Read Masana LUKAS 4 Bible Online

LUKAS 4 - Masana bible

LUKAS 4

¹Yesu hobay hiɗi Ŋusta-Peldetta, nam hotay goy hay Yordan pa, Ŋusta gum iram goy hay fulda,

²ɗawni hay fulda Matna nememu ir buur dok-fiɗi. Hay buur namna lakŋi nam may ti noŋɗi, hay li ma buur namna vatawana, mayta tun caw cumu.

³Matna dumu: La naŋ mi goora vi Lawna, vulaŋ hagata kay hiɗiyn waŋŋi ma muɗ goy fuwa.

⁴Yesu hot dit talamu: Ɗot ɗo'ay ala sana mus iriya kay fu ɦawaɗi,

⁵Matna kalam kulo'o kay hiɗiyta fiyokka, ir liyn neeɗa ɦawa nam ɗekem kay mulda vi nagat kafe,

⁶ka dum ala: Nan min vulaŋ gaŋeraŋa hiɗi gajijita vi mulda lakŋi kafe, kay na' vuli man nanu ni, nan as vula' mi gigekaw ma nan mina.

⁷Kay na'ta la naŋ herawa gaa vokanu kay girifanu ni, nam kaf lakŋi ma muɗ vaŋu.

⁸Yesu hotom dita: Ɗot di ala: Naŋ ma girifim mi Bum-Sumuna Lawna vaŋu, naŋ ma sunumti mi nam kepe.

⁹Matna kalam kulo'o hay Yerusalem lo, nam musum kulo kay yam Tempella, ka dum ala: La naŋu mi goora vi Lawna, gaŋ tuwaŋis gaa tan pa:

¹⁰Kay ɗot ɗo'ay ala: Nam ma di sa suna-wuralawna valamu kaŋu kay ŋomaŋu,

¹¹Nisi ma ziyaŋ kulo hay ɓisiya, kay seŋ ma dab tam hiɗiyn noŋɗi.[2]

¹²Yesu hot dumu: Ɗot di ala: Naŋ ma nem Bum-Sumuna Lawna vaŋɗi.

¹³Hay li ma Matna vat nemda valamu vatna, nam kaliya, ta-ta cub buur mara'a.

¹⁴Yesu hot hay Galileya, hiɗi donota vi Ŋusta, selem tiy goy hay liy namna kafe.

¹⁵Nam ka hat hay sinagogayna*, sumun kaf ka tiyim selemu.

¹⁶Nam kali hay Nasaret, liyn ma nam wul hayna, ki nam ka li dok-dok nala, nam kal hay sinagogayna hay buura vi sabatna, nam fok kulo'o kay jaŋ ɗerwelda

¹⁷Nisi vulum ɗerwelda vi sa ma jobta-Lawna Esaya. Nam mal ɗerwelda goyo, nam jaŋ hay liy ma ɗoy ala:

¹⁸Ŋusta vi Bum-Sumuna ka kanu, kay nam ɦok mul kanu kay nan yer goyo sum sa sutaysi toyna, Kay nan ma kus labara ma firina tam sa hawna; kay vul butta-goyta tam nisi sa ka hay daŋgayna, kay mal ir sa dukin goyo, Kay but goyo nisi sa ka vun curo'da,

¹⁹Kay siwel goyo kay busata ta slugota vi Bum-Sumuna.[3]

²⁰Ɓugolda nam ɗut ɗerwelda kulo'o, vula' mi sa sunda, hot mus gaa'a. Sumuna kaf hay sinagogŋa* irsi ka cuki kalamu.

²¹Nam tun caw law tisi ala: Vaydi yoboyn ma nigi ka humum tanna vunam hobawa.

²²Nisi kaf law ŋaa'a kalamu, nisi ka var kay yoboy ma slugona ma may goy hay vunam pana, nisi di'e: Nam zawni may mi goora vi Yosefɗi su?

²³Yesu disiya: Gasiya, law ma nir-niramna kayni nigi ma dum kanu: Doktor, yeraŋ tuwaŋ goy kay tuwaŋ yer', sle ma numa humum labara valamu ma naŋ lum hay Kapernawumna, naŋ ma lum hay nagata vaŋ tani kaw lige.

²⁴Yesu disiya: Nan digi gasita, sa ma jobta-Lawna ma sum sa hay nagata valamu vum ŋaa'a mayɗi.

²⁵Nan digit kayn ti gasita, boy sa duhulla ay ŋolo hay Israyel hay buura vi Eliyas, hay li ma dukalawna ay dukiya hay busat ɦidi hiɗi til karkiya, hay li ma mayta li ŋolo kay nagata pet;

²⁶may Lawn may gi Eliyas tam sa jarsi kep noŋɗi, may nam gum kayni kat cata duhulta kep hay Sarepta, hay nagat vi Sidon.

²⁷Sa kuturuna ay ŋolo hay liyna vi Elisa ma jobta-Lawna, may sa jarsi kep kaw ma yer goy mayɗi, yer goy mi Naaman ma Siriyan kep tuta.

²⁸Nisi kaf sa hay sinagogŋa* muɗ ɦiy ŋolo hay li ma nisi hum kayni,

²⁹nisi yaway kulo'o, nisi tanam goy gine hiɗi hoyok-ziyna, kalam kulo kay sin-hiɗiyta ta hoyok-ziyna visi ini kulo ka'ta kay nisi ma zutum gaa'a,

³⁰may nam rawis jarsiya kali goyo.

³¹Nam ma hay Kapernawum, hoyok-ziyn kep hay Galileya, nam tun caw hatsiya hay buura vi sabatna,

³²nisi lak ɦuyum', jiɓer kay hatta valamu, kay yoboyna valamu gaŋeraŋ ka kuɗumu.

³³Hay sinagogŋa* sa ma ful ma liwisna kalamna ay dam', nam siwel hiɗi delem kulo ŋolo di'e:

³⁴Naŋ min lum hiɗi numa mi mige, naŋ Yesu ma Nasaretna? Naŋ maawa kay ɓulakma'a su? Nan waŋ ŋaa ŋolo, naŋu mi ma peldetna vi Lawna.

³⁵Yesu bayamu di'e: Ziŋaŋu, kalaŋay goy hayamu. Ful ma joona gum gaa jarsiya, kali goy hay san zawni, lum tuwam joo noŋɗi kaw.

³⁶Nisi kaf narta visiya: Nisi di jar-tuwsiya: Kayni mi yoboyn mige? Hiɗi gaŋeraŋi hiɗi dono'o nam law tam fuliyan ma liwisna, fuliyan ma liwisna cuk goy hay sana may.

³⁷Selem tiy goy hay nagat kafe.

³⁸Hay li ma nam hin sinagogŋa*, nam kal hay ziyna vi Simon. May kuno Simonda ka buri moyo, tuwa' ga' ku ŋolo, nisi siɗawam kay nam ma gut kuɗa'a.

³⁹Nam col kulo ka'a law tam moyna, moyna hina'a. Wulini wulini na' fok kulo'o, tun caw sunsiya.

⁴⁰Hay li ma fatta ɗigawa, nisi sa sumuna visi ka hiɗi moy mara'a mara'a kaf marsi tam Yesu. Nam tun ɓalam kisi kep kep kaf, muɗsi goy ŋaa'a.

⁴¹Fuliyan joona kaw kali goy hay sumun ŋolo, ka siwel ala: Naŋu mi goora vi Lawna. Yesu law fuliyan ŋolo, hinim di vaɗi, kay fuliyan wi ala namu mi Kristu.

⁴²May hay li ma liyn foowa goyo, nam kali goyo, kal hay liyn ma fulla. Sumun tun caw garamu, nisi co ta-ta goy kuɗumu; nisi min telem gaa jarsiya kay nam ma kalɗi.

⁴³May nam disiya: La nanige kaw nan ma kus labara vi mulda hay hoyok-ziyn hegen lay, kay nan ganay kayn kay na'ta.

⁴⁴Nam kus yoboyna hay sinagogayna* vi Galileya.