hay Tempella.

²²Hay li ma nam kali goy jiya, nam as law tisi noŋɗi, kay na'ta nisi wi ala va vul tuwamay kiram hay Tempella; nam tun caw ɦiwetsi hiɗi ɓalamu, mus hay gidiŋga.

²³Van li nala, hay li ma buura ma lopna valamu vatawa, nam kali vutoŋo.

²⁴Bugol buur neeɗa kayni, Elisabet cata valam sli haya, na' ŋay tuwa' ir til vasl, na' di'e:

²⁵Kayni mi va ma Bum-Sumuna lum tanu, kay nam varawa kay yaw zulota ta kan jar sumuna goyo.

²⁶May hay til ma karkiyana, Lawna gi sunda-wuralawna valamu Gabriel ay sunu hay hoyok-ziyna vi Galileya ma yum Nasaret,

²⁷tam goot-cata ta daray kay sa ma semda valamu Yosef, hay jafna vi David, goot-cat na'ta semda va' ala Mariya.

²⁸Sunda-wuralawna kali kalafi di ta'a: gag deɓe, naku ta fi slugotawa, Bum-Sumuna ka hiɗi naku.

²⁹Na' muɗ nar ŋolo kay yoboyn kayni, na' ka job tuwa' ala gi-deɓta ta ki kayn nala min ɗek mige?

³⁰Sunda-wuralawna di ta'a: Lag narɗi Mariya, kay nak fi slugotawa vok ir Lawna.

³¹Humagu, nak ma sli haya, nak ma vuɗ goora kaw, nak ma yum semda valamu ala Yesu.

³²Nam ma muɗ sa ma ŋolla, nisi ma yum ala goora vi ma Kulo-Jamna, Bum-Sumuna Lawna ma vulum zlamda-mulda vi bulum David.

³³Nam ma mus mulu kay jafna vi David ta-ta hay vatɗita, mulda valamu ma vat goy noŋɗi.

³⁴Mariya di tam sunda-wuralawna: van kayn li ɗawn ir nanige, kay nan bay bur tam sa juf tuwa?

³⁵Sunda-wuralawna hot dit ta'a, Ŋusta-Peldetta ma co kagu, donota vi ma Kulo-Jamna ma li kag ŋusu. Kuɗ na'ta kayni goor ma vuɗna ɗawni ma yum ala goora vi Lawna.

³⁶Humagu, sugolokga Elisabet ta ay getayta slaawa haya, hiɗi maarta va' pet na' ka haya hiɗi goor ma jufu, wulini liy til karkiya.

³⁷Kay va ma Lawna as a liɗi mayɗi.

³⁸Mariya di'e: Nan gorvota vi Bum-Sumuna zawni, va ma li tanu kuɗ yoboyna vaŋ lige. Sunda-wuralawna hina'a, kaliya may.

³⁹Hay buur na'ta kayni, Mariya fokay kulo'o, na' gos tuwa'a, kali gal hiɗiyna hay hoyok-ziyna vi Yuda.

⁴⁰Na' kal kalaf hay ziyna vi Zakariya, na' gi deɓ mi Elisabet.

⁴¹Hay li ma Elisabet hum gi-deɓta vi Mariya kayni, goora geɗ haya'a. Elisabet hobay hiɗi Ŋusta-Peldetta,

⁴²na' ka siwel hiɗi dela' kulo ŋol ala: Jar boyna bolda ka kagu, bolda ka kay jaf ma hayagŋa kaw.

⁴³Nan ti gige a sum Bum-Sumuna vanu co hay ziyna vanu?

⁴⁴Kay humag tige, hay li ma nan hum gi-deɓta vagu, goora geɗ hayanu hiɗi firita.

⁴⁵Sle'ta ka kay na'a ta vi ala slen ma Bum-Sumuna dum ta'na vunam ma hoba.

⁴⁶Mariya di'e: Ciwta vanu subur Bum-Sumuna,

⁴⁷ŋusta vanu li firiya hay Lawna ma su'da vanu.

⁴⁸Kay nam cuk iramawa kay maŋayta vi ta gorvota valamu. Kay humagu, vok ɗawn jaf-sumuna kaf ma yan ala: Ta sle'ta ka'ta.

⁴⁹Kay nam ma gaŋeraŋa li sle ma ŋulonawa tanu, Semda valamu Peldete.

⁵⁰Slugota valamu tam jaf hen pa ta-ta tam jaf mara'a lo, kay nisi sa li nar kuɗumna.

⁵¹Nam meɗ ɓalam ma dononawa goyo, Nisi sa ka hiɗi varta vi subur-tuwta hay diksiya, Nam mersiyawa goyo.

⁵²Sa muliyana nam digiɗsiyawa goyo Hay zlamda-mulda visiya, sa hawna nam muɗsi goy sa ŋulona.

⁵³Sa mayt cisina nam hobsiyawa hiɗi slen ma ŋaana, sa galapna nam hotsiyawa goy hiɗi bisi ɦawa kiɗaŋ-kiɗaŋ'.

⁵⁴Nam gutawa kuɗ sa sunda valamu sa Israyella, humam gumawa kay slugota ŋolda valamu.

⁵⁵Ki nam di tam sumiyaya nala, tam Abraham hiɗi jafna valamu kay dok-doko.

⁵⁶Mariya musi hiɗi Elisabet ir til ɦidi, bugol kayni na' hot vo hay ziyna va'a.

⁵⁷May liyna vi pukka vi Elisabet coowa yo, na' vuɗ goor ma jufu.

⁵⁸Sa ziyna visi hiɗi na'na hiɗi sa hay jafna va'a hum ala Bum-Sumuna li slugotawa ŋolo ta'a, nisi tok tuwsi ta'a kay li firiya.

⁵⁹Hay buur ta glafandita, nisi co'o kay ka goora gosaya, nisi yum ala Zakariya kuɗ semda vi bulumu.

⁶⁰May sulumu hot dita: Naɗi, semda valam ala Yohana.

⁶¹Nisi da'a: Sa ma hay jafagu ma semda valamu nala mayɗi.

⁶²Nisi ɦiwet bulumu hiɗi ɓisiya kay nam ma vul semda valamu.

⁶³Nam jobsi la nisi ma vulum ɗerwel kepe. Nam ɗo hay ɗerwelda ala: Semda valamu Yohana. Nisi kaf muɗ ɦuyum'.

⁶⁴Wulini wulini vunam mun til', sinam muɗi di'e kaw, nam tun caw lawa, subur Lawna kaw.

⁶⁵Sum sa hay naga ma goboy hiɗi liy namna narta visiya, kulo kay hiɗiyna vi Yuda kaf sumuna muɗ ka kasla kayn hiɗi law namna.

⁶⁶Sum sa hum labar namna ŋom lawt kayni kaf hay diksiya, nisi di'e: goor kayni ma muɗ nanige? Kay ɓam Bum-Sumuna ay hiɗi namu.

⁶⁷May bulum Zakariya hobay hiɗi Ŋusta-Peldetta, nam di yoboyn kay sle ma vokomna ala:

⁶⁸Suburta ka kay Bum-Sumuna Lawna vi Israyel, Kay nam ma tam sumuna valamu, Suɗsi goyo.

⁶⁹Nam maray butta-goyta ŋoldawa, Hay ziyna vi sa ma sunda valamu David.

⁷⁰Ki nam di hiɗi vun sa jobta valamu sa peldetna sa ay jew ɓa-ɓana nala.

⁷¹Kay butay goy hay ɓam sa gawta kayna, Sa ka li ɦeɗem taya kaw.

⁷²Kay li slugota tam sumiyaya, Kay humam jak kay bonota valamu ta peldetta.

⁷³Kuɗ va ma nam yi slen kalamu Tam buy Abraham pa,

⁷⁴Kay suɗay goy hay ɓam sa gawt kayna, kay muɗay a sunum bay-narta kaw.

⁷⁵Kay girifimu hay peldetta hiɗi ɗigerta, Vok iramu buurta irita vay kaf.

⁷⁶May naŋu goor ma goora, Nisi ma yaŋ ala sa ma jobta vi Lawn ma Kulo-Jamna, Naŋ ma tun vok Bum-Sumuna kay par hagata valam goyo,

⁷⁷Kay hat sumuna valamu a wi su'da Hay gida vi sulukŋa visiya,

⁷⁸Kayni kuɗ slugota ŋolda vi Lawna vaya. Kuɗ slugota ŋolda valamu, nam hin fatta daya kay poy kulo kaya,

⁷⁹Kay li haraŋ kay nisi sa ka lakay hay jufunda, hay ŋus-mitta kaw, Kay cukay gayay hay hagata vi toyta.

⁸⁰May goora wuliya, muɗ dono'o hay Ŋusta. Nam mus goy hay fulda ta-ta hay buur ma nam col goy vok sa Israyella.