Read Masana LUKAS 15 Bible Online

LUKAS 15 - Masana bible

LUKAS 15

¹Sa tar vun-lumuna hiɗi sa sulukŋa co goboy tam Yesu kay humumu.

²Sa Farisena* hiɗi sa wi-ɗota tun caw ŋurnaya, nisi di'e: san kayni tap hiɗi sa sulukŋa, ti fun hiɗi nisiya kaw.

³May nam ka disi law ma nir-niramna ala:

⁴La san jargiya ka hiɗi fok-dimin kis-kepe, la tara ba kuɗum kepe ni, nam hin ma dok-zleeŋe yam zleeŋen hay fulda kay tuɗ gar ta ba-goyta ta-ta nam fa'a ɗisu?

⁵Hay li ma nam fa'awa, nam wata'ay pelem hiɗi firita.

⁶Hay li ma nam coowa vo'o, nam yi boniyomna hiɗi sugoliyomna disiya: firigi hiɗi nanu, kay ɦu-dimita vanu ta ba goy kanta nan fa'awa.

⁷Nan digiya: Nala kaw firita ma li hay wuralawna kay sa ma sulukŋa kepe ma hama, suw kay sum sa dok-zleeŋe yam zleeŋe sa hamɗina.

⁸Lebo, la cat ka hiɗi gurju drakma* doogo, may la na' ba drakma mara kuɗum kepe, na' do fitilla, tok hay ziyd goyo, gar hiɗi ŋali, ta-ta na' fi gurjut tuwa disu?

⁹Hay li ma na' fa'awa, na' yi boniyo' sa boyna hiɗi nuriyo'na sa ziyna disi ala: Firigi hiɗi nanu, kay gurju drakma ta ba goy kanta nan fa'awa.

¹⁰Nan digiya: firita ka jar sa sunda-wuralawna nala kaw kay sa ma sulukŋa kep ma hamna.

¹¹Nam di lo ala: San kepe gurona valam ka ma':

¹²Ma goora di bulum ala: Bunu, vulan ir farayna vanu. Bumna ɓuraw farayna valam jarsiya.

¹³Buur ne' bugolda, nam tok slena valamu, kali hay nagata ta gineta, ɗawni nam ba slena valam goy kaf hay poyta viyuwta jar sa sulukŋa.

¹⁴Hay li ma nam ba slena valamawa kaf goyo, mayta ŋolda nig kay nagata na'ta. Sle ma hay ɓalamna vat goy kafe.

¹⁵Nam kal mus vok sa ma hay nagat na'ta kepe. San kayni gum goy hay sinena valamu kay ŋomom bagumna.

¹⁶Hayam dar a hob hiɗi gayaŋŋa ma bagumna mutumna, may sa ma vulumti mayɗi.

¹⁷Hay li ma yal dumawa dina, nam di'e: Sum sa li lop vo vi bun ka gaage gaage, nisi ka fi tina visiya, may nan ci tuwan goy tani kay mayta kayni litige?

¹⁸Nan min fok kulo'o tuɗ tam bunu dum ala: Bunu, nan li sulukawa kat wuralawna, kataŋ naŋ kaw,

¹⁹Nan nagay kay sa yan ala goora vaŋu loɗi. Naŋ ma ɗuwan ki nan mi kep jar sa li lop vo hay ziyna vaŋu ɦawa nala.

²⁰Nam fokay kulo'o, ma tam bulumu. Hay li ma nam ay goy gine tuwa, bulum wumu, nam muɗ kiram haw ŋolo, nam jaŋ kiramu, bowomu, firiyimu.

²¹Goora di bulumu: Bunu, nan li sulukawa kat wuralawna, kataŋ naŋ kaw, nan nagay a sa yan ala goora vaŋ loɗi.

²²May bulumu di tam sa sunda valamu: Marangi sligar ma ŋaan gosoyo cukum talamu, gum way ɓalamu, cukum tuguru selemu kaw.

²³Margi goor-put ma jakayna, ŋatamu, nay taya, firiyay kaw.

²⁴Kay goora van zawni ay miti waŋi, may muɗawa iriya lo. Nam ay bay goyo, may nan fumawa. Nisi tun caw li firi ŋolo.

²⁵May goor ma ŋolla ay goy hay sinen tuwa. Hay li ma nam co goboy hiɗi ziyna, nam hum del dilla hiɗi liwta vi darayna.

²⁶Nam yi sa mara ma vo hay ziyn kep, jobom ala li kayn mi mige?

²⁷Nam dumu: Ɓasuŋŋa hotiyawa vo'o, buŋu ŋat goor-put jakaynawa, kay nam fum hiɗi tuwam goy ŋaa'a.

²⁸May nam muɗ ɦiya, min kal kalafɗi. Bulumu tuɗ goy jiya, giɗelem delemu.

²⁹Nam hot dit tam bulum ala: Humaŋ tige, busat ŋolo nan ka sunaŋu, fat tara kep kaw nan bay ŋelaŋ vunaŋ noŋo. May goor ɦu-mee kep kaw naŋ bay vulanti tuwa noŋo kay li firi hiɗi boniyonna.

³⁰May goora vaŋ namna zawni ba slena vaŋay goy kuɗ boy sa viyuwna kafe, may hay li ma nam coyawa, naŋ ŋat goor-put ma jakayn kuɗum namu!

³¹Bulum dumu: Goora vanu, naŋ ka dok-dok hiɗi nanu, slena van pet mi faŋŋa;

³²may kay li firi ŋolo kayn ŋaa'a, kay ɓasuŋŋa zawni ay miti mit, may nam muɗawa iri lo; nam ay baya, may nay fumawa.