Read Masana LUKAS 6 Bible Online

LUKAS 6 - Masana bible

LUKAS 6

¹Hay buur tara ta sabatna kepe, Yesu jik hay sinena, sa hatayna valamu kus yam-alkamarena, cokom hiɗi ɓisiya, tun caw mutumu.

²Sa Farisen* sara'a dumu: Slen ma telay ala lum hay buura vi sabatnɗina nigi lumu kay mige?

³Yesu disiya: Slen ma David lumna nigi bay jaŋam tuwa su? Hay li ma mayt vumu, namu hiɗi sumuna valamu sa kuɗumna;

⁴nanige nam kal kalafi hay ziyda vi Lawna, nam yaw fu ma zlaray kay tuwamna ti'e, vul mi sa kuɗumna kaw, may hagat vuli kayni kay tum si muliyan-sa-ɗifinna tuta!

⁵Nam hot disiya: Goora vi sana mi mul-sabatna.

⁶Buur ma sabatna mara kep, Yesu kal hay sinagogŋa* kay hata, sa mara kep ay dam', ɓalam ta jufta keŋkeleŋe.

⁷Sa wi-ɗota hiɗi sa Farisena* ka cigeɗ Yesu, kay la Yesu as yerem goy hay buura vi sabatna klasige. Kayni kay nisi min gar yal ma pi lawt kalamu.

⁸May kay nam wi varta visiya, nam di tam sa ma ɓalam keŋkeleŋŋa: Fokaŋ kulo'o, colaŋ kulo jar sumuna. Nam fok kulo'o, col kulo'o.

⁹Yesu disiya: Nan min jobgiya, hay buura vi sabatn kayn hagat ka kay li ŋaat mi sana lebo kay lum joot su? A suɗ irita vi san lebo hina' ba goy su?

¹⁰Nam ɗuwsi kisi kafe, bugolda nam di tam sana: Meɗaŋ ɓaŋ goyo! Nam meɗ ɓalam goyo, na' muɗ goy ŋaa'a.

¹¹Nisi hob hiɗi ɦiyda. Nisi law jar-tuwsiya kay va ma nisi ma lum tam Yesuna.

¹²Hay li namna kayni Yesu kal kulo kay hiɗiyta kay siɗawa. Nam bur tos hay siɗawta tam Lawna.

¹³Hay li ma liyn foowa goyo, nam yi sa hatayna valamu, vilek sara jarsi doogo yam ma', nam yisi ala apostolayna.

¹⁴Nisi kayni: Simon, ma nam kaam gileta valam ala Peter, hiɗi ɓasulumna Andre, Yakub hiɗi Yohana, Filip hiɗi Bartelemi,

¹⁵Matewus hiɗi Tomas, hiɗi Yakub goora vi Alfewus, hiɗi Simon ma yum ala «ma ciwera».

¹⁶hiɗi Yudas goora vi Yakub, hiɗi Yudas ma muɗ di newt kay Yesuna.

¹⁷Nam jik gaa hiɗi nisiya, col hay beɗna vi hiɗiyna, hay liy namna sa hatayna valam ka tokay ŋolo, hiɗi sum segen ŋolo sa may goy Yudiya pet hiɗi Yerusalem hiɗi nagat ta kel niyna Tirus hiɗi Sidon. Nisi co kayni kay humumu, kay gar yerta-goyta kay moyna.

¹⁸Nisi sa fuliyan ma liwisna lisi lasi muɗi goy ŋaa'a.

¹⁹Sumun kaf gar a tun ɓisi talamu, kay donota ta kali goy hay tuwam pa ka muɗsi goy ŋaa'a.

²⁰Bugolda nam cuk iram kir sa hatayna di'e: Sle'ta ka kigi nigi sa hawna, Kay mulda-wuralawna kayni figita.

²¹Sle'ta ka kigi nigi sa mayt cigi wulini, Kay nigi ma hoba. Sle'ta ka kigi nigi sa tiy wulini, Kay nigi ma hob hiɗi firita.

²²Sle'ta ka kigiya, Hay li ma sumun ka gawt kigiya, Hay li ma nisi ma digiɗgi goyo, Hay li ma nisi ma ŋulgiya, Ma noy semda vigi goyo Ki na' muɗi liwisi nala, Kuɗ semda vi goora vi sana.

²³Firigiya hay buur namna ɗawni, pirgi kulo gif-gif', kay wurakŋa vigi ma hay wuralawna ma li ŋolo; kay sumaysiya las sa jobta-Lawna ki nigi nala kaw.

²⁴May joot kigiya, nigi sa farayna, kay teŋ-irta vigi vatawa gaa tani.

²⁵May joot kigi nigi sa hobay wulini, kay mayt ma cigiya. Joot kigi nigi sa ka cen wulini, kay nigi ma tiya, ma yora kaw.

²⁶Joot kigiya hay li ma sumun kaf di ŋaat kigiya, kay sumaysiya li tam sa jobta-Lawna sa bay-gasina ki kayni nala kaw.

²⁷May nan digiya, nigi sa ka humanu: Mingi sa gawt kigina, ligi ŋaat tam nisi sa ka gawt kigiya,

²⁸gigi bolo kay nisi sa beɗgiya, siɗawgi kay nisi sa ligi lasi.

²⁹La san caŋ hay geliyaŋ ta kepta, muɗ geliyaŋ heta talamu, la san min yaw sligar-tuwna vaŋu, telem sligara vaŋ henɗi kaw.

³⁰Vul va'a mi sa ma siɗawaŋu, la san yaw slena vaŋawa, hot jobom kalam loɗi.

³¹Va ma nigi min ala sumun lum tigiyana, nigi ma lum tisi nisi nala kaw.

³²La nigi minsi si sa mingina tuta ni, nigi fi slugot ɗawn arige? Kay sum sa sulukŋa kaw ka li nala.

³³La nigi la ŋaat tam nisi sa ligi ŋaat tuta ni, ŋaata vigi san wa' ɗawn arige? Sum sa sulukŋa kaw ka li ki kayn nala ɗisu?

³⁴La nigi vul bal kayn mi sa nigi var ala nisi ma wurakgitan tuta, nigi as fi slugot ɗawn arige? Sum sa sulukŋa kaw vul bal mi sa sulukŋa, kay nisi ma fi wurakŋa ŋray ca.

³⁵May mingi sa gawt kigina, ligi ŋaat tam sumuna, vulgi balla hiɗi varta ta ala nigi ma hot fumuɗi, nala wurakŋa vigi ma li ŋolo, nigi ma muɗ goy gurona vi ma Kulo-Jamna, kay nam li ŋaat tam sa gi deɓɗina hiɗi sa joona.

³⁶Ligi slugota, ki bugi li slugota nala kaw.

³⁷Kaagi kitatɗi, kay kitat ma kaays kigiɗi kaw. Tungi lawt kay sumunɗi, kay lawt ma tun kigi nigiɗi kaw. Vulgi gida, nala nigi ma fi gida kaw.

³⁸Vulgi slena, slen a vulis tigi nigiya kaw; nigi ma fi dutta-kusta ta ŋaata, ta dakay gaata, ta siri goyta, ta kulfuti goyta. Kay dutta-kusta ta nigi ŋaɓ hiɗi na'ta kayni ma ŋaɓis tigiya hiɗi na'a kaw.

³⁹Nam di law ma nir-niramna mara tisi lo ala: Sa ma dukina fi tan sa ma dukina su? Nisi ma' pete ma cuk gaa hay zulla ɗisu?

⁴⁰Sa ma hatayna nam ŋol suw sa ma hatamnaɗi, may gigekaw hay li ma hatta valam vatawana, nam ŋray hiɗi sa ma hatamna.

⁴¹Naŋ wi burana hay ir ɓasuŋŋa, may gu-malla hay iraŋ naŋu naŋ wumɗi mayn kay mige?

⁴²Lebo naŋ fi di tam ɓasuŋŋa ala: Hinan sli burana goy hay iraŋu, may naŋ kay tuwaŋu may wi gu-malla ma hay iraŋŋaɗi kay mige? Naŋ sa ma milena, slaŋ gu-malla goy iraŋ naŋ tuwa, bugolda naŋ ma muɗ wi'e kay sli burana goy kir ɓasuŋŋa.

⁴³Gu ma ŋaana ma vuɗ vuɗ gu ma joona mayɗi, gu ma joo ma vuɗ vuɗ gu ma ŋaa mayɗi kaw.

⁴⁴Sa wi gun mige mige kaw kuɗ vuɗna valamu valamu. Sa fi ja vuɗ gu-gumna hay gu-zigiynɗi, sa fi ja gulda-guldan hay gu-zigiynɗi kaw.

⁴⁵Sa ma ŋaana yaw farayna valam ma ŋaan ay goy hay dikam pa, sa ma joona yaw slena valam ma joona ay goy hay birimna valam pa. Kay sle ma dikga hobay hiɗi namna kayni vunda dum goyo.

⁴⁶Nigi yan ala Bum-Sumuna Bum-Sumuna, may sle ma nan di'e nigi min lumɗi kay mige?

⁴⁷Gigekaw ma ma tanu, hum yoboyna, li kuɗum kaw, nan min ɗekgi kay sa ma nam ŋray hiɗi namna:

⁴⁸Nam ŋray hiɗi sa ma in ziyna, ma jugoɗom selem ma tuni gaan gaa zulu, nam tun sem-ziyn gaa kay hiɗiyna, hay li ma niyn sulur goyo, niy-ɓatna wat tam ziyda, may na' as geɗ noŋɗi, kay na' ini dono ŋolo.

⁴⁹May sa ma hum yoboyna li kuɗumɗina, nam ŋray ca hiɗi sa ma in sem-ziyda valam gaa hay nagata, bay se' jugoɗ gaa'a, ɓatna vi niyna wat ziyna, na' ɦo gaa wulini wulini, ziy na'ta ɓulak goy ŋolo.