Read Masana LUKAS 21 Bible Online

LUKAS 21 - Masana bible

LUKAS 21

¹Hay li ma Yesu cuk iram goyo, nam wi sa Farisena* ka cuk vulda visiya hay Tempella.

²Nam wi cata duhulta ta hawta kaw, na' cuk gurju ta guray ma'.

³Nam di'e: Nan digi gasita, cata duhulta zawni cuk kayn suw segen kafe;

⁴Kay sum segen lakŋi cuk vulda visi hay timgil kayn kuɗ asta visiya, may na'a hay hawta va'a cuk sle ma ŋom ŋil tuwa' petna.

⁵Hay li ma segen ka law kay Tempella ala nam koti hiɗi hiɗiy ma ŋaana, hiɗi sle ma sumun maram hay vulda kaw, Yesu di'e:

⁶Buura ma ma'a, hay buur namna ɗawni, hiɗiy ma nigi ɗuwum lakŋi, mara as hin kulo kay tuwam bay ɦo gaaɗi mayɗi.

⁷Nisi jobomu: Bum-yalla, slen kayni ma li lancitige? Hay li ma slen kayni hebawa goboyo, va ma ɗek goy kalamna mi mige?

⁸Yesu disiya: Ligi ŋali, hin sa ɗutgi goyɗi. Kay sumun ŋolo ma ma'a hay semda vanu, nisi ma di ala: Nanu mi namu, lebo liyn coowa goboyo. May nigi ma tap kuɗsiɗi.

⁹Hay li ma nigi hum labarawa kay duura hiɗi ɦilayta-kulota, ligi narɗi. Kay la linigekaw, slen kayni ma li goy jewe, may dabaŋ-gu'ta ma co kuɗum deɗi.

¹⁰Nam disiya: Jaf-sum sara'a ma yaw kulo'o kay jaf-sum sara'a, mulda tara'a ma fok kulo'o kay mulda tara'a kaw.

¹¹Wiira-nagata ma li ŋolo, mayta hiɗi moy ma joona ma li tani, li ɗawn kaw, sle ma muɗ sumun nari ma li ŋolo, ɗekka ŋulota ma li hay dukalawna kaw.

¹²May jew slen kayni, nisi ma yawgiya, nisi ma lasgiya kaw; nisi ma vulgi goy tam sinagogayna*, nisi ma cukgi daŋgaya, nisi ma nargi vok muliyana hiɗi guvernera kaw kuɗ semda vanu.

¹³Kayni ma vulgi liyna kay li di-goyta.

¹⁴Vigi goy kigi ala, nigi ma var goy jewe kay hot-dita ta nigi ma hota' tisitɗi,

¹⁵kay nan ma vulgi dita hiɗi yalla, ma sa gawt kigina as ci wayt hiɗi namɗi.

¹⁶sumaygiya, ɓosiyogina, sugolaygina hiɗi boniyogina ma vul segen jargi ŋolo goy tam cita-goyta.

¹⁷Sumun kaf ma ka gawt kigiya kay semda vanu.

¹⁸May ɗuŋus ma kigina kep kaw ma ba goyɗi.

¹⁹Sogi tuwgiya, nala nigi ma suɗ ciwta vigi goyo.

²⁰Hay li ma nigi wi Yerusalem ŋuyi kay sojena, hay na'ta nigi ma wi ala ɓulakka va' ka goboyo.

²¹Hay na'ta nisi sa ka hay Yudiya ma pir jaŋ kulo kay hiɗiyna, nisi sa ka hay Yerusalem ma ŋay goyo, nisi sa ka goy hay sinena ma cuk kulo hay hoyok-ziynɗi.

²²Kay kayni mi buura vi wurakŋa, kay sle ma ɗoy petna vunam ma hoba.

²³Joot kay boy sa hayna hiɗi nisi sa guron digsiya hay buur namna ɗawni, kay lasta ma li ŋolo hay nagata, ɦiyda ma li kat sum nisina kaw.

²⁴Nisi ma cuk gaa vok kew-gaferaŋa, nisi ma kalis goy gorvo'o jar jaf-sumuna kafe, sum sa waana ma tay Yerusalem gaa'a kuɗ sesiya, ta-ta liyna vi sa waana vunam ma hob tuwa.

²⁵Ɗekka ma li hay fatta, hay tilla hiɗi mislekŋa; gaa'a kay nagata kaw, sumuna ma wi va ma nisi ma liɗi, hay li ma nisi hum suwana vi niy-lumna hiɗi billa;

²⁶Narta ma ci sumuna hay li ma nisi cub slena ma min li hay nagata, kay donota vi dukalawna ma geɗa.

²⁷Hay na'ta nisi ma wi goora vi sana co hay ɗugulla hiɗi gaŋeraŋa hiɗi gajijita ŋolo.

²⁸Hay li ma slen kayni tun caw li'e, yawgi kulo'o, poŋgi yigi kulo'o, kay butta-goyta vigiya ka co goboyo.

²⁹Nam disi law ma nir-niramna mara lo ala: ɗuwgi tam gu-gumna hiɗi guway hegen kaf.

³⁰Hay li ma nam tun caw ɓo'o, nigi kay tuwgi wi ala menda ka goboyo.

³¹Nala nigi kaw, hay li ma nigi wi slen kayni ka co'o, nigi ma wi ala mulda-Lawna ka goboyo.

³²Nan digi gasita, jaf-sumun kayni ma vat goy noŋɗi, ta-ta slen kayni pet li'e.

³³Dukalawna hiɗi nagata ma vat goyo, may yoboyna vanu ma vat goy noŋɗi.

³⁴Ligi ŋal mi tuwgiya, kay dikgi ma muɗ neke kay haramna vi slena hiɗi dolaynaɗi, kuɗ vaara kay slena vi nagatɗi kaw, kay a buur namna ma co kigi tukumu,

³⁵ki dena naɗi, kay nam ma co'o kay sum sa gaa kay nagat kuɗulu'.

³⁶May lakgi jigere, siɗawgi hay buura kaf, kay nigi ma fi dono'o kay hulot goy vun slen ma min li pete, kay nigi ma lak kulo'o vok goora vi sana.

³⁷Hay falayta, Yesu ka hat hay Tempella, hay henjeta nam kal bur goy kay hiɗiyta Olive.

³⁸Hay graw culum culum' kayni, sumun kal goy hay Tempella kay hum hatta valamu.