Read Masana LUKAS 13 Bible Online

LUKAS 13 - Masana bible

LUKAS 13

¹Hay liy namna sum sara ma talamu, nisi vum labara kay sle ma li tam sum sa Galileyana sa Pilatus rigas busuwsi hiɗi ɗifinna visiya.

²Nam hotsi dita: Nigi var ala sum sa Galileyan fi lasta nala kayni kay nisi suluk suw sum sa galeliya segen su?

³A'a, nan digiya, la nigi hamgiɗi, nigi kaf ma ba goyo.

⁴Lebo, sum sa doogo yam glafandina, sa hay Silowe sa simdira ɦo gaa kisiya cisi goy kawna, nigi var ala nisi joo'o suw sum sa hay Yerusalemna kaf su?

⁵A'a, nan digiya, la nigi hamgiɗi, nigi kaf ma ba goyo.

⁶Nam disi law ma nir-niramna mara kep ala: Sa mara kep gu-gumna ka piy hay sine gulda-guldana valam zaw. Nam ma kay gar vuɗna hay humamu, may nam fiɗi.

⁷Nala nam di tam sa ma ŋom sinen ala: Wulini busat liy ɦidi nan ka coy gar vuɗna hum gu-gumna zawni, may nan fi vuɗ humam noŋɗi, nala naŋ ma kaam gaa'a, nam col hay sinena kay sli liyn goy waa'a kay mige?

⁸May nam hot ditiya dumu: Bum-ziyna, hinim busa kep tuwa loge, kay nan fi zumum diramu, cuk zigidik kuɗum kaw,

⁹la nam fi vuɗ wacaka kla. May la nam vu'ɗina, naŋ ma kaam maŋ goyo.

¹⁰Hay fatta vi sabatn tara kep Yesu ka hat hay sinagogŋa* mara'a.

¹¹Cat tara kep ay hay liy namna, busat doogo yam glafandi fulla muɗa' moyo, na' hormosi gaa'a, as kay col kulo ja ɗiger noŋɗi.

¹²Yesu wa'a, nam ka di ta' ala: Cata, nak buti goyo kay moyna vagu.

¹³Nam tun ɓalam ka'a, wulini wulini, na' col kulo ja ɗiger, tun caw subur Lawna kaw.

¹⁴May sa ma ŋolla vi sinagogŋa* dikam ɓulaka kay mige Yesu muɗ cat kayni goy ŋaa'a hay buura vi sabatna, nala nam sli dita di tam sumuna: buur ma sumun li lop hayna ka karkiya disu? Nala nigi as kay muɗ tuwgi goy ŋaa'a jar buur namna lakŋi, may hay buura vi sabatnɗi.

¹⁵May Bum-Sumuna hot dita: Nigi sa milena, hay buura vi sabatn kayni nigi ka gra luwayna hiɗi kurona kulo hay gulina valam pa kay tuɗum ci niyɗi su?

¹⁶May cat zawni ti goota vi Abraham, busat wulin doogo yam glafandi na' ka juni kay Satan, a na' fi gra goy kay zigewna hay buura vi sabatna kayni may hay liyamɗi su?

¹⁷Hay li ma nam di slen kayni dina, nisi kaf sa gaw talamna caw zulo yuloŋ'. Sumun kaf li firiya kay lop ma gajijit kuɗumna ma nam lumna pet.

¹⁸Nam di lo: Mulda vi Lawna ŋray hiɗi mige? Nan ma ŋra' hiɗi mige?

¹⁹Na' ŋray ca hiɗi jaf gu-seneve ma san slumu, gum hay sinena valamu, nam wula, muɗ goy guwa, layayn ma dukalawn tun tokosayna valam hay humamu.

²⁰Nam disi lo: Nan ma ŋra mulda-Lawna hiɗi mige?

²¹Na' ŋray hiɗi isna ma cat yawamu, kom jar futuwna ir tasa ɦidi, ta-ta futuwn muɗ kuf kafe.

²²Yesu jik hay hoyok-ziy ma ŋulona hiɗi ma gurayna kaf, nam ka hatsiya, iram muɗi hay hagat ta Yerusalemta.

²³Sa kep jobom ala: Bum-Sumuna, sum sa fi su'da ma li ɗawn kiɗay ɦawa su? Nam hotsi dita:

²⁴Sogi tuwgiya kay cuk kalafi hay vun-gala ma hebayna, kay nan digiya, sumun ŋolo ma gar a cuk kalafi may nisi asɗi.

²⁵Hay li ma bum-ziyn fokawa kulo'o, hay li ma nam duk vun-ziynawa kaw, nigi ma lak goy jiya, nigi ma dab vun-ziyna, nigi ma di ala: Bum-Sumuna, malaŋ vun-ziyn goy kuma'a malge! Nam ma hotgi dit ala: Liyn ma nigi may hay pana nan wumɗi.

²⁶Hay na'ta nigi ma tun caw di ala: Numa'a ay ti'e ci'e vok iraŋu, naŋ hat hay hagana vuma'a.

²⁷May nam ma hotgi dit ala: Liyn ma nigi ay hayam pana nan wumɗi, patgis goyo hinanu, nigi kaf sa li jiw-zlata.

²⁸Nigi ma tiya mut siygiya kaw, hay li ma nigi ma wi Abraham hiɗi Isaak hiɗi Yakub hiɗi sa jobta-Lawna kaf lakay hay mulda vi Lawna, may nigi ma cukis goy jiya.

²⁹Sumun ma may gal kuɗuwu, gal vulatiya, gal gaa'a hiɗi kayami pa kaw, nisi ma lak ti tina hay mulda-Lawna.

³⁰May segen ŋolo jar sa jewna ma muɗ si sa cawna, segen ŋolo jar sa cawna ma muɗ si sa jewna kaw.

³¹Hay liy namna kayni, sum segena jar sa Farisena* co'o dum ala; kalaŋ goy hay liyn tani, kay Herod min caŋ goyo.

³²Nam disiya: Tuɗgi digi tam cekem namna ala: Humaŋu, nan ka digiɗ fuliyan goyo, nan ka yer sumun goyo kay vaydi, kay jifini kaw; hay buurta ɦidit ɗawni yan ma daba.

³³Nir na'ta kep la litigekaw nan ma poy vaydi, jifini hiɗi buurta ka'ta kaw, kay sa ma jobta-Lawna fi mit goy hay liy maraɗi, may hay Yerusalem.

³⁴Nigi Yerusalemna! Nigi Yerusalemna! Nigi ci sa jobta-Lawna goyo, sum sa cuki tigina nigi gisi hiɗi goorhoyona kaw. Dok-dok nan min tok sum sa hay Yerusalemna ki slekka tok gurona va' gaa kuɗ gilaŋata' nala, may nigi minɗi.

³⁵Humgiya, ziyna vigi ma hin goyo; may nan digiya, nigi ma wan loɗi, ta-ta hay li ma nigi ma di ala: Sle'ta ka kay nam ma min ma'a hay semda vi Bum-Sumuna.