Read Masana LUKAS 16 Bible Online

LUKAS 16 - Masana bible

LUKAS 16

¹Yesu di tam sa hatayna valam lo ala: Sa ma farayna ay kepe. Sa ma ŋomom slena valam ka'a. Nisi patam diram goy vun mulamna ala nam ka kul slena valam goyo.

²Mulamna yumu dumu: Nan hum labar kaŋ kayn ir nanige? Naŋ van sem slenay goy tige, kay naŋ fi ŋom ziyna van loɗi.

³Wulini sa ma ŋom slena di hayam kalaf ala: Nan ma li mige, kay wulini mulanna min yaw lop ma ŋom slena goy kanu? Donota vanu as kay zumɗi, nan li zulo'o kay siɗawa kaw.

⁴Nan wi va ma nan ma lumna, kay sum sara'a ma van vo visiya hay li ma lopna vi ŋomda yawawa goy kanu.

⁵Sum sa balla vi mulamna ka kisina nam yisi kafe, nam di tam ma jewna: Balla vi mulanna ka kaŋ gaage?

⁶Nam dumu: Mula goŋgoŋ kis kepe. Ma ŋom-slena dumu: Slaŋ ɗerwelda vaŋu, musaŋ gaa'a, ɗoŋ dok-vasl gosoyo.

⁷Bugolda nam di tam sa mara'a: Naŋu balla ka kaŋ gaage? Nam hot dit ala alkamarena buhu kis. Nam dumu: Slaŋ ɗerwelda vaŋu ɗoŋ buhu dok-glafandi.

⁸Bum-ziyna subur sa ma ŋomda ma bay-ɗigera, kay nam li slen hiɗi yali, kay gurona vi sa nagat tanna li yal tam bogoysina suw gurona vi haraŋa.

⁹May nan digiya: Vigi bono hiɗi faray ma bay-ɗigera, kay hay li ma nigi hinawa goy hawi, nam ma tapgi kuɗumu hay ziy ma vatɗina.

¹⁰Sa ma ŋom sle ma kiɗay ɦawan hay liyamu, sle ma ŋulona nam as ŋomom hay liyam kaw, sa ma ŋom sle ma kiɗayn hay bay-ɗigerta, sle ma ŋulon nam ma ŋomom hay bay-ɗigerta kaw.

¹¹Kay na'ta la nigi ŋom sle ma bay-gasin hay liyamɗi, sa ma as vulgi sle ma gasin hay ɓigi ɗawni mi gige?

¹²La nigi may li ɗigerta hay ŋomda vi slena vi sa maraɗi, sa ma as vulgi sle ma muɗ goy vigin ɗawni mi gige?

¹³Sa ma vok mulla fi sun muliyan ma'ɗi, la nanige kaw nam ma ka gaw tam ma kepna, min hena may; tap hiɗi ma kepna, ka gaw hiɗi hena may. Nigi fi sum Lawna hiɗi Mamon[10] ma' petɗi.

¹⁴Sa Farisena* sa min gurjuta hum kayni pet, nisi ŋul Yesu.

¹⁵Nam disiya: Nigiya, nigi li tuwgi ɗiger vok sumuna, may Lawn wi dikgiya, kay va ma kir sumun ŋaa ŋolla nam kir Lawn liwisi.

¹⁶Ta-ta tam Yohana kayni mi liyna vi gatta hiɗi sa jobta-Lawna, tun caw hay liy namna pa, labara ma firina vi mulda ka kus zaw, gigekaw kirit hiɗi dono'o kay kal kalaf haya'a.

¹⁷Dukalawna hiɗi nagata ma vat goyo bay lopo, may sle ma ɗoy hay Gatta as vat goy noŋɗi.

¹⁸Gigekaw ma gi cata valam goyo sli tara'a, nam li zlata-bulo'o. Sa ma sli cata ta giy goy kay jufa'ta nam li zlata-bulo'o. Sa ma farayna hiɗi Lasarus sa ma hawna

¹⁹Sa ma farayna ay kepe, nam ganay hiɗi sligar-purpella hiɗi sligar-haɓna. Nam musi hay firita hiɗi gajijita hay buurta kaf.

²⁰May sa ma hawna ay kaw, semda valamu Lasarus, tuwam pet kaay goy mili, nisi burum gaa hay vun-galana vi sa ma farayna.

²¹Hayam dar a hob hiɗi helekŋa ma yak gaa kuɗ tablena vi sa ma farayna. Durnayna kaw ma'a tilek vun milla valamu.

²²Hay li ma sa ma hawna mitawa, sa sunda slumu, kalam musum kulo tam Abraham. May bugolda sa ma farayn kaw mitawa, nisi pumu.

²³Hay li ma nam poŋ iram kulo hay liyna vi sa mitina hay lasta kayni nam wi Abraham goy gine'e, hiɗi Lasarus ka musi kulo talam dam'.

²⁴Nam siwela di'e; Bunu Abraham, laŋ slugotay kan lige. Gaŋ Lasarus aya, kay nam ma kal cita-ɓalam hay niyna kay sleɗan sinanu, kay nan ka li las ŋolo hay kut tani.

²⁵May Abraham dumu: goora vanu, humaŋ ma gaŋ ala naŋ fi slen ŋolo hay li ma naŋ ay hay nagata, may Lasarus ay vun joota. Wulini nam ka tani hay teŋ-irta, may naŋu, naŋ ka ci lasta.

²⁶Suw kayni lo, zul ma wiŋŋa ma ŋolo ka jargi hiɗi numa'a, kay sa ma tuma tani pa min kal tigiya asɗi, sa ma tigi pa fi ma kulo tuma noŋɗi kaw.

²⁷Sa ma farayna di'e: Nala nan jobaŋu bunu, gaŋ Lasarus sunu vo hay ziyna vi bunu:

²⁸Kay ɓosiyonna ka vasl, nam ma tuɗ kus yoboyn tisiya, kay nisi ma co hay liyna vi lasta tanɗi.

²⁹Abraham hot dita: Musus hiɗi sa jobta-Lawna ka jarsiya, hinsi hum kuɗsiya.

³⁰May nam di'e: A'a bunu Abraham, la sa jar sa mitin pa tuɗ tisiya, nisi ma hama.

³¹Abraham hot dumu: La nisi hum kuɗ Musus hiɗi sa jobta-Lawnɗi, la sa day kulo jar sa mitin pa kaw nisi as humɗi.