Read Masana GATTA-SEM-MA'TA 14 Bible Online

GATTA-SEM-MA'TA 14 - Masana bible

GATTA-SEM-MA'TA 14

¹Nigi kayni si gurona vi Ma-Vatɗina Lawna vigiya, nigi ma ɓir tuwgiɗi, la sa vigi mit kaw nigi ma wel yigi goy velewɗi.

²Kay nigi kayni si sum sa peldete kay Ma-Vatɗina Lawna vigiya; Ma-Vatɗina Lawna vigi vilekgi kayni, kay nigi ma muɗ goy sum sa ir valamu jar sumun kaf sa ka gaa kay nagata.

³Sle ma liwisna nigi ma tumɗi.

⁴Kayni mi sem muuriyana ma nigi ma tumna: Putna, guro fok-dimina, guro fok-meena;

⁵buɗugoora, dukga, lafna, muurina, gawyaŋŋa, diweta hiɗi bariyamna.

⁶Muuriyan kaf ma tirekem muni goy ma' ma ligaɗna nigi ma mutumu.

⁷Muuriyan ma jar tirekem goy ɓiretiya ligaɗ lay, may nigi as kay tumɗi kayni: Lamgana, vetna, kosomna,[6] kay nam ligaɗa, may jar tirekem may goy muniɗi. Nigi ma ɗuwum ki nam liwisi nala;

⁸bagumna, jar tirekem muniya, may nam may liga'ɗi, nam liwisi kigiya; nigi as tum sliwamɗi, ŋumna valam ma goy miti waŋŋa kaw nigi as tun ɓigi talamɗi.

⁹Kayni mi muuriyan ma goloŋ hay niyna ma nigi as tumna: Kuluf ma zlimitam ka'a, ɓulok ka talamu kaw nigi as tumu.

¹⁰May kuluf ma zlimit may talamɗi lay ɓulok may talamɗi layna nigi as tumɗi, nam liwisi kigiya.

¹¹Layayn ma liwisɗin kaf nigi as kay tumu.

¹²May kayni mi jaf layayn ma nigi ma tumɗina: Bakŋa, kulona, bak ma goloŋŋa,

¹³rakŋa, zilimna, bak mara'a mara'a hiɗi lay ma kuɗ jafam kafna,

¹⁴jarakŋa hiɗi lay ma kuɗ jafam kafna,

¹⁵rigetna, ɦuna, rubukŋa, zekelekŋa, hiɗi lay ma kuɗ jafam kafna;

¹⁶gabuura, glaw-glawna, ŋaŋaana,

¹⁷gudufna, koro-korona, ɓukana, lay-joriyona,

¹⁸garamna, hiɗi lay ma kuɗ jafam kafna, tolikona hiɗi baya-bayna.

¹⁹sle ma harmatna ma zlimit talamna kaf nigi ma ɗuwum ki nam liwisi nala, nigi as kay tumɗi.

²⁰Layayn ma liwisɗin kafe nigi ma tumu.

²¹Sa ma pulla ma ziyam ka galgiya nigi vulumta kay nam ti'e, lebo nigi as gusum goyo mi sa ma pulla ma ka musi jargiya, kay nigi kayni si sum sa peldetna vi Ma-Vatɗina Lawna vigiya. Nigi as zal ɦuna hiɗi miira vi sulumɗi.

²²Gal-ma-doogona vi jafna vigi ma hay busat kafna nigi ma vulum goyo.

²³Gal ma doogona vi alkamarena vigiya, vi gulda-guldana vigiya, vi mula, vi guro ma vuɗi jewna vi farayna vigi ma ŋulona hiɗi faray ma gurayna, nigi ma tum vok Lawna Ma-Vatɗina, hay liyn ma nam vilekemu kay tun semda valam haya, kay nigi ma hat kay li nar kuɗ Ma-Vatɗina Lawna vigiya.

²⁴La li ŋalɗi, hagat ka gine'e kay nigi ziy slena kay com ɗawni, kay li ŋalɗi nigi ka goy gine'e hiɗi liyn ma Ma-Vatɗina vilekemu kay tun semda valam haya, kay mige Ma-Vatɗina Lawna vigi gigi bolawa.

²⁵Ki kayn nala gal-ma-doogona vigi namna nigi gusum goyo, naŋ yaw gurjut hay ɓaŋu, naŋ tuɗ hay liyn ma Ma-Vatɗina Lawna vaŋu vilekemna.

²⁶Ɗawni, nigi ma gus sle ma dikgi minim kafna hiɗi gurju na'ta: Putu lebo ɦuwa, vinna lebo dolayna, sle ma dikgi minimna kaf, nigi ma tum gaa vok ir Ma-Vatɗina Lawna vigiya, nigi ma li firiya, nigi hiɗi jafna vigi kafe.

²⁷Sa ma Levitna ma ka musi ziy galgina nigi ma curoɗomɗi, kay galla valam mayɗi, vocota valam tay jargiɗi kaw.

²⁸Hay busat ɦidi kaf kayni, nigi ma yaw gal-ma-doogona vi wa ma nigi feɗem hay busata ɦidita, nigi ma tunum hay liy ma nigi lakay ziy hayna.

²⁹Bugol kayni sa ma Levitna ma co'o, galla hiɗi vocota valam may jargiɗi, sa ma pulla, sa ma kuyuna hiɗi cata duhulta sa ka lakay ziy hiɗi nigiya, nisi ma ti'e, haysi ma hoba, kay Ma-Vatɗina Lawna vigiya ma gigi bolo kay lopna vi ɓigi kafe.