Read Masana LUKAS 9 Bible Online

LUKAS 9 - Masana bible

LUKAS 9

¹Nam yi sa doogo yam ma'na talamu, vulsi donota hiɗi gaŋeraŋa kay fuliyan kaf, nam vulsi donota kay yer moyn goyo kaw.

²Nam cuksi goyo kay kus labara kay mulda-Lawna, kay yer sa moyn goyo kaw.

³Nam disiya: Nigi ma yaw sle kigiya kay rogoytɗi, zugulɗi, birimɗi, fuɗi, gurjuɗi. Yawgi sligar-tuwna ma' maɗi kaw.

⁴La nigi cukawa vo hay ziya, lakgi vo hayamu, hay ziy namna pa, nigi ma tuɗ vokgiya.

⁵Liyn arigekaw ma nisi min vigiɗina, nigi ma po butuw ma segin goyo jew a nigi kal hay hoyok-ziyn mara'a, kay kayni ti di-goyta tisiya.

⁶Nisi kaliya, raw hay nagata nagata pet, nisi ka kus labara ma firina, ka li yerta-goyta hay liyn kaf.

⁷Hay li ma mulla Herod hum kay slen kaf ma ka lina, nam tun caw yor tuwamu. Kay segena ka di ala Yohana ma Baptisma dayawa kulo'o hay mitta pa;

⁸segena lo ala Eliyas maawa, segena lo ala day kulo kayni mi sa ma jobta-Lawna ma ay jewe.

⁹May Herod di'e: Yohana ma Baptisma nan kaam yalam goyo; may nam ma nan hum labara valamu wulin kayni nam mi gige lo? Nam gar a wumu.

¹⁰Hay li ma sa apostolayna hotiyawa, nisi vi labara mi Yesu kay slen ma nisi lumay kafna, nam yawsi kuɗumu, kal goy ŋayaya hiɗi nisiya, goboy hiɗi hoyok-ziyn ma yum Betsayda.

¹¹Hay li ma sumun hum kayni, nisi tuɗ kuɗumu. Yesu visi hiɗi firita, nam lawsi kay mulda-Lawna; nam muɗ sa moyna goy ŋaa'a kaw.

¹²Fatta tun caw kal gaa'a, sa doogo yam ma'na ma talamu, ka dum ala: Gaŋ ir sumuna kay nisi ma tuɗ hay hoyok-ziyn hiɗi naga gurayna ma galamna kaw, kay gar liy ma buura hiɗi sle ma tina: Kay nay ka tan kayn goy fulu.

¹³Yesu disiya: Nigi kay tuwgiya vulsi va ma tina. May nisi hot dita: Numa ka hiɗi fun kuma vasl, hiɗi kuluf ma' tuta. La numa kay tuwma'a tuɗ gus sle ma tina kay sum nisin lakŋi kafe nala kla.

¹⁴Kay sum sa jufayna ay ir birim vasl, Yesu di tam sa hatayna valamu: Hinsi mol gaa dok-vasl dok-vasl.

¹⁵Nisi li nala kaw, nisi hinsi mol gaa'a kaf.

¹⁶Nam yaw fu ma vaslna hiɗi kuluf ma ma'na, ɗuw kulo hay wuralawna, gi bol kalamu, nam ɓurawan iram goyo, vulum mi sa hatayna, kay nisi ma ɓurawam goyo tam sumuna.

¹⁷Nisi kaf ti'e, hob kaw, dir fu ma hin goyna li ir tikisi doogo yam ma', nisi yawam kulo'o.

¹⁸Fat tara kepe Yesu kal goy ŋayaya kay siɗawa, sa hatayna valamu ay hiɗi namu. Nam ka jobsi ala: Sumun di kan ala nan mi gige?

¹⁹Nisi hot dit ala: Yohana ma Baptisma, segena ala Eliyas, segena lo ala kep jar sa jobta-Lawna sa jewna dayawa kulo'o.

²⁰Nam disiya: May nigiya, nigi di kan ala nan mi gige? Peter hot dita: Kristuna vi Lawna.

²¹Yesu gatsi dono'o kay nisi ma di kayni goy mi saɗi.

²²Nam hot disi lo ala la linigekaw goora vi sana ma las ŋolo, sa maariyana hiɗi muliyan ŋulo ɗifinna hiɗi sa wi-ɗota ma noyom goyo. Sumun ma cum goyo, may hay buur ta ɦidita, nam ma day kulo'o.

²³Bugolda nam ka di tisi kaf ala: La san min ma kuɗanu, nam ma noy tuwam goyo hay buurta kaf, nam ma sli gu-ma-grakŋa valam kalamu kay tapis kuɗanu.

²⁴La san min suɗ irita valamu, nam ma ba'a, may gigekaw ma min ba irita valamu kan nanu, nam ma suɗa' goyo.

²⁵La san fi slen ma hay nagata pet, may nam kay tuwamu ba goy kla, ɓulak goy kla, ŋaata kalamu arige?

²⁶Kay gigekaw ma li zulo kanu, kay yoboyna van kaw, goora vi sana ma li zulo kalamu kaw, hay li ma nam ma'a hay gajijita valamu hiɗi gajijita vi bulumu, hiɗi sunda-wuralawna sa peldetna.

²⁷Nan digi gasita, sum sara'a jaray tan lak, nisi ma jugo mittaɗi, ta-ta nisi ma wi mulda-Lawna hiɗi irsi tuwa.

²⁸Ir ki buur glafandi nala bugol Yesu di yoboyn kayni dina, nam tap Peter hiɗi Yohana hiɗi Yakub kuɗumu, kal kulo kay hiɗiyta kay siɗawa.

²⁹Hay li ma nam ka siɗawa, iram muɗi kirsi nafaram valamu, sligara valamu muɗi ciliŋ ciliŋ' ki haraŋa vi wileta nala.

³⁰Ɗuw na kayni, sumun ma' ka kus yoboyna hiɗi namu, kayni si Musus hiɗi Eliyas,

³¹Nisi vul tuwsi kirsi hay gijijita, kus yoboyna kay kal-goyta valamu ta hini vok neeɗa nam ma la'a hay Yerusalem.

³²Wulini Peter hiɗi sa kuɗumna, senda tun caw duŋursiya, hay li ma nisi zliyawa, nisi wi gajijita valamu hiɗi sumun ma' lakay hiɗi namu.

³³Hay li ma sum nisin min hinimu, Peter di tam Yesu: Bum-yalla, la nay lak tani, kayni ŋaa'a kaya, nay inay guɗuk ɦidi, kep kaŋu, kep kay Musus, kep kay Eliyas. Va ma nam dumna nam may wum cawamɗi.

³⁴Hay li ma Peter ka law ki kayni nala, ɗugulla ma'a ŋuysiya, sa hatayna muɗ nari, may nisi kal kulo hay ɗugulla.

³⁵Della may goy hay ɗugulla pa ka di ala: Zawni mi goora vanu ma nan vilekem goyna, humgi kuɗumu.

³⁶Hay li ma nisi hum del namna humna, Yesu hin valam kep zaw'. Sa hatayna duk vunsi ɓurut', sle ma nisi wum hay buur namna nisi min dum goy mi saɗi.

³⁷Hay buurta ka'ta, hay li ma nisi jikay gaa kay hiɗiyta jikŋa, sumun ŋolo co kay ŋaf hiɗi Yesu.

³⁸Ɗuw na kayni, san kepe ka siwel goyo jar sumun pa ala: Bum-yalla, nan siɗawaŋu, cukaŋ iraŋ kay goora van ca, kay namu mi goora van ma kan tuɗoŋ kepna.

³⁹Fulla bowomu, wulini wulini nam pat ciriyna, fulla ŋelemu, vunam gi kufa'a, fulla hinim kayn hiɗi lop ŋolo, kaam tuwam goy mili kaw.

⁴⁰Nan siɗaw sa hatayna vaŋu kay nisi ma digiɗ ful namna goyo, may nisi as kalamɗi.

⁴¹Yesu hot ditiya disiya: Nigi jaf ma bay-vina ma viyuk-viyukŋa, nan ma mus hiɗi nigi atage? Nan ma ziygi ta-ta lancitige? Maran goora vaŋay tani.

⁴²Hay li ma nam co goboyo, fulla gum gaa ka nagat did', ŋelem se'eteŋ'. May Yesu bay ful ma liwisna, yer goor goyo, vulum mi bulumu may.

⁴³Nisi muɗ ɦuyum', jiɓer kay ŋolda vi Lawna. Hay li ma sumun kaf ka muɗi ɦuyum' kay sle ma Yesu lumna, nam di tam sa hatayna valamu:

⁴⁴May nigiya, jakgi humgi ŋaa'a tam yoboyn namna kayni: Goora vi sana ma vulis goyo hay ɓam sumuna.

⁴⁵May sa hatayna may hum caw dit kaynɗi, kay van kayni ŋayay kirsiya, kay nisi ma wum cawamɗi, nisi li nari kay jobom caw law namna kaw.

⁴⁶May ci-wayta fok kulo jarsi ala, ma ŋolla jarsin mi gige.

⁴⁷Hay li ma Yesu wi varta visiya, nam vi goorgoor kep musum galam dam',

⁴⁸Nam disiya: La san vi goorgoor damni hiɗi firita hay semda vanu, nam vanti hiɗi firit mi nanu. La san min van hiɗi firita, nam vum mi nam ma ganina. Kay sa ma kiɗay jargi kafna, nam mi ma ŋolla vigiya.

⁴⁹Yohana sli ditiya di'e: Bum-yalla, numa wi san kep nam digiɗ fuliyan goyo hay semda vaŋu, numa telemiya, kay nam may tapay kuɗayɗi.

⁵⁰Yesu dumu: Telemɗi, kay na'ta sa may gaw hiɗi nigiɗina, nam mi sana vigiya.

⁵¹Hay li ma nisi co goboy hiɗi buur ma nam ma sliys goyo kay nagata pa, nam so iram goy dono'o kay kal kulo hay Yerusalem.

⁵²Nam cuk sa sunda vokomu, nisi kaliya, co hay hoyok-ziyna vi Samariya mara kep kay kot liyna kalamu.

⁵³Ɗawni nisi min vumɗi, kay nam tuɗ kayni hay Yerusalem.

⁵⁴Hay li ma sa hatayna valamu, Yakub hiɗi Yohana wi kayni, nisi di'e: Bum-Sumuna, naŋ min ala numa ma yi kutay kulo hay wuralawna pa kay ŋalsi goyo ki Eliyas li nala su?[5]

⁵⁵Nam muɗ iram kirsiya, lawsi ala: Nigi may wi ŋusta ta li lop haygit damniɗi.

⁵⁶Kay goora vi sana maawa kay ɓulak irita vi sumunɗi, may kay suɗa'a. Nisi kal hay hoyok-ziyn mara'a.

⁵⁷Hay li ma nisi ay hay hagata tuwa, sa mara kep dumu: Nan min tap kuɗaŋu hay liyn kaf ma naŋ min tuɗ haya.

⁵⁸Yesu hotom dita: Cekemna zulla valamu ka'a, layayn ma dukalawna tokosayna valamu ka'a kaw. May goora vi sana va ma nam deŋ yalam talamna mayɗi.

⁵⁹May nam di tam sa mara'a ala: Tapaŋay kuɗanu. May nam di'e: Hinan tuɗ pi bun ay goy jew pi.

⁶⁰May Yesu dumu: Hin sa mitina pi sa mitina visiya, may naŋu, tuɗaŋ goyo kusaŋ labara kay mulda vi Lawna.

⁶¹Sa mara'a dumu: Bum-Sumuna, nan min tap kuɗaŋu, may hinan tuɗ vo'o, gi deɓe mi sum sa vo vanna jewe.

⁶²May Yesu hot dumu: La san ka zum hiɗi luwayna, may ɗuw iram bugolomu ni, nam as kay mulda-Lawnɗi.