Read Masana GATTA-SEM-MA'TA 1 Bible Online

GATTA-SEM-MA'TA 1 - Masana bible

GATTA-SEM-MA'TA 1

¹Kayni mi yoboyn ma Musus dum tam sa Israyel kafna; goy gal hena vi niy-lumna Yordan, hay fulda, hay Araba, ɗiger vok Suf, jar Paran, Tofel, Laban, Hatserot hiɗi Di-Zahab.

²Fokay hay Horeb pa, jik hay hagata vi hiɗiyt Seyir kay kal hay Kades-Barneya kayni, tuɗ ir buur doogo yam kep.

³Hay buurta jewta vi til ma doogo yam kepna vi busata dok-fiɗit kayni, sle ma Ma-Vatɗin dumi mi Mususna nam dum tam sa Israyel kafe.

⁴Kayni bugol liyn ma nisi kol kay Sihon mulla vi sa Amoriyana, sa ka lakay ziy hay Hesbon, hiɗi Og, mulla vi Basan, ma ka musi hay Astarot hiɗi Edrey.

⁵Goy gal hena vi Yordan, hay nagata vi Mowab, Musus tun caw visi caw gatta na'ta, nam ka di ala:

⁶Ma-Vatɗina Lawna vaya law taya hay Horeb ala: Hiɗiyt zawni nigi musawa ka' ŋolo.

⁷Hina' bugolgiya, tuɗgiya, tuɗgi kay hiɗiyta vi sa Amoriyana, hiɗi liyn ma gala'na kaf, hay Araba, kulo kay hiɗiyna, hay Sevelat hay Negeb hay galla vi niy-lumna, hay nagata vi sa Kanaaniyana, hay Libaŋ kaw, ta-ta kat niy-lum ma ŋolla, vun niy-lumna Eufrata.

⁸Humgiya, nan tun nagat vokgiya; tuɗgiya, sligi nagata ta Ma-Vatɗina yi va kalamu kay vula' mi sumaygiya, mi Abraham, mi Isaak, mi Yakub kaw, nam min vulsita, mi jafna visi sa bugolsina kaw.

⁹Hay liy namna kayni, nan di tigi ala: Nan van kep as kay ziygiɗi,

¹⁰Ma-Vatɗina Lawna vigiya biyagiyawa, vaydi kaw nigi muɗi ŋol dak-dak ki mislek ma dukalawn nala.

¹¹Hin Ma-Vatɗina Lawna vi sumaygiya muɗgi ŋolo sem birimi, hinim gi bol kigi kaw ki nam di nala.

¹²Nan van kep as ziy jak ma nekŋa vigiya hiɗi ci-wayta vigi ɗawn ziytige?

¹³Yawgi sum sa yali, sa wi slen ŋolo, sa sumuna vigi wisi kaf, nan ma tunsi kulo kigiya.

¹⁴Nigi hotan dit ala: Va ma naŋ job kay lumna kayni nam mi va ma ŋaa'a.

¹⁵Ki kayn nala sum sa nigi tunsi ŋol kay jafna vigiya nan yawsiya, sum sa yali, sa sumun wisiya, nan tunsi vokgiya ki sa ŋulona vi sum sa birimna, sa ŋulona vi sum sa kisna, sa ŋulona vi sum sa dok-vaslna hiɗi sa ŋulona vi sum sa doogona kaw, ki nisi si sa ŋulona vi sojena hay jafna vigi nala.

¹⁶Hay liy namna kayni nan vul hagata tam sa ka kitata vigiya ala: Humgi kuɗ ɓosiyogina, kaagi kitat kay ɓasuki marige kaw hay hagata va'a kuɗ law ma jaram hiɗi ɓasulumna hiɗi sa ma pulla.

¹⁷Hay li ma nigi ka kitata vigi ɗawni, vargi kay ŋolda vi sanɗi, nigi ma hum kuɗ sum sa gurayna hiɗi sa ŋulona; nigi ma li nar kay saɗi, kay kitat kayni na' vi Lawna, la law tara suwgiyawa, nigi ma mara' vokanu, kay nan ma huma'a.

¹⁸Ki kayn nala nan vulgi hagata kay sle ma nigi ma lumna kafe.

¹⁹Nay yaways hay Horeb pa, nay ŋuy ful na'ta ta ŋolda ta lop ŋolda ta nigi wa'ta kayni; nay sli hagata vi hiɗiyta vi sa Amoriyana, ki Ma-Vatɗina Lawna vaya di taya nala, nay co hay Kades-Barneya.

²⁰Nan digi ala: Nigi coowa kat hiɗiyta vi sa Amoriyana ta Ma-Vatɗina Lawna vaya min vulaya.

²¹humgiya, Ma-Vatɗina Lawna vigiya tun nagat goy vokgiya, tuɗgiya, sligita, ki Ma-Vatɗina Lawna vi sumaygiya di nala; ligi narɗi, tuwgi wirgiɗi.

²²Nigi kaf co vok iranu, nigi ka di tan ala: Cukay sum sara vokaya kay fek nagata, kay vay labara kay hagata ta nay min jik haya'ta, kay hoyok-ziyn ma nay ma co hayamna.

²³Var na'ta kayn li kiran ŋaa'a, nala nan yaw sumun doogo yam ma' jargiya, sa kep kuɗ jaf kep kep may.

²⁴Nisi kaliya, jik kulo kay hiɗiyna, nisi co hay lokŋa vi Eskol, nisi fekemu.

²⁵Vuɗna vi sle ma hay nagatna nisi yawam hay ɓisiya, vulum kirma'a, nisi vulma labara, ka di tuma ala: Nagata na'ta ta Ma-Vatɗina Lawna vay vulgita kayni ti naga ta ŋaa'a.

²⁶May nigi may mini kay tuɗ haya'ɗi, slen ma Ma-Vatɗina Lawna vigi digitna nigi min li kuɗumɗi.

²⁷Nigi ŋurnay kalaf hay guɗukŋa vigiya, nigi di ala: Ma-Vatɗin yaway ay goy hay nagata Egipte pa kayni kay nam ka gaw hiɗi naya, kay nam min vulay goy hay ɓam sum sa Amoriyana kay nisi ma vatay goyo.

²⁸Nay ma jikay arige? Bosiyayna muɗay maŋaya hay li ma nisi di ala: Sum nisin kayni ŋulo'o, fiyok ŋolo kaw, suway naya; hoyok-ziy ma nisi hayamna mi hoyok-ziy ma donona, gulmun ma talamna co ta-ta kulo dukalawna, gurona vi Anak kaw numa wisi aya.

²⁹Nan digiya, ligi ɦuyumɗi, tuwgi muɗ nar kirsiɗi.

³⁰Ma-Vatɗina Lawna vigiya ma ka tuɗ vokgiya, nam kay tuwamu ma dur hay baŋalgiya, ki nam li ay kirgiya hay Egipte nala kaw,

³¹bugol kayni, hay fulda, hay li ma nigi wi ala Ma-Vatɗina ka ziygiya ki san ziy goora valam nala, hay hagat kaf ta nigi poy haya ta-ta cota vigiya hay liyn tani,

³²hiɗi kayn kaf nigi min vi kuɗ Ma-Vatɗina Lawna vigiɗi,

³³nam ma ka tuɗ vokgi hay hagata kay gargi liyn ma nigi lak haya, hay henjeta nam ka hay ɗugul ma kuta kay ɗekgi hagata ta nigi as tuɗ haya'ta, hay falayta nam ka hay ɗugulla.

³⁴Ma-Vatɗina hum winekŋa vigiya, kuɗ dikam ma ɓulakŋa, nam yi slen kalamu ka di ala:

³⁵Sum nisin sa joon tani sa kuɗsi kep kaw, nagata ŋaata ta nan yi va kanu kay vula' mi sumaysit waŋŋi, irsi ma wa' noŋɗi.

³⁶Ma wa' mi Kaleb goora vi Yefune tuta. Nam ma wa'a, nan ma vula' malam namu hiɗi gurona valamu, kay nam hum kuɗ sle ma Ma-Vatɗin dumtin kafe.

³⁷Ma-Vatɗina dikam ɓulak katan nan kaw, kuɗgi nigiya, kay nam di ala naŋ kaw, naŋ as kal hay naga na'taɗi.

³⁸Yosuwa goora vi Nun, ma sunda vaŋu ma kala, naŋ vulum kursulita kay nagat na'ta vula' mi sa Israyel ɗawn mi namu.

³⁹Guro-ŋolona vigiya sa nigi di ala sumun ma vurumsiyana, gurona vigiya sa vaydi may wi ŋaatɗi wi jootɗi kawna, ma kal haya' ɗawn si nisiya, nan vul naga na'ta ɗawn misi nisiya, ma sli naga na'ta ɗawn si nisiya.

⁴⁰May nigiya, muɗgi ŋorgiya, tuɗgi hay fulda, hay galla vi niy-lum ma slawna.

⁴¹Nigi hot dit tan ala: Numa li sulukawa kat Ma-Vatɗina, numa min tuɗa, numa as li duura, ki Ma-Vatɗina Lawna vuma'a vul hagat katma nala. Nala nigiya, gigekaw jun sle ma duura valam hay furamu, nigi varay ala jik kulo kay hiɗiyn kayni may lop noŋɗi.

⁴²Ma-Vatɗina hot di tan ala: Naŋ ma disiya: Tuɗgi kay dursiɗi, kay nan may hiɗi nigiɗi, kay la naɗi sa gawta ma kol kigiya.

⁴³Nan digiya, may nigi min humɗi, nigi ŋel dita vi Ma-Vatɗina, nigi muni kulo kay hiɗiyt jaŋi hay ɦiyda vigi ɦawa nala.

⁴⁴Ki kayn nala sa Amoriyana sa ka kulo kay hiɗiyta munay goy kirgi jaŋi, nisi jaŋ kuɗgiya, ki yumna ka li nala, nisi cigiya hay Seyir ta-ta hay Horma.

⁴⁵Hay hotta vigiya, nigi tiy vok Ma-Vatɗina; may Ma-Vatɗin min humgi delgiɗi, min jak humam tigiɗi kaw,

⁴⁶Nigi lakay hay Kades lo, nigi musi ɗawn ta-ta.