Read Masana GATTA-SEM-MA'TA 13 Bible Online

GATTA-SEM-MA'TA 13 - Masana bible

GATTA-SEM-MA'TA 13

¹Slen ma nan digitna nigi ma ŋomomu, li kuɗumu kaw, nigi ma cuk va hayɗi, yaw va goyɗi kaw.

²La sa ma jobta lebo sa ma wi slen vokomna mara'a kep fok kulo'o jargiya, la nam digi kay ɗekka lebo gul-yalda tara'a,

³la sle ma nam dumna vunam hobawa, la nam digiyawa ala, tapay kuɗ lawayn mara'a -- lawayna ma nigi may wum jewɗina -- la nam digiyawa ala girifgi laway namna ni, nigi ma hum kuɗ sa ma jobta namnaɗi,

⁴sa ma jobta lebo sa ma wi slen vokom namma nigi ma hum dita valamɗi, kay vulgi wakka kayni mi Ma-Vatɗina Lawna vigiya, kay nam min ɗuwa la nigi ka minim hiɗi dikgi kaf, hiɗi ciwta vigi kaf klasige.

⁵Nigi ma jun tuwgi tam Ma-Vatɗina Lawna vigiya, nigi ma li nar kuɗumu, nigi ma li kuɗ vun-ma-gatna valamu, nigi ma humum delemu, nigi ma girifimti mi nam kepe, nigi ma jun tuwgi talam dono'o.

⁶Sa ma jobta ma wi slen vokomna namna kitata valam ti cita-goyta, kay nam dum kayni mi law ma ŋel-vunda tam Ma-Vatɗina Lawna vigiya, ma kalgiyay goy hay Egipte pa, ma butgi goy hay ziy ma ligi gorvona, kay sa ma jobta namna mini kayni kay calgi goy gine'e hiɗi hagata ta Ma-Vatɗina mini kay nigi ma tuɗ haya. Ki kay nala nigi ma pat joot goy jargiya.

⁷Naŋ Israyella, la mi goora vi suŋu, la mi goora lebo goota vaŋu, la ti cata vaŋu ta bur gaa dikaŋga lebo, la mi banaŋŋa ma naŋ minim ki naŋ nala kaw, la nisi gaŋ yaŋ goy ŋayaya ala: Tuɗay girifay lawayn mara'a, lawayna ma naŋ may wumɗi lay sumiyaŋ wumɗi layna,

⁸jar lawayna vi sum sa ŋuyi galgina, la goboyo lebo gine'e kaw, la hay vun nagata ta-ta goy vun naga hena,

⁹naŋ ma vi kaynɗi, ma hum kaynɗi; sa ma li ki kayn nala iraŋ ma li zulo kalamɗi, naŋ ma gut kalamɗi, hulotom goyɗi kaw.

¹⁰May naŋ ma gar kay cum goyo; naŋ ma poŋ iraŋ kulo jewe kay cum goyo, sum segen ma poŋ bisi kulo bugolda;

¹¹naŋ ma gum hiɗi goorhoyona, nala nam ma mit goyo, kay nam gar kay gaŋ iraŋ goy gine hiɗi Ma-Vatɗina Lawna vaŋu, ma kalaŋay goy hay nagat Egipte pa, nagata ta naŋ ay gorvo haya'ta.

¹²Ki kayn nala sum sa Israyella kaf ma hum kayni, narta ma kal hay diksiya, slen ma joo ki kayn nala as lum jargi mara loɗi.

¹³La nigi hum labara kay hoyok-ziyn mara kep jar hoyok-ziy ma Ma-Vatɗina vulgiya kay lak ziy haya,

¹⁴la sum sa yisi hiwirina fokis goy jargi pa, la nisi kali zut sum sa hay hoyok-ziy namna ala bo: Tuɗay girifay lawayn mara'a, la mi lawayn ma nigi may wumɗi,

¹⁵nigi ma job labara, fek caw lawt goy ŋaa'a, la van kayn gasiya, cawam kaw patawa goy haraŋi ala, law ma liwis ki kayn nala ka liy jargiya,

¹⁶sum sa hay hoyok-ziyn namna nigi ma calsi hiɗi kew-gaferaŋa, nigi ma ci sum sa hayamna kaf goy hiɗi sle ma ka hayamna, farayn kaw nigi cum goy kafe.

¹⁷Jakŋa ma hay hoyok-ziyna nigi ma molom gaa hay daŋ hoyok-ziyn kaf, nigi ma ŋalam goy kaf hay kut vok ir Ma-Vatɗina, hiɗi hoyok-ziyn kaw, nam ma hin dok-dok ɗawni mi liyn ma sa may mus ziy hayamɗina, hot inim kulo loɗi.

¹⁸Slen ma vuli kay ɓulakam goyna nigi ma hin mara hay ɓigi noŋɗi, kay Ma-Vatɗina ma hot goy bugolomu hiɗi ɦiyda valamu, kay nam ma ligi slugota, kay nam ma biyagi jafgiya, ki nam yi va kalamu tam sumaygi nala,

¹⁹la nigi hum kuɗ delta vi Ma-Vatɗina Lawna vigiya, la vun-ma-gatna valamu ma nan vulgit vaydina nigi min li kuɗum kafe, la nigi li sle ma ɗigera vok Ma-Vatɗina Lawna vigiya kaw.