Read Masana LUKAS 22 Bible Online

LUKAS 22 - Masana bible

LUKAS 22

¹Yuldeta vi fun-bay-kufna ta ya' ala Paskata co goboyo.

²Muliyan ŋulo sa-ɗifinna hiɗi sa wi-ɗota gar a nanige nisi ma ci Yesu goyo; kay nisi li nar kay sumuna.

³Satan kal hay Yudas Iskariyot, ma jar sa doogo yam ma'na.

⁴Yudas kaliya, nam ŋaf hiɗi muliyan ŋulo sa-ɗifinna hiɗi sa ŋulona vi sa gardena kaw, nam ŋra vunam hiɗi nisiya kay yal ma nisi ma vi Yesuna.

⁵Nisi li firiya, nala nisi ŋra vunsiya kay vulum gurjuta.

⁶Nam vi lawta visiya, nam tun caw gar liyn ma nam vulsi Yesu goyo bay sumun wi kayni.

⁷Buura vi fun-bay-kufna, ma nisi ŋat fok-dimi ma paskana coowa.

⁸Yesu cuk Peter hiɗi Yohana, nam disiya: Tuɗgi kotay ɦu-dimi ma paskana, kay nay ma tumu.

⁹Nisi dumu: Naŋ min ala numa tuɗ kotaŋ goor ɦu-dimi ma paskana gal arige?

¹⁰Nam disiya: Hay li ma nigi coowa hay hoyok-ziyna, nigi ma ŋaf hiɗi sa ma ziy genda niyna kepe, tapgi kuɗumu, tuɗgi hay ziy ma nam ma tuɗ hayna,

¹¹nigi ma di tam bum-ziyna ala: Bum-yalla ka di taŋu: Ziyd ta nam ma ti ɦu-dimi paskana hiɗi sa hatayna valamu ka arige?

¹²Nam ma ɗekgi kay ziyda ta ŋolda ta kulota, koti kot, nigi ma kot ɦu-dimi paskana hay ziy na'ta.

¹³Nisi kaliya, nisi fi slen ki nam disi nala, nisi kot goor ɦu-dimi paskana kaw.

¹⁴Hay li ma liyn asawa, nam mus ti'e, sa apostolayna hiɗi nam kaw.

¹⁵Nam disiya: Dikan min ŋolo kay ti goor ɦu-dimi paskana hiɗi nigiya jew lasta vanu,

¹⁶kay nan digiya: Nan ma tum loɗi ta-ta hay li ma vunam ma hoba hay mulda-Lawna.

¹⁷Nam sli kaway-ma-cina gi deɓe di'e: Yawgi kayni, ɓurawam jar-tuwgiya.

¹⁸Kay nan digiya: Nan ma ci kuɗ vuɗ gulda-guldan loɗi, ta-ta hay li ma mulda-Lawna ma ma'a.

¹⁹Bugolda nam sli funa, bugol gi deɓ gina, nam jutum iram goyo, vulsiya di'e: Kayni mi tuwanu, ma vuli goy kigina, ligi kayni kay humgi ma gigi kanu.

²⁰Nala kaw nam sli kaway-ma-cina bugol tina, nam vulsita di'e: kaway-ma-cina kayni mi bonota wulita hay busuwna vanu, ma ɦokay goy kigiya.

²¹May humgiya, nam ma di newt kanu ka ti hiɗi nan kay table kepe.

²²Goora vi sana ma kala, ki kotay kalam nala, may joot kay sa ma di newt kalamna.

²³nisi tun caw job tuwsi jar-tuwsi ala sa ma min li van kayni mi gige?

²⁴Ci-wayta fok kulo jarsi ala ma ŋolla jarsiya ma lin mi gige?

²⁵Yesu disiya: Muliyana vi jaf-sumuna ti mul kisiya, nisi sa ka hiɗi gaŋeraŋ kay sumuna min ala sumun yisi ala sum sa ŋaana.

²⁶May nigi ma li naɗi. Ma ŋolla jargiya ma muɗ mi ma cawna, ma ŋolla jargiya ma muɗ mi ma sungina kaw.

²⁷Sa ma musi gaa ti'e hiɗi sa ma sunumna ma ŋolla jarsiya mi gige? Mi ma musi gaa tina ɗisu? May nan ka jargiya ki sa ma sungin nala.

²⁸Nigiya, nigi si sa ka so tuwgi hiɗi nanu hay wakka vanu;

²⁹kuɗ na'ta nan vulgi muldawa, ki bunu vulan mulda man nanu nala kaw.

³⁰Kay nigi ma ti'e ci'e kay tablena vanu hay mulda vanu, nigi ma lak hay zlamayn-mulda kaw kay ka kitat kay jaf sa Israyel sa doogo yam ma'na.

³¹Simon, Simon, humgiya, Satan ka gargiya, kay nam min gasgi goyo ki alkamaren nala.

³²May nan siɗaw kaŋu kay vida vaŋu ma vat goyɗi, hay li ma naŋ hotiyawa tanu, naŋ ma vul donot mi ɓosiyoŋŋa hay vida.

³³Peter dumu: Bum-Sumuna, nan as kay tuɗ hiɗi naŋu hay daŋgayna, hay mitta kaw.

³⁴Yesu di'e: Peter nan daŋu: Jew a slek-gulokŋ hel kayni, naŋ ma puw vunaŋ kan sem hiɗi ala naŋ wanɗi.

³⁵Nam disi lo: Hay li ma nan cukgi goy bay birimi, bay sakŋa, bay tuguruna kaw, sle mara kiɗa goy kigi su? Nisi hot dita: mayɗi.

³⁶nam hot disiya: Wulin hayɗini, nam ma birimna valam kana, nam ma slum kalamu, sa ma sak ka kalamu nala kaw, sa ma kew-gaferaŋa valam mayɗina, nam ma gus sligara valam goyo, gus kew-gaferaŋ kepe.

³⁷Kay nan digiya: Slen ma ɗoy kanu vunam ma hoba, slen ma ɗoy ala: Nisi ŋaɓam jar sa jiw-zlata.[17] sle ma ɗoy kanu yalam gijay goboyo.

³⁸Nisi di'e: Bum-Sumuna, ɗuwaŋu, kew-gaferaŋa ka ma'. Nam disiya: Kayni asawa.

³⁹Hay li ma nisi cukay goy cukŋa, ki nam ka li dok-dok nala, nam kal kat hiɗiyt Olive. Sa hatayn tap kuɗumu kaw.

⁴⁰Hay li ma nisi co hay liy namna, nam disiya: siɗawgiya, kay nigi ma cuk hay nemdaɗi.

⁴¹Nam rasi bugolomu ir ki sa gi hiɗiyn vokom nata, nam girif gaa'a siɗawa di'e:

⁴²Bunu, la naŋ mina, hinaŋ kaway-ma-cin kayni raw goy kanu, nir na'ta kepe kayni may minda vanɗi, may naŋ ma hin minda vaŋ li'e.

⁴³Sunda-wuralawna vul tuwa'ay kiram kulo wuralawn pa, vulum dono'o.

⁴⁴Nam co vun narta vi mitta, nam siɗaw dono'o, ɦiɓiyna valamu muɗi tol gaa'a ki busuwna nala.

⁴⁵Hay li ma nam fokay kulo'o hay siɗawta pa, nam ma tam sa hatayna valamu, nam fisi buri sene, kay yorta vi diksiya.

⁴⁶Nam disiya: Nigi burgi sene kay mige? Yawgi kulo'o siɗawgiya, kay nigi ma co hay nemdaɗi.

⁴⁷Hay li ma nam ka law tuwa, sumun ŋolo co'o, nam ma yum Yudas ma jar sa doogo yam ma'na ka kuɗsiya. Nam tuni voksiya, nam ma tam Yesu kay ŋaf vunam hiɗi namu.

⁴⁸May Yesu di Yudas: Yudas, naŋ di newt kay goora vi sana hiɗi ŋaf-vunda su?

⁴⁹Hay li ma nisi sa kuɗumna wi va ma lina, nisi di'e: Bum-Sumuna, numa ma cal hiɗi kew-gaferaŋa su?

⁵⁰Sa kuɗsi kep cal sa ma sunda vi mul-ma-ɗifinna hay humam ta jufta, kaam humam goyo.

⁵¹May Yesu sli ditiya di'e: Lakgiya! Bugolda nam jo hum sa namna, muɗum goy ŋaa'a.

⁵²Bugolda Yesu di tam muliyan ŋulo sa-ɗifinna, sa ŋulona vi sa ŋom Tempella hiɗi sa maariyana, nisi sa co vumna, nam disi ala: Nigi cooya ki nigi co gar sa ma coŋcoloŋŋa nala, hiɗi kew-gaferaŋa hiɗi zugulayna kaw.

⁵³Buura kaf nan ay hiɗi nigiya hay Tempella, nigi tun ɓigi tanɗi may. May co kayni mi liyna vigiya hiɗi donota vi jufunda.

⁵⁴Hay li ma nisi vi Yesu, nisi kalam hay ziyna vi mul ŋol ma-ɗifinna. May Peter ka tuɗ ay goy bugolom gine'e.

⁵⁵Nisi ŋal kuta hay wur-daŋŋa, lak gaa vuna'a. Peter mus jarsiya.

⁵⁶Goota ta li sunda kepe, hay li ma na' wumu, na' cuk ira' kiramu di'e: San damni kaw ay hiɗi namu.

⁵⁷May nam puw vunamu di ala: Cata, san kayni nan wumɗi.

⁵⁸Mus ne' bugolda, sa mara kep wumu, ka dum ala: Naŋ kaw kuɗ sum nisina. May Peter di'e: Sana, may mi nanɗi.

⁵⁹Ir ki leer kep nala lo bugolda, sa mara ma'a, ka di ala: Gasiya, san damni ay hiɗi namu, kay nam mi sa ma Galileyana.

⁶⁰May Peter di'e: Sana, va ma naŋ dumna zawni, nan wum cawamɗi. Wulini wulini hay li ma vunam bay vat tuwa, slek-gulokŋ hela.

⁶¹Bum-Sumuna muɗ iramu, nam sar Peter. Nala Peter humam gum kay yoboyn ma Bum-Sumuna dum ala: Vaydi jaw a slek-gulokŋ hela, naŋ ma puw vunaŋ kanu sem ɦidi.

⁶²Nam kal goy jiya, tiy ŋolo.

⁶³Sum sa vi Yesuna ka burahamu, ka tomu kaw.

⁶⁴Nisi jun sligar kiramu, jobom ala: Daŋay tige, caŋ zawn gige?

⁶⁵Nisi di law ma ŋulla mara'a mara'a ŋolo kalamu.

⁶⁶Hay li ma liyn foowa goyo, sa maariyana vi sumuna hiɗi muliyan ŋulo sa-ɗifinna hiɗi sa wi-ɗota dakaya, nisi kal Yesu vok sa ɗiger-lawta*.

⁶⁷Nisi di'e: La naŋ mi Kristu, naŋ duma'aya. Yesu disiya: La nan digi kaw, nigi ma vi kayn noŋɗi,

⁶⁸la nan jobgiya, nigi ma hotan ditɗi.

⁶⁹May wulini pa, goora vi sana ma mus hay gal ɓam ma juf ma gaŋeraŋa vi Lawna.

⁷⁰Hay na'ta nisi kaf di'e: Naŋu mi goora vi Lawna su? Nam disiya: Nigi di hay liyamu, nanu mi namu.

⁷¹Nisi di'e: Nay ma lum hiɗi di-goyta mi meloge? Kay nay kay tuwaya hum dita ta may goy vunamtawa.