Read Masana LUKAS 12 Bible Online

LUKAS 12 - Masana bible

LUKAS 12

¹Hay na'ta sumun ka tokay birim gaage gaage, nisi goboy a tay tuwsi gaa noŋo. Yesu tun caw law tam sa hatayna valamu sem ma jewna ala: Ligi ŋali hiɗi kufna vi sa Farisena*, kayni ti mileta.

²May va ma yalam baray bar ma bay ma goy haraŋi mayɗi, va ma ŋayaya ma sa as wum goyɗi mayɗi kaw.

³Kay na'ta mige kaw ma nigi dum hay jufunda kayni ma humis goyo hay haraŋa. Sle ma nigi dum hay hum sumuna hay ziyn kayni ma siwelemis kulo'o kay yam-ziyna.

⁴Nan digiya nigi boniyonna, nisi sa ci tuwn goyo, may bugolda li va mara'a suw kaynɗina, nigi ma li nar kisiɗi.

⁵Nan min ɗekgi kay nam ma nigi ma li nar kalamna: Nigi ma li nar kay nam ma, hay li ma nam ci tuwnawa goyo, bugolda gaŋeraŋa valam ka'a kay gi san hay zul ma kuta kaw. Awa, nan fi digi ala nigi ma li nar kayn kalam namu.

⁶San as gus colgon goy vasl kay sisi ma' ɗisu? Kep jaramu ma Lawna yalam jokomu mayɗi.

⁷Ɗuŋus ma kay yigin kaw ŋaɓay kalam kaf. Ligi narɗi, kay nigi gus lop suw colgona.

⁸Nan digiya: Sa ma di goy kanu vok sumuna, goora vi sana ma di goy kalamu vok sa sunda vi Lawna;

⁹may sa ma puw vunamawa kanu vok sumuna, nan ma puw vunan kalamu vok sa sunda vi Lawna kaw.

¹⁰La sa di va ma joowa tam goora vi sana, nam ma fi gida, may sa ma ŋul Ŋusta-Peldettawa, nam ma fi gida noŋɗi.

¹¹Hay li ma nisi ma nargi vok sinagogayna*, vok sa diger-lawta hiɗi sa ŋulona vi nagata, hingi dikgi ɓirgi kay hot-dita ta nigi ma hota' tisitɗi, ligi nar kay dita ta nigi ma da'taɗi kaw.

¹²Kay Ŋusta-Peldetta ma ɗekgi kay va ma nigi ma dum hay liy namna.

¹³Sa kep jar tokŋa di tam Yesu ala: Bum-yalla, daŋ tam ɓasunna kay numa ɓuraw vocota vuma jarma'a.

¹⁴Yesu dumu: Sana, ma musan nan kay ka kitata hiɗi ɓuraw slen jargi kaw kayn mi gige?

¹⁵Bugolda Yesu di tisiya: Ŋomgi tuwgi ŋaa'a kay varta vi farayna, kay la san ka hiɗi slen ŋolo kaw, slen namna as suɗ irita valam goyɗi.

¹⁶Nam ka disi law ma nir-niramna mara'a kep ala: Sa ma farayna ka kep, sinena valamu li ŋolo,

¹⁷nam di hay dikam ala: Nan ma li mige? Kay liyn ma nan ma mol wana van kulo hayamna mayɗi.

¹⁸Nam di'e: Kayni va ma nan min li'e: Nan min to firena van gaa'a, hot inim kulo ŋulo suw jewe. Hay na'ta alkamarena hiɗi jaf-slena van kaf nan ma kom hayamu.

¹⁹Bugolda nan min di tam ciwta vanu ala: Ciwta vanu, slena vag ka toki kulo ŋolo, ir busat ŋolo kaw. Nala nak ma tun sukagu, nak ma ti'e, ci'e, li firiya kaw.

²⁰May Lawna dumu: Naŋ sa ma ɦay-ɦayna, hay henjeta vaydit zawni nisi ma job kay ciwta vaŋu. Sle ma naŋ molom kulona ma hin vi gige?

²¹Nala kaw sa ma tok slen kulo'o hay Lawnɗi, may kay min li faray kay tuwam ma ɗeŋŋa ni, nam ki kayn nala.

²²Nam di tam sa hatayna valamu: Kay na'ta nan digiya: Nigi ma yor tuwgi kay irita vigiɗi, yor tuwgi kay sle ma nigi ma tumnaɗi, yor tuwgi kay sligara ma nigi ma cukumnaɗi kaw.

²³Kay irita kayni ŋol suw tina, tuwna ŋol suw sligara kaw.

²⁴Ɗuwgi tam gaw-gawna tige, nam cuk jafɗi, feɗi kaw, zogodo[7] ma nam cuk slen hayamna mayɗi, feera valam mayɗi kaw. May Lawna vulum tina. Nigi kiram ŋaa suw layayna sem gaage?

²⁵Jargi kayni la san yor tuwam ŋolo nanige kaw, nam as ɦur buura vi irita valam voko ir goldoŋ kep su?

²⁶La nigi may as kay li va ma ir kiɗay ɦawaɗi, nigi as yor tuwgi kay sle hena kay mige?

²⁷Sargi tayna ka wul hay sinena tige: Nam li lopɗi, nam duɓar barawɗi kaw, may nan fi digi ala Salomon hay gajijita valam kaf kaw bay gan tuwam ki tayna nala tuwa.

²⁸May la Lawn cuk sligara nala tam usna ma hay sinena, ma vaydi colay zawni kay gum goyo hay kut jifini, nam ma cuk sligara tigi nigi suwɗi su? Nigi sa vida vigi kiɗayna!

²⁹May nigiya, va ma nigi ma tumna hiɗi va ma nigi ma cumna, nigi ma garamɗi, nigi ma yor tuw kalamɗi kaw.

³⁰Kay slen namna kaf kayni garam kayn si sum sa waana kay nagata. May bugiya wi ala dikgi nigi ka minim kaw.

³¹May gargit ti mulda-Lawna, bugolda nigi ma fi sle hena kuɗa'a.

³²Ligi narɗi, nigi vok ma kiɗayna, kay kir bugi ŋaa'a kay vulgi mulda.

³³Gusgi slena vigi goyo, vulum mi sum sa hawna, duɓgi birim ma tiyof goyɗina, kotgi timgil ma ɓulakɗina hay wuralawna, hay liyn ma kulla co hayamɗi, fotna fi comɗi kaw.

³⁴Kay hay liyn ma farayna vigiya ka hayna, dikgi min mus hay liy namna kaw.

³⁵Jungi kantin furgiya, hin fitilla vigi dok-dok doya kaw.

³⁶Lakgi dok-dok ŋray ca ki sum sa cub ala hay li ma bum-ziyna visi hotiyawa hay yuldeta vi dabayna pa, nisi ma malam vun-ziyn goy gosoy wit', hay li ma nam co ci vun-ziyna.

³⁷Sle'ta ka kay sa sunda sa, hay li ma bum-ziyna hotiyawa, nam fisi lakay jigere. Nan digi gasita, nam ma jun sligara valam furamu, ma laksi gaa vokomu, ma tun caw sunsiya kaw.

³⁸La nam hotay kayn hay ŋomda henjeta ta sem ma'ta kla, ta sem ɦidita kla, la nam fisi nala, sle'ta ka kisiya.

³⁹Wigi goy ŋaa'a, la bum-ziyna wi liyn ma kulla co haya, nam ɗawn ma mus jigere, hin kulla co ziyna valamɗi.

⁴⁰Nala nigi kaw lakgi jigere, kay goora vi sana co ɗawni hay li ma nigi may var kalamɗi.

⁴¹May Peter dumu: Bum-Sumuna, law ma nir-niramna namna naŋ dum kayn kuma numa'a lebo kay sumun kafe su?

⁴²May Bum-Sumuna di'e: Sa ma ŋom-ziyna ma gasiya, ma yali kaw, ma bum-ziyna tunum kay sa sunda valamu kay nam ma vulsi tina visi hay liyamu kayn mi gige?

⁴³Sle'ta ka kay sa ma ŋom-ziyna ma bum-ziyna fum li nala hay li ma nam hotiyawa.

⁴⁴Nan digi gasita, nam ma musum ŋol kay slena valam kaf.

⁴⁵May la sa ma ŋom-ziyna di hay dikam ala: Bum-ziyna van may co tuwaɗi, la nam tun caw to sa sunda sa jufayna hiɗi sa boyna, la nam tun caw ti'e ci'e, ɦoy kuɗ dolayna kaw,

⁴⁶bum-ziyna hotay ɗawni hay buur ma nam may cubumɗi, lebo hay leera ma nam may wumɗi, nam ɗawn ma calam goyo, ma vulum galla valamu jar sa bay-ɗigera.

⁴⁷May sa ma ŋom-ziyna ma wi minda vi bum-ziynawa, may nam min kot slenɗi, min gat kuɗ bum-ziynɗi kaw, nam ma fi watta ŋolo.

⁴⁸May nam ma wi minda vi bum-ziyɗi, may nam li sle ma nagay kay watta ni, nam ma fi watta ir kiɗaya. Sa ma slen vuli talam ŋolla, ma jobomis talam ŋol kaw.

⁴⁹Nan maawa kay do kut gaa kay nagata, la na' tun caw ŋala, nan daram hen mi meloge?

⁵⁰Baptisma mara ka kep ma nan ma fumu, sukan ka yaway kelan ŋolo kay nam ma li gosoyo.

⁵¹Nigi var ala nan mara' gaa kay nagat kayn ti toyta su? Nan fi digi ala mayɗi, May nan mara' ti ɓurawta.

⁵²Kay tun caw wulin pa, sum sa vo hay ziyn vaslna vunsi ma ɓurawa: Sa ɦidin ma poŋ kepe, sa ma'n ma poŋ kep may.

⁵³Bumna vunam ma ɓuraw hiɗi goora, goora vunam ma ɓuraw hiɗi bumna, sumda vuna' ma ɓuraw hiɗi goota, goota vuna' ma ɓuraw hiɗi sumda, sum-goora vuna' ma ɓuraw hiɗi kuno'ta, cata vi goora vuna' ma ɓuraw hiɗi kuno'ta kaw.

⁵⁴Nam di tam sumun lo ala: Hay li ma nigi wi ɗugulla muw kulo hay gal vulatiya[8] wulini wulini nigi tun caw di ala niyn ka si'e.

⁵⁵Hay li ma nigi wi simeɗna may gal kayam pa, nigi di'e: Simeɗna ma vidik ku ŋolo, van li nala kaw.

⁵⁶Nigi sa milena, nigi wi kay poŋ ir sle ma ka li gaa kay nagata hiɗi wuralawna, may liyn ma nay ka hayam wulinna nigi wi kay poŋom iramɗi kay mige?

⁵⁷Nigi kay tuwgiya as kay poŋ ir sle ma ɗigeraɗi kay mige?

⁵⁸Hay li ma naŋ ka tuɗ hiɗi sa ma gawt kaŋŋa vok sa ma ɗiger-lawta*, garaŋ kay toy jaraŋ hiɗi namu hay li ma nigi ka hay hagat tuwa, kay la naɗi, nam ma naraŋ vok sa ma ka kitana, sa ma ka kitana ma vulaŋ goy mi sa ma ŋom daŋgayna, sa ma ŋom daŋgayna ma gaŋ daŋgaya may.

⁵⁹Nan daŋu, naŋ ma kal goyɗi ta-ta naŋ ma wurak bal ma kaŋŋa goy kafe, ta-ta sisi kep kaw hinɗi.