Read Masana LUKAS 11 Bible Online

LUKAS 11 - Masana bible

LUKAS 11

¹Yesu kal goy hay liyn mara'a fat tara kepe kay siɗawa. Hay li ma nam vat siɗawta, kep jar sa hatayna valamu ka dum ala: Bum-sumuna, naŋ hatma siɗawta ki Yohana hat sa hatayna valamu nala.

²Nam disiya: Hay li ma nigi siɗawa, nigi ma di ala: Buma'a hay wuralawna, Hin semda vaŋu li goy peldete, Hin mulda vaŋu ma'a.

³Vulma tina vuma ma numa tum hay buurta kafna.

⁴Vulma gida kay sulukŋa vuma tage, Ki numa kaw vul gida mi sa li suluk katma nala. Hinma cuk hay nemdaɗi.

⁵Nam disi lo ala: La sa jargiya banamna ka'a, nam tuɗ talam hay henjeta kay dum ala: Bananna, vulan fu bal ɦidi,

⁶kay banan mara'a co rogoy vo vanu, may va ma nan vulumti a ti'e mayɗi.

⁷Nam as hotom ditay kalafi hay ziyda pa ala: Naŋ makan tuwanɗi, vun-ziyn duki vatiya, nanu hiɗi gurona vanu numa buri gaa'a, nan as fok kulo kay vulaŋ fuɗi, nam as hotom dit nala su?

⁸Nan digiya: La nam min fok kuloɗi kay banamna makam tuwam kayn makiya kaw, nam ma va' talamu fok kulo'o, vulum va ma nam jobomtina.

⁹Nan digiya: Siɗawgiya, nigi ma fi slena, gargiya, nigi ma fi'e, dabgiya, vun-ziyn ma malis goy kigiya.

¹⁰Kay gigekaw ma siɗawa fi'e; sa ma gara fi kaw, sa ma daba, vun-ziyn ma malis goy kalamu.

¹¹Jargiya, la goora job fun hay ɓam bulumu, bulum as vulum hiɗiyna hay baŋal fun su? Lebo la nam job kulufna, bulum as vulum guyna hay baŋal kulufn su?

¹²Lebo la goora job sena, bulum as vulumti ti ɦurduwta su?

¹³Kay na'ta nigi sa joon kaw, la nigi wi kay vul sle ma ŋaan mi gurona vigiya, nala bugi ma hay wuralawna ma vul Ŋusta-Peldetta mi nisi sa siɗawamu kaw.

¹⁴Yesu digiɗ ful ma gidiŋŋa goyo hay sana, hay li ma fulla kalawa goyo, san tun caw di'e. Sumun kaf muɗi ɦuyum'.

¹⁵May segena di'e: Nam digiɗ fuliyan goy kayni hiɗi Beelzebul mulla vi fuliyana.

¹⁶Segena jobom ala nam lisi ɗekka ta may kulo'o wuralawni pa, kay nisi min wakamu.

¹⁷Hay li ma nam wi varta visiya, nam disiya: La mulda tarigekaw dur jar-tuwa'a, na' ɓulak goyo, ziyna ɦo gaa'a kay tuwamu kirɓicik kaw.

¹⁸La Satan ɓuraway jar-tuwamu, mulda valamu mus ta-ta ɗawni nanige? Kay nigi di ala nan digiɗ fuliyan goy kayni hiɗi donota vi Beelzebul.

¹⁹La nan digiɗ fuliyan goy kayni hiɗi donota vi Beelzebul, gurona vigi digiɗsi goy kayni hiɗi mige? Kay na'ta gurona vigiya ma ka kitata kigiya.

²⁰May la nan digiɗ fuliyan goy kayni hiɗi cita-ɓam Lawna, nala mulda-Lawna coowa ta-ta jargi yo!

²¹Hay li ma sa ma donota tuwam koti ŋaa'a hiɗi sle ma duura valamu, nam ŋom slena valamu, slena valam laki ŋomi ŋaa'a kaw.

²²May hay li ma sa ma dono suwum namu coowa, nam kol kalamu, nam yaw sle ma duura valamu ma nam tun vida valam kalamna goyo kaf. Sle ma nam tum ɓuraŋŋa nam as ɓurawam goy kaf kaw.

²³Sa ma min tap hiɗi nanɗi, nam gaw hiɗi nanu, sa ma tok slen kulo hiɗi nanɗi, nam merem meri goyo.

²⁴Hay li ma ful ma liwisna cukawa goyo hay san pa, nam raw hay hay liyn ma niyn mayɗina, gar tun-sukka. May hay li ma nam fi liynɗi, nam di'e: Nan min hot hay ziyna vanu ma nan kali goyo hayam pana.

²⁵Hay li ma nam hotawa, nam fi liyn toray goyo, kotay kaw.

²⁶Hay na'ta nam kal goyo, yaw fuliya ma joo ma suwum namna siɗiya ay kuɗumu. Nisi cuk kalaf hay ziyna, lak hayamu kaw. San kayni makka ta nam fa'ta ɗawni suw ta jewta.

²⁷Hay li ma Yesu ka law ki kayn nala, cat kep jar tokŋa ka siwel talam ala: sle'ta ka kay cat ta ziyaŋ haya'ta hiɗi miira va'a ma naŋ cumna.

²⁸May nam hot dita: Sle'ta ka kayni kay nisi sa hum yoboyna vi Lawna, ŋomom hay diksiya kaw.

²⁹Hay li ma sumun mol talamu, nam tun caw di'e: Jaf-sum sa wulin kayni mi jaf ma joona, nisi gar ɗekka; may ɗekka tara'a tara'a ma vulis tisi suw Yonas ma jobta-Lawna tayɗi.

³⁰Kay ki Yonas li ɗekka tam sum sa Ninive, nala kaw goora vi sana ma li ɗekka tam sum sa vaydina.

³¹Cata-mulda ta kayamta ma fok kulo'o hay buura vi kitata hiɗi sum sa hay zaman ma vaydina, na' ma ka kitat kisiya, kay na' may goy hay vun dabaŋ-gu'ta vi nagata pa, kay hum yalla vi Salomon. Ɗuwgiya, ma ŋol suw Salomon ka tani.

³²Sum sa hay Ninive ma yaw kulo'o hay buura vi kitata hiɗi jaf-sum nisina, nisi ma ka kitat kisiya, kay nisi ham kuɗ yoboyna ma Yonas kusumna, ɗuwgiya, ma ŋol suw Yonas ka tani.

³³Hay li ma san do fitillawa, nam as tunum goy ŋayaya lebo gaa'a kuɗ gilikŋaɗi, may nam tunum kulo kay va ma tun fitil kalamna, kay nisi sa cuk kalafi ma wi haraŋa.

³⁴Iraŋ kayni mi fitilla vi tuwaŋu. La iraŋ ka ŋaa'a, tuwaŋ pet hobay hiɗi haraŋa, may la iraŋ moyo, tuwaŋ pet muɗi jufunu.

³⁵Kay na'ta li ŋali kay haraŋa vaŋu ma muɗ goy jufundaɗi.

³⁶Kay na'ta la tuwaŋ kaf hobawa hiɗi haraŋa, la jufunda ne' kaw mayɗi, tuwaŋ kaf ma fo goy haraŋi, ki hay li ma fitilla ka li haraŋ kaŋu nala.

³⁷Hay li ma Yesu ka di yoboyna, sa ma Farisena kep jobomu kay nam ma tuɗ ti vo valamu. Nam kal vo'o, tun caw ti funa.

³⁸May hay li ma sa ma Farisena wi ala Yesu muz ɓalam jew tinɗi, nam muɗ ɦuyum'.

³⁹May Bum-Sumuna di talamu: Nigi sa Farisena*, kaway ma cina hiɗi tasana nigi muzum ŋorom goyo, may haygi kalafi hobawa hiɗi kulda hiɗi jiw-zlata.

⁴⁰Nigi sa ɦay-ɦayna, nam ma li ŋor slena, nam li sle ma hay kalafna kaw ɗisu?

⁴¹May vulgit ti vulda minda ta may goy haygi kalaf pata, nala slen pet ma muɗ goy bay-gese kigiya.

⁴²Joot kigiya, nigi sa Farisena, kay nigi vul gal ma doogona vi Minte hiɗi ruwe[6] hiɗi hadafn pet, may ɗigerta hiɗi minda tam Lawna nigi li muray hiɗi na'a. May ŋaata nigi as lumu bay hin mara goyɗi.

⁴³Joot kigiya, nigi sa Farisena, nigi min lak hay zlamayn ma vokŋa hay sinagogayna, nigi min gi-deɓta hay lumuna kaw.

⁴⁴Joot kigiya, kay nigi ŋray ca hiɗi yam-usna ma sahay goyna, ma sumun poy kulo kalamu bay wumu.

⁴⁵Sa kep jar sa wi vun-ma-gatna sli ditiya dumu: Bum-yalla, hay li ma naŋ di slen kayni, naŋ ŋulmaawa.

⁴⁶May Yesu hot dita: Joot kigi nigi kaw, nigi sa wi vun-ma-gatna, kay jakŋa ma nekŋa ma ziy lop ŋolo nigi tunum kay sumuna, may nigi kay tuwgiya tun cita-ɓigi talamɗi.

⁴⁷Joot kigiya, nigi sa muw yam-usna vi sa jobta-Lawna, may cisi goyo si sumaygiya.

⁴⁸Nala nigi wi sle ma sumaygi lumna, nigi tap vungiyawa hiɗi lopna visi kaw, kay nisi ci sa jobta-Lawn goyo, may nigi muw yam-usna visiya.

⁴⁹Kuɗ kayni yalla vi Lawna di ala: Nan min cuk sa jobta-Lawna hiɗi sa apostolayna tisiya, segena nisi ma cisi goyo, segena nisi ma lisi lasi.

⁵⁰Kay busuwna vi sa jobta-Lawna kaf ma ɦok goyo tun caw tam kotta vi nagat pana, ma jobis tam jaf-sum nisina.

⁵¹Tun caw tam busuwna vi Abel pa, ta-ta tam busuwna vi Zakariya ma nisi cum goyo jar giwin-ma-ɗifinna hiɗi Tempella. Awa, nan digiya: Busuwna visiya ma jobis tam jaf-sum nisina.

⁵²Joot kigiya, nigi sa wi vun-ma-gatna, kay nigi sli klena vi yallawa goyo, nigi kay tuwgiya kal kalafɗi, nisi sa min cuk kalafi nigi telsiyawa kaw.

⁵³Hay li ma nam kal goy ɗawni pa kalla, sa Farisena* hiɗi sa wi-ɗota tun caw a som dono'o kay nam ma lawsi kay slen ŋolo,

⁵⁴nisi gan jawt vokomu, kay nilam va goy vunamu.